އިރުމަތީ ޔޫރަޕްގައި ނޭޓޯގެ ބާރު ވަރުގަދަ ކުރުމަށް އެމެރިކާ ސިފައިން ވަރަށް އަވަހަށް ފޮނުވަން ނިންމާފައިވާކަމަށް އެގައުމުގެ ރައީސް ޖޯ ބައިޑެން ވިދާޅުވެއްޖެއެވެ.

ބައިޑެން މިހެން ވިދާޅުވެފައި މިވަނީ ރަޝިއާއިން ޔޫކްރޭން ހިފަން އުޅޭ ކަމުގެ އަޑުތައް ގަދަވެ އިރުމަތީ ޔޫރަޕުގެ މަސްރަހު ވަރަށް ބޮޑަށް ހޫނުވެފައިވަނިކޮށެވެ.

ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ބައިޑެން ވިދާޅުވީ, އިރުމަތީ ޔޫރަޕާއި ނޭޓޯގެ ގައުމުތަކަށް އެމެރިކާ ސިފައިން ފޮނުވަން ނިންމާފައިވާ ކަމަށެވެ. އެހެންނަމަވެސް އެ ގައުމުތަކަށް އެމެރިކާ ސިފައިން ފޮނުވާނެ ވަކި އަދަދެއް ބައިޑެން ހާމަކުރައްވާފައެއް ނުވެއެވެ. ބައިޑެން ވިދާޅުވީ އެ ގައުމުތަކަށް މާ ބައިވަރު ސިފައިން ނުފޮނުވާނެ ކަމަށެވެ.

ހުޅަނގު ޔޫރަޕުގެ ގައުމުތަކުގައި މިހާރުވެސް އެމެރިކާގެ އެތަށް ހާސް ސިފައިން ހަރަކާތްތެރިވަމުން އާދެއެވެ. އެހެން ނަމަވެސް ރިޕޯޓްތައް ބުނާގޮތުން އިރުމަތީ ޔޫރަޕްގެ މަސްރަހު ހަލަބޮލިވެފައިވާ މި ދަނޑިވަޅުގައި އިރުމަތީ ޔޫރަޕްގައި ހަރަކާތްތެރިވަމުން އަންނަ އެމެރިކާގެ ސިފައިންގެ އަދަދު ނިސްބަތުން މަދެވެ.

މި ހަފުތާގައި ޕެންޓަގަންގެ ތަރުޖަމާން ޖޯން ކާބީ ވިދާޅުވީ ނޭޓޯއަށް އެހީވާން ދާން ޖެހިދާނެ ކަމަށް ބަލައި 8،500 ސިފައިން ތައްޔާރީ ހާލަތުގައި ތިބި ކަމަށެވެ.

ޔޫކްރޭންއަކީ ނޭޓޯގެ މެމްބަރު ގައުމެއް ނޫން ނަމަވެސް އެ ގައުމަށް ރަޝިއާއިން ހަމަލާ ދީފިނަމަ އަވައްޓެރި ނޭޓޯގެ އެހެން ގައުމުތަކަށް ހަނގުރާމަ ކުރިމަތިވާނެ ކަމަށް އެމެރިކާއިން ދެކެއެވެ.

ރަޝިއާއިން ވަނީ ޔޫކްރޭންއަށް ހަމަލާދޭން އެގައުމުން އުޅޭކަމަށް ބުނާ ވާހަކަތައް ދޮގުކޮށްފައެވެ. އެކަމަކު ރަޝިއާއާއި ޔޫކްރެއިން ގުޅޭ ބޯޑަރު ކައިރީގައި 100،000 ރަޝިއާ ސިފައިން އެބަތިއްބެވެ.

ރަޝިއާއިން ޑިމާންޑް ކުރަނީ ޔޫކްރެއިނަށް ނޭޓޯގެ މެމްބަރުކަން ނުދިނުމަށެވެ. މިދިޔަ ހަފްތާގައި ބައިޑެން ވިދާޅުވީ ރަޝިއާއިން ޔޫކްރެއިނަށް ހަމަލާދީފި ނަމަ، ރައްދުގައި އަޅާނީ ރަޝިއާއިން ނޭދޭ ފިޔަވަޅެއް ކަމަށެވެ.