ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙް ކޮވިޑް-19ން ފަސޭހަފުޅުވެއްޖެއެވެ.
އެމަނިކުފާނު ޕޮޒިޓިވްވެވަޑައިގަތުމާ ގުޅިގެން ހުންނެވީ ޢާއިލާއާ އެކަހެރިވެވަޑައިގެންނެވެ. ހޮނިހިރު ދުވަހު އެމަނިކުފާނު ކޮވިޑުން ފަސޭހަފުޅުވުމާއެކު މަސައްކަތަށް ވަނީ ނުކުމެވަޑައިގެންފައެވެ. އެމަނިކުފާނުގެ ޙާލުކޮޅު މިހާރު ރަނގަޅެވެ.
ރައީސް ކޮވިޑަށް ޕޮޒިޓިވްވެވަޑައިގަތީ މި މަހުގެ 22 ވަނަ ދުވަހުއެވެ. ޕޮޒިޓިވްކަން އެނގިވަޑައިގަތީ އަތޮޅު ތެރެއަށް ދަތުރުފުޅެއް ކުރެއްވުމަށް ޓެސްޓް ހެއްދެވުމުންނެވެ. އެމަނިކުފާނު ޕޮޒިޓިވްވެވަޑައިގަތްއިރު ވެކްސިންގެ 2 ޑޯޒް ފުރިހަމަ ކުރައްވައި މި މަހުގެ ކުރީކޮޅު ބޫސްޓަރ ޑޯޒް ވެސް ޖައްސަވާފައިވެއެވެ.
ރައީސް ބަލިން ފަސޭހަފުޅުވެފައިވާ އިރު، މިހާރު ރާއްޖެއަށް ވަޑައިގެން އުޅުއްވާ ތުރުކީގެ ފޮރިން މިނިސްޓަރ މެވްލުތު ޗަވްޝޯލޫއާއި އާދީއްތަ ދުވަހު ބައްދަލުކުރައްވަން ވަނީ ނިންމަވާފައެވެ.
