އާރަށު ހިޔާނަތުގެ ޝަރީއަތުގެ ތާވަލު ހިއްސާކޮށްފި، ޙުކުމް ކުރުން ނޮވެމްބަރު ފަހުކޮޅު
ގާޒީ ގެންދަވަނީ ކުރިއަށް އޮތް އަޑުއެހުންތައް އޮންނާނެ ތާރީޚުތައް ކުރީބައިގައި ވިދާޅުވަމުން
ކުރީގެ ރައީސް އަބްދުﷲ ޔާމީން- ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން މަގާމުގެ ނުފޫޒް ބޭނުންކޮށް ރިޝްވަތު ނެގި މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް ވަނީ ދައ
ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން މަގާމުގެ ނުފޫޒް ބޭނުންކޮށް ރިޝްވަތު ނެގި މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް އުފުލާފާއިވާ ދައުވާގެ ޝަރީއަތް ކުރިއަށްދާނެ ގޮތުގެ ތާވަލު ދައުލަތާއި ދިފާއަށް ހިއްސާކޮށްފިއެވެ.
މި މައްސަލަ ކްރިމިނަލް ކޯޓުގައި ބައްލަވަނީ އިސްގާޒީ އަހުމަދު ޝަކީލެވެ.
މި މައްސަލައިގައި ބުރާސްފަތި ދުވަހު ކުރިއަށް ދިޔަ އަޑުއެހުމުގައި ގާޒީ ޝަކީލު ވަނީ މައްސަލަ ކުރިއަށްދާނެ ގޮތުގެ ތާވަލެއް ދެފަރާތަށްވެސް ހިއްސާ ކުރައްވާފައެވެ. އެގޮތުން ދައުވާ ލިބޭ ފަރާތުގެ މައްޗަށް ހުށަހެޅިފައިވާ ދައުވާ ކުރިއަށްދާނެ ތަނެއް އޮތް ކަމަށް ފަނޑިޔާރު ނިންމަވައިފިނަމަ، އެ ގާނޫނުގެ ސާދަވަނަ ބާބުގައިވާ ގޮތުގެމަތިން ޝަރީއަތް ފެށުމުގެ ކުރިން ހުށަހަޅަން ބޭނުންވާ ހުށަހެޅުންތައް ހުށަހެޅުމަށް މުއްދަތެއް ކަނޑައަޅައި، އެ މުއްދަތުން އުނިނުވާ ގޮތަށް، މައްސަލައިގެ ޝަރީއަތުގެ އަޑުއެހުންތައް ބާއްވާނެ ދުވަސްތައް، ދައުލަތާއި ދައުވާ ލިބޭ ފަރާތާ މަޝްވަރާކުރުމަށްފަހު، ކޯޓުން ކަނޑައަޅައި ތާވަލު ކުރަންވާނެ ކަމަށް ޖިނާއީ އިޖުރާއަތުގެ ގާނޫނުގެ 116 ވަނަ މާއްދާގައި ވަނީ ބަޔާންކޮށްފައިވެއެވެ.
ގާޒީ ޝަކީލް ވަނީ އެ އުސޫލުގެ މަތިން ދައުވާއަށް އިންކާރުކުރާ ޙާލަތެއްގައި ޝަރީއަތް ކުރިއަށްދާނެ ގޮތުގެ ތާވަލު ދެފަރާތަށް ހިއްސާ ކުރައްވާފައެވެ. އެގޮތުން އަންނަ ފެބްރުއަރީ މަހުގެ 2 ވަނަ ދުވަހު މި މައްސަލައިގެ އަޑުއެހުމެއް އޮންނާނެއެވެ. އެއީ މި މައްސަލައިގެ ދައުވާލިބޭ ޔޫސުފް ނައީމްއަށް ދައުވާ އިއްވުމުގެ ބައި ކުރިއަށް ގެންދިއުމަށް ބާއްވާ އިބްތިދާއީ އަޑުއެހުމެކެވެ. އެއަށްފަހު ފެބްރުއަރީ މަހުގެ 10 ވަނަ ދުވަހާއި 24 ވަނަ ދުވަހުވެސް އިބްތިދާއީ އަޑުއެހުންތަކެއް ވަނީ ތާވަލު ކޮށްފައެވެ.
މި ހުރިހާ އަޑުއެހުމެއްވެސް އޮންނާނީ ހެނދުނު 09:30 ގައެވެ.
މާރޗް މަހުވެސް މި މައްސަލައިގެ އަޑުއެހުމެއް ތާވަލު ކޮށްފައިވެއެވެ. އެގޮތުން މާރޗު މަހުގެ 15 ވަނަ ދުވަހާއި، އޭޕްރީލް މަހުގެ 14 އަދި މެއި މަހުގެ 15 ވަނަ ދުވަހު މި މައްސަލައިގެ އިބްތިދާއީ އަޑުއެހުންތައް ވަނީ ތާވަލުކޮށްފައެވެ. ގާޒީ ވިދާޅުވީ، ތާވަލާ އެއްގޮތަށް ކުރިއަށްދާނަމަ، މެއި މަހުގެ 15 ވަނަ ދުވަހު ބާއްވާ އަޑުއެހުމުގައި މި މައްސަލައިގެ ޝަރީއަތުގެ ކުރީގެ ހުށައެޅުންތަކަށް ގޮތެއް ނިމިގެންދާނެކަމަށް ޤަބޫލު ކުރައްވާ ކަމަށެވެ. އެއަށްފަހު ޖޫން މަހުގެ 26 ވަނަ ދުވަހު މި މައްސަލައިގެ ޝަރީއަތް ފެށުމަށް ވަނީ ތާވަލުކޮށްފައެވެ.
މީގެއިތުރުން، ޖުލައި މަހުގެ 1 ވަނަ ދުވަހު ހެކިބަސް ނެގުމުގެ ބައި ފެށުމަށް ވަނީ ތާވަލުކޮށްފައެވެ. އެއަށްފަހު ސެޕްޓެމްބަރު މަހުގެ ތެރޭގައިވެސް ހެކިބަހާއިގުޅޭގޮތުން 4 އަޑުއެހުމެއް ތާވަލުކޮށްފައިވެއެވެ. އެއީ ސެޕްޓެމްބަރު 1،15،21 އަދި 24 ވަނަ ދުވަހެވެ. އެއަށްފަހު އޮކްޓޯބަރު މަހުގެ 25 ވަނަ ދުވަހު ޚުލާސާ ބަޔާން އިއްވުމަށް ތާވަލު ކޮށްފައިވާއިރު، މި ތާވަލާ އެއްގޮތަށް ކުރިއަށްދާނަމަ މި މައްސަލައިގެ ޙުކުމް ކުރެއްވުން އޮންނާނީ ނޮވެމްބަރު މަހުގެ 25 ހިސާބުގައިކަމަށް ގާޒީ ވިދާޅުވިއެވެ.
މި މައްސަލަ ކްރިމިނަލް ކޯޓުގައި ފެށުނީއްސުރެ ގާޒީ ގެންދަވަނީ ކުރިއަށް އޮތް އަޑުއެހުންތައް އޮންނާނެ ތާރީޚުތައް ކުރީބައިގައި ވިދާޅުވަމުންނެވެ. އެހެންނަމަވެސް، އިދިކޮޅު ކޯލިޝަނުން ވަނީ ރައީސް ޔާމީނުގެ މައްސަލަތައް ސިޔާސީ އެކި ކަންކަމާއި ގުޅުވައިގެން ކުއްލިއަކަށް ތާވަލުކުރަމުންދާކަމަށް ބުނެފައެވެ. އެގޮތުން އެންމެ ފަހުން ބޭއްވި އަޑުއެހުމަކީވެސް އެމަނިކުފާނު ކޮމަންޑޫއަށް ކެމްޕޭނަށް ވަޑައިގަންނަވަން އުޅުއްވާތީ ތާވަލު ކުރެއްވި އަޑުއެހުމެއް ކަމަށް އިދިކޮޅުން ތުހުމަތު ކުރަމުން ދިޔަ ނަމަވެސް، އެ އަޑުއެހުން އޮންނާނެކަންވެސް މާ ކުރިން އޮތީ ދިފާއަށާއި ދައުލަތަށް އަންގާފައެވެ.
