ޔޫތު ޗެމްޕިއަންޝިޕްގައި ވެލެންސިއާގެ މައްޗަށް ޔުނައިޓެޑް ވިކްޓްރީ (ޔޫވީ) އިން ކުރި ހޯދައިފިއެވެ.

ގައުމީ ފުޓުބޯޅަ ދަނޑުގައި ހުކުރު ދުވަހު ހަވީރު ކުޅުނު ޔޫވީން ޔޫވީން ކާމިޔާބުކުރީ 3-1 ގެ ނަތީޖާއަކުންނެވެ.

މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު މެޗުގެ 20 ވަނަ މިނެޓުގައި ވެލެންސިއާއިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ އަބްދުﷲ ފާސިރެވެ. އެކަމަކު ފުރަތަމަ ހާފު ނިމުމުގެ ކުރިން ޔޫވީގެ ޒައިޝާން އަޝްރަފް ވަނީ ލަނޑު ޖަހާ ނަތީޖާ ހަމަހަމަކޮށްފައެވެ.

ދެވަނަ ހާފުގައި ޔޫވީން އެ ޓީމުގެ ކުޅުން ރަނގަޅުކޮށް ވެލެންސިއާގެ ގޯލަށް ނުރައްކާކުރިއިރު، މެޗުގެ 52 ވަނަ މިނެޓުގައި ޔޫވީން ވަނީ އިތުރު ލަނޑެއް ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ އަބްދުލް ރަޙްމާން ތިބްޔާންއެވެ. އަދި މެޗުގެ 73 ވަނަ މިނެޓުގައި ޒައިޝާން ވަނީ އިތުރު ލަނޑެއް ޖަހާ މެޗުން ޔޫވީ މޮޅުކޮށްދީފައެވެ.

މި މުބާރާތުގައި ޔޫވީން ކުޅުނު ފުރަތަމަ މެޗުގައި މަހިބަދޫ އަތުން ވަނީ 1-1 ގެ ނަތީޖާއަކުން އެއްވަރުވެފައެވެ. އަދި ވެލެންސިއާއިން ކުޅުނު ފުރަތަމަ މެޗުން ޓީސީ އަތުން 4-3 ގެ ނަތީޖާއަކުން ވަނީ ބަލިވެފައެވެ.

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކޮށްގެން ކުރިއަށްގެންދާ ޔޫތު ޗެމްޕިއަންޝިޕް މި ފަހަރު ކުރިއަށްގެންދަނީ 19 އަހަރުން ދަށުގެ ކުޅުންތެރިންނަށް ޚާއްސަކޮށްގެންނެވެ. މީގެ ކުރިން މި މުބާރާތް 21 އަހަރުން ދަށަށް ޚާއްސަކޮށްގެން ބާއްވަމުން އައިރު، މި ފަހަރުގެ ކުރިން 19 އަހަރުން ދަށަށް ޚާއްސަކޮށްގެން ޔޫތު ޗެމްޕިއަންޝިޕް ބޭއްވީ 2018 ވަަނަ އަހަރު އެކަންޏެވެ. އެ ފަހަރު މުބާރާތުގެ ޗެމްޕިއަންކަން ހޯދީ ކުލަބު ގްރީން ސްޓްރީޓްސްއިންނެވެ.