މަރު ކޮމިޝަނަށް ރިސަރޗް އޮފިސަރަކު ހޯދަނީ
މި މަގާމަށް ޝަރުޠު ފުރިހަމަވާ މީހުން ފެބްރުއަރީ 2 ގެ ކުރިން ހުށަހަޅަންޖެހޭ
ރައީސުލްޖުމްހޫރިއްޔާގެ އޮފީސް
ރައީސުލްޖުމްހޫރިއްޔާ އުފައްދަވާފައިވާ މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަޙުޤީޤު ކުރާ ކޮމިޝަނަށް ރިސަރޗް އޮފިސަރަކު ހޯދުމަށް ރައީސް އޮފީހުން އިއުލާންކޮށްފިއެވެ.
މިމަގާމުގެ އަސާސީ މުސާރައެއްގެ ގޮތުގައި 6,295 ރުފިޔާ ކަނޑައަޅާފައިވާއިރު އެލަވަންސްތަކާއެކު ޖުމްލަ 13,627.75 ރުފިޔާ ވަނީ ކަނޑައަޅާފައެވެ. ރިސަރޗް އޮފިސަރ ކުރަންޖެހޭ މަސައްކަތުގެ ގޮތުގައި ފާހަގަކޮށްފައިވަނީ ކޮމިޝަނުން ތަޙުޤީޤު ކުރަމުންދާ މައްސަލަތަކާއި ގުޅޭގޮތުން، ރިސަރޗް ހެދުމާއި އެ މައްސަލަތަކުގެ ބްރީފް ތައްޔާރުކޮށް، މިކަންކަމާ ގުޅޭގޮތުން ފޮނުވަން ޖެހޭ ލިޔުންތައް ތައްޔާރުކޮށް ފޮނުވުމާއި، ބާއްވަން ޖެހޭ ބައްދަލުވުންތައް އިންތިޒާމުކުރުމާއި ބައްދަލުވުންތަކުގެ ޔައުމިއްޔާ ތައްޔާރުކޮށް ފޮނުވަން ޖެހޭ ފަރާތްތަކަށް ފޮނުވުމެވެ. އަދި ފޮލޯއަޕްހަދައި ބެލެހެއްޓުމުގެ އިތުރުން ޑޭޓާބޭސް ސެޓްއަޕްކޮށް ބެލެހެއްޓުމާއި މެނޭޖްކުރުންވެސް ހިމެނެއެވެ.
މި މަގާމަށް ޝަރުޠު ފުރިހަމަވާ މީހުން، ރައީސުލްޖުމްހޫރިއްޔާގެ އޮފީހުގެ ވަޒީފާއަށް އެދޭ މީހުން ފުރިހަމަ ކުރާ މަޢުލޫމާތު ފޯމާއެކު، 2 ފެބުރުވަރީ ވާ ބުދަ ދުވަހުގެ 14:00 ގެ ކުރިން ހުށަހެޅުމަށް ރައީސް އޮފީހުން ބުނެއެވެ.
ގެއްލުވާލާފައިވާ މީހުންނާއި މަރާލާފައިވާ މީހުންނަށް އިންސާފު ހޯދައިދިނުމަކީ މިސަރުކާރުގެ ވައުދަކަށް ވާއިރު މަރު ކޮމިޝަން އުފައްދަވާފައިވަނީ ރައީސުލްޖުމްހޫރިއްޔާގެ ގަރާރަކުންނެވެ. މިކޮޝަނަށް ވަނީ ގާނޫނީ ބާރުތަކެއްވެސް ދީފައެވެ. ނަމަވެސް ކޮމިޝަންގެ މަސައްކަތްތައް އެކަށީގެންވާ މިންވަރެއްގައި ކުރިއަށް ނުދާކަމުގެ ޝަކުވާތައް ވަނީ ބޮޑުވެފައެވެ.
