މަތިކޮމަންޑޫ ބިން ހިއްކާ ނިންމާލައިފި

ށ. މަތިކޮމަންޑޫގެ ބިން ހިއްކުމުގެ މަސައްކަތް ނިންމާލައިފިއެވެ.

މިކަން ހާމަކުރައްވައި އާދީއްތަ ދުވަހުގެ ރޭ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ ސީއީއޯ އާދަމް އާޒިމް ވިދާޅުވީ އެ މަސައްކަތަށްފަހު ހޯމަ ދުވަހު އއ. އުކުޅަހުގެ ބިން ހިއްކުމުގެ މަސައްކަތް ފެށިގެން ދާނެ ކަމަށެވެ. އަދި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ސަރުކާރަކީ އިންތިޚާބަށް ކަޑަޖަހާ ސަރުކާރެއް ނޫންކަން ރައްޔިތުން ގަބޫލުކުރަނީ އިތުބާރާއެކު މަޝްރޫއުތައް ނިންމަމުން ދާތީކަން ވެސް އޭނާ ފާހަގަކުރެއްވިއެވެ.

އެމްޓީސީސީން މަތިކޮމަންޑޫގެ ބިން ހިއްކުމުގެ އަމަލީ މަސައްކަތް ފެށީ 28 ޖުލައިގައެވެ. އެ މަސައްކަތް ކުރިއަށްގެންދިޔައީ ށ. ކޮމަންޑޫ ގޮނޑުދޮށް ހިމާޔާތް ކުރުމާއި ދެ ކޮމަންޑޫ ގުޅާލުމުގެ މަޝްރޫއުގެ ދަށުންނެވެ. ބިން ހިއްކުމުގެ މަސައްކަތް އެމްޓީސީސީން ކޮށްފައިވަނީ ޗަރޓަރ ކުރެވިފައިވާ ޑްރެޖަރ ”ފިލިޕޯ ބްރުނެލޭޝީ“ ބޭނުންކޮށްގެންނެވެ.

މި މަޝްރޫއުގެ ދަށުން، 16.7 ހެކްޓަރުގެ ބިން ވަނީ ހިއްކާފައެވެ. އަދި 200 މީޓަރު ދިގުމިނުގެ ލިންކަކުން ކޮމަންޑޫ އަދި މަތިކޮމަންޑޫގައި ހިއްކާ ސަރަޙައްދު ގުޅުވާލުމަށް ހަމަޖެހިފައިވާއިރު 1690 މީޓަރުގެ ޝޯރ ޕްރޮޓެކްޝަން ރެކްޓިފިކޭޝަން މަސައްކަތް ކުރުން ވެސް މި މަޝްރޫއުގެ ތެރޭގައި ހިމެނެއެވެ.

މި މަޝްރޫއުގެ މަސައްކަތް ސަރުކާރުން އެމްޓީސީސީއާ ހަވާލުކުރީ 249.90 މިލިޔަން ރުފިޔާއަށެވެ. ށ. ކޮމަންޑޫ އާއި މަތިކޮމަންޑޫ ގުޅުވާލުމުގެ މަޝްރޫއުގެ މަސައްކަތް އެމްޓީސީސީއާ ހަވާލުކޮށްފައި ވަނީ މިދިޔަ އަހަރުގެ ކުރީކޮޅެވެ.