ގްރީން އަތުން ދަ ގްރާންޑޭއަށް ފުރަތަމަ މޮޅު

ޔޫތު ޗެމްޕިއަންޝިޕް ފުޓްބޯޅަ މުބާރާތުގައި އާދީއްތަ ދުވަހުގެ ހަވީރު ކުޅުނު މެޗުން ކުލަބު ގްރީން ސްޓްރީޓްސް ބަލިކޮށް ދަ ގްރާންޑޭ ސްޕޯޓްސް ކުލަބުން ފުރަތަމަ މޮޅު ހޯދައިފިއެވެ.

ގައުމީ ފުޓްބޯޅަ ދަނޑުގައި ކުޅުނު މި މެޗުން ދަ ގްރާންޑޭ މޮޅުވީ ގްރީން އަތުން 2-1 ގެ ނަތީޖާއަކުންނެވެ.

ގްރޫޕް އޭގައި ކުޅުނު މި މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ 13 ވަނަ މިނެޓުގައި ގްރީނުގެ މުޙައްމަދު އައިހަމް ބޮލުން ފޮނުވާލި ހަމަލާއެއް ވަނީ ގޯލުގެ ހުރަސް ދަނޑިއަށް އަމާޒުވެފައެވެ. އޭގެ ފަހުން މެޗުގެ 25 ވަނަ މިނެޓުގައި ދަ ގްރާންޑޭއަށް ޕެނަލްޓީއެއް ލިބުނު ނަމަވެސް، އެ ޓީމުގެ ކެޕްޓަން މުޙައްމަދު ލަޔާން އަޙްމަދު ފޮނުވާލި ޕެނަލްޓީ ދިޔައީ ގޯލާ އަމާޒުނުވެއެވެ. މި ޕެނަލްޓީއަކީ އޭރިއާ ތެރެއިން ދަ ގްރާންޑޭގެ އިބްރާހީމް ނަޒީހަށް ގްރީނުގެ ގޯލްކީޕަރު އަލީ އަބާން މުޙައްމަދު ކުރި ފައުލަކަށް ރެފުރީ ދިން ޕެނަލްޓީއެކެވެ.

މި މެޗުގައި ދަ ގްރާންޑޭއިން ލީޑު ނަގާފައިވަނީ މެޗުގެ 37 ވަނަ މިނެޓުގައެވެ. އިބްރާހީމް ނަޒީހް ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ ޝިމާން އަބްދުލް ޝަކޫރެވެ. އަދި ފުރަތަމަ ހާފު ނިމުމުގެ ކުރިން ދަ ގްރާންޑޭއިން ލީޑު ފުޅާކުރިއިރު، މި ހާފުގެ އިތުރު ވަގުތުގައި މި ލަނޑު އެ ޓީމަށް ކާމިޔާބުކޮށްދިނީ މުޙައްމަދު ރިމްހާން ގާސިމެވެ.

މި މެޗުގެ ދެވަނަ ހާފު ފަށައިގެން 12 ވަނަ މިނެޓުގައި ދަ ގްރާންޑޭގެ މިލްހާން އިބްރާހީމް ވަނީ އޭރިއާ ބޭރުން ނުރައްކާތެރި ހަމަލާއެއް ފޮނުވާލާފައެވެ. އެކަމަކު އެ ހަމަލާގެ ހުރަހަކަށްވީ ގްރީނުގެ ގޯލްކީޕަރު އަލީ އަބާން މުޙައްމަދެވެ. އެއާއެކު މެޗުގެ 79 ވަނަ މިނެޓުގައި ގްރީނުން ވަނީ ލަނޑެއް ޖަހައި ފަރަގު ކުޑަކޮށްފައެވެ. ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ މުޙައްމަދު އައިހަމެވެ.

މި މޮޅާއެކު ދަ ގްރާންޑޭ އޮތީ ގްރޫޕް އޭގެ ފުލުން ދެވަނައިގައި ކުޅުނު ދެ މެޗުން ލިބުނު ތިން ޕޮއިންޓާއެކުއެވެ. އެ ޓީމަށް ވުރެ ކުރީގައި އޮތް މާޒިޔާ ސްޕޯޓްސް އެންޑް ރެކްރިއޭޝަނާއި ސުޕަ ޔުނައިޓެޑް ސްޕޯޓްސް (ސަސް) އަށްވެސް ދެ މެޗުން ތިން ޕޮއިންޓް ލިބިފައިވާއިިރު، އެއްވަނައިގައި އޮތް އީގަލްސްއަށް ވަނީ ދެ މެޗުން ހަ ޕޮއިންޓް ލިބިފައެވެ. އަދި ފުލުގައި އޮތް ގްރީނަށް ކުޅުނު ދެ މެޗުން އަދި މިހާތަނަށް ޕޮއިންޓެއް ލިބިފައެއް ނުވެއެވެ.