ގޮނޑިއެއް ކާމިޔާބު ކުރުމަށް ދުވަހަކުވެސް ނުކުރާހާ މަސައްކަތް، ކޮމަންޑޫ ގޮނޑި ރާޑޯއަށް ކާމިޔާބު ކޮށްދިނުމަށް ކުރެވުނު: ސާލިހު
ވެރިކަން ބަދަލުވުމާއެކު، ރާޝިދު ވަނީ އެމްޑީޕީ ދޫކުރައްވައި، ވެރިކަންކުރާ ޕާޓީއާ ގުޅިވަޑައިގެންފައި
ރައީސް ސާލިހު، ކޮމަންޑޫއަށް ވަޑައިގެންނެވި ދަތުރުފުޅެއްގެ ތެރެއިން
އެމަނިކުފާނުގެ ހަޔާތްޕުޅުގައިވެސް ރައްޔިތުންގެ މަޖިލީހުގެ ގޮނޑިއެއް ހޯދުމަށް އެންމެ ބުރަ މަސައްކަތެއް ކުރެއްވުނީ ށ. ކޮމަންޑޫ ދާއިރާގެ ބައިއިލެކްޝަން، އޭރުގެ އެމްޑީޕީ ކެންޑިޑޭޓު މުހައްމަދު ރާޝިދަށް ކާމިޔާބުކޮށްދިނުމަށް ކަމަށް، ކުރީގެ ރައީސް އިބްރާހީމް މުހައްމަދު ސާލިހު ވިދާޅުވެއްޖެއެވެ.
ރައީސް ސާލިހު ވިދާޅުވީ، ށ. ކޮމަންޑޫ ދާއިރާގެ ބައިއިލެކްޝަންގައި އެމްޑީޕީގެ ކެންޑިޑޭޓު މުހައްމަދު ރާޝިދަށް ގޮނޑި ހޯދުމަށް ޕާޓީން ބުރަ މަސައްކަތްތަކެއް ކުރިކަމަށެވެ.
މިއީ އެމަނިކުފާނުގެ ހަޔާތްޕުޅުގައިވެސް ގޮނޑިއެއް ހޯދުމަށް އެންމެ ބުރަ މަސައްކަތްތަކެއް ކުރެއްވި ގޮނޑިކަން ރައީސް ސާލިހު ފާހަގަކުރެއްވިއެވެ.
އެހެންނަމަވެސް ވެރިކަން ބަދަލުވުމާއެކު މެމްބަރު ރާޝިދު ވަނީ އެމްޑީޕީ ދޫކުރައްވައި، ވެރިކަންކުރާ ޕާޓީއާ ގުޅިވަޑައިގެންފައެވެ.
ރައީސް ސާލިހު ވިދާޅުވީ، އެމްޑީޕީން އެ ގޮނޑި ހޯދުމަށް ކުރަން ޖެހުނު މަސައްކަތް ޚުދު ކެންޑިޑޭޓަށްވެސް އަންދާޒާކޮށްނުލެވޭނެ ކަމަށެވެ. އެގޮތުން އެ ދާއިރާގެ ސަޕޯޓަރުންގެ އެދުމުގެ މަތިން ބައެއް ޖަލްސާތަކުގައި މެމްބަރު ވާހަކަދެއްކެވުމަށް ފުރުސަތު ނުދެއްވައި ތިއްބަވަންވެސް ޖެހުނުކަމަށް ރައީސް ސާލިހު ވިދާޅުވިއެވެ.
އޭރު އެމްޑީޕީއަށްޓަކައި ބައެއް ފަރާތްތަކުން ހިތާ ދެކޮޅަށްވެސް އޭރުގެ ކެންޑިޑޭޓަށް ވޯޓު ދިންކަން ރައީސް ސާލިހު ފާހަަގަ ކުރެއްވިއެވެ.
ކޮމަންޑޫ ދާއިރާގެ ބައިއިލެކްޝަން ބޭއްވީ އެދާއިރާގެ މެމްބަަރަކަށް ހުންނެވި ހުސައިން ވަހީދު އަވަހާރަވުމުންނެވެ.
މީގެ ކުރީގެ އިންތިޚާބުތަކުގައި ވެސް ކޮމަންޑޫ ދާއިރާގެ ގޮނޑި ފުރުއްވާފައިވަނީ އެމްޑީޕީގެ ކެންޑިޑޭޓުންނެވެ. ހުސައިން ވަހީދުގެ ކުރިން އެ ދާއިރާގެ މެމްބަރަކަށް ހުންނެވީ އަހުމަދު ނާޝިދު (އޭޑީކޭ ނާޝިދު)އެވެ.
