ރައްޔިތުންގެ މަޖިލީހުގައި އެމްޑީޕީގެ މެންބަރުންނަށް ގާނޫނު އަސާސީ ބަދަލުކުރެވޭ ވަރަށް މެންބަރުން ތިބި ނަމަވެސް، ކޮމަންޑޫ ދާއިރާގެ ގޮނޑި އެމްޑީޕީއަށް ކާމިޔާބު ވުމަކީ ރައީސް ސޯލިހަށް ރައްޔިތުން އިތުބާރު ކުރައްވާކަން ބޭރު ދުނިޔެއަށް ދެއްކޭނެ ހެތްކެއް ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.

އެމްޑީޕީން ކޮމަންޑޫގައި ހޮނިހިރު ދުވަހު ހަވީރު ބޭއްވި ރަސްމިއްޔާތުގައި ވާހަކަދައްކަވަމުން ގާސިމް ވިދާޅުވީ, ކޮމަންޑޫގެ ގޮނޑި ކާމިޔާބުވެގެން ދިއުމަކީ ބޭރުގެ ގައުމުތަކުން އެހީތަކާއި، މަދަދު ލިބުމުގައި ދިވެހި ސަރުކާރާ އޮތް ގާތްކަން އިތުރުވެގެންދާނެ ކަމެއް ކަމަށެވެ. އަދި އެއީ ދިވެހި ރައްޔިތުންނަށް ލިބިގެންދާ ރަނގަޅެއް ކަމަށާއި، ގައުމެއްގައި ހުރި ވެރިއަކާ ދޭތެރޭގައި ގައުމުގެ ރައްޔިތުންގެ އިތުބާރު ނެތްކަމާއި، ގަދަރެއް ނުކުރާކަމާއި، ވެރިކަން ކުރާ ޕާޓީއަކީ އެއްވެސް ބައެއް ނޫންކަމުގައި ވާނަމަ އެހީ ނުލިބޭނެ ކަމަށެވެ.

ގާސިމް ވިދާޅުވީ ކުރިއަށް އޮތް 2 އަހަރު ވެސް ވެރިކަމުގައި ހުންނަވާނީ ރައީސް ސޯލިހު ކަމަށާއި، ރައްޔިތުންނަށް އޮތް ވާޖިބަކީ އެމަނިކުފާނަށް ވެރިކަން ކުރައްވަން ފަހިކޮށްދެއްވުން ކަމަށެވެ.

ގާސިމް ވިދާޅުވީ ކޮމަންޑޫއާއި މަތިކޮމަންޑޫ ގުޅުވާލުމަކީ އެއަރޕޯޓަކަށްވުރެ މާބޮޑު ނިއުމަތެއް ކަމަށެވެ. އަދި މިތަނުގެ ތިން ރަށް ފަތުރުވެރިކަން ކުރާ ރިސޯޓްތަކަށް ބަދަވުގެން ދިއުމުން، ރަށުގެ އެތަކެއް ޒުވާނުންނަށް ވަޒީފާ ލިބިގެންދާނެ ކަމަށެވެ.

އަދި ދެ ކޮމަންޑޫ ގުޅުވާލައި, ތަރައްގީ ފެނިގެން ދިއުމުން، މާލޭގައި ތިބި ކޮމަންޑޫ ރައްޔިތުން ވެސް އެނބުރި ރަށަށް އަންނާނެ ކަމަށާއި، ގެސްޓް ހައުސްތަކާއި އެހެންވެސް ގޮތް ގޮތުން އާމްދަނީ ލިބޭނެ ގޮތްތައް ވެގެންދާނެ ކަމަށެވެ. އަދި ވޭތުވެދިޔަ 50 ވަރަކަށް އަހަރު ކޮމަންޑޫ ރައްޔިތުންނަށް ގެއްލިފައިވާ ތަރައްގީތައް އަންނާނީ މަތިމައްޗަށް ބަރުތީލަވެގެން ކަމަށެވެ. އަދި އެކަން ވުމަށްޓަކައި ދާއިރާގެ ރައްޔިތުންގެ އެއްބާރުލުން ސަރުކާރަށް ބޭނުންވާ ކަމަށާއި، ރާއްޖޭގެ ހުރިހާ ރައްޔިތުން ވެސް ރައީސް ސޯލިހަށް އިތުބާރު ކުރައްވާކަން ބަހާއި އަމަލުން ދައްކަވަންޖެހޭ ކަމަށެވެ.