މާޒިޔާއާ އެއްވަރުކޮށް އީގަލްސް ސެމީއާ ގާތަށް
މާޒިޔާ އާއި އީގަލްސް އެއްވަރުވީ ލަނޑެއް ނުޖެހި
މާޒިޔާ އާއި އީގަލްސް ބައްދަލުކުރި މެޗުގެ ތެރެއިން
ޔޫތު ޗެމްޕިއަންޝިޕް ފުޓްބޯޅަ މުބާރާތުގައި އާދީއްތަ ދުވަހުގެރޭ ކުޅުނު މެޗުން މާޒިޔާ ސްޕޯޓްސް އެންޑް ރެކްރިއޭޝަނާ އެއްވަރުކޮށް ކުލަބު އީގަލްސްއިން ސެމީ ފައިނަލާ ގާތަށް ޖެހިލައިފިއެވެ.
ގައުމީ ފުޓްބޯޅަ ދަނޑުގައި ކުޅުނު މި މެޗު ނިމުނީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ.
މި މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، މެޗުގެ ފުރަތަމަ ހާފުގައި މާޒިޔާއަށް އީގަލްސްގެ ގޯލާ އަމާޒުކޮށް ނުރައްކާތެރި ހަމަލާއެއް އުފެއްދިފައެއް ނުވެއެވެ. އަދި މި ހާފުގައި އީގަލްސްއަށްވެސް މާ ގިނަ ހަމަލާތަކެއް އުފެއްދިފައި ނުވި ނަމަވެސް، މެޗުގެ ކުރީކޮޅު އެ ޓީމުގެ އިސްމާޢީލް ސައިފް އާއި ހަސަން ސަހާފަށް ވަނީ ރަނގަޅު ފުރުސަތުތަކެއް ލިބި ބޭކާރުވެފައެވެ.
މި މެޗުގެ ދެވަނަ ހާފު ފަށައިގެން ހަތްވަނަ މިނެޓުގައި މާޒިޔާގެ ޔޫޝައު ބިން އަލީ ނަޝީދު ފޮނުވާލި ބޯޅަ އީގަލްސްގެ ގޯލްކީޕަރު ޝައިހާން އަލީ ދިފާއުކުރިއިރު، އޭގެ ފަހުން އީގަލްސްގެ އިބްރާހީމް ޝަރީފް މުޙައްމަދު ފޮނުވާލި ބޯޅަ މާޒިޔާގެ ގޯލްކީޕަރު ތޯއިފް އަލީ ނަސީމް ވަނީ ދިފާއުކޮށްފައެވެ. އަދި މެޗު ނިމެން ގާތްވެފައި ވަނިކޮށް އީގަލްސްގެ މުޙައްމަދު ރިޝާން ފޮނުވާލި ބޯޅަވެސް ކީޕަރު ތޯއިފް ވަނީ ދިފާއުކޮށްފައެވެ.
މި ނަތީޖާއާއެކު ގްރޫޕް އޭގެ އެއްވަނައިގައި އީގަލްސް އޮތީ ކުޅުނު ތިން މެޗުން ލިބުނު ހަތް ޕޮއިންޓާއެކުއެވެ. ތާވަލުގެ ދެވަނައިގައި އޮތް މާޒިޔާއަށް ތިން މެޗުން ހަތަރު ޕޮއިންޓް ލިބިފައިވާއިރު، ތިންވަނައިގައި އޮތް ސުޕަ ޔުނައިޓެޑް ސްޕޯޓްސް (ސަސް) އާއި ހަތަރުވަނައިގައި އޮތް ދަ ގްރާންޑޭ ސްޕޯޓްސް ކުލަބަށް ދެ މެޗުން ވަނީ ތިން ޕޮއިންޓް ލިބިފައެވެ. އަދި ފުލުގައި އޮތް ކުލަބު ގްރީން ސްޓްރީޓްސް ކުޅުނު ދެ މެޗުން އަދި މިހާތަނަށް ޕޮއިންޓެއް ލިބިފައެއް ނުވެއެވެ.
