ގަވާއިދުން ނެރެމުން ނުގެންދާ ގިނައަދަދެއްގެ ނޫސް މަޖައްލާތައް އުވާލަން ނިންމައިފި
ލިސްޓުގައި 52 ނޫސް މަޖައްލާއެއް ހިމެނޭ
ހޯމް މިނިސްޓަރު އިމްރާން އަބްދުﷲ
ގަވާއިދުން ނެރެމުން ނުގެންދާ ގިނައަދަދެއްގެ ނޫސް މަޖައްލާތައް އުވާލަން ނިންމާފައިވާ ކަމަށް ހޯމް މިނިސްޓްރީން ބުނެފިއެވެ.
ބުދަ ދުވަހު ހޯމް މިނިސްޓްރީން ވަނީ, އުވާލަން ނިންމާފައިވާ ނޫސް މަޖައްލާތަކުގެ ލިސްޓް އާއްމުކޮށްފައެވެ. ލިސްޓުގައި 52 ނޫސް މަޖައްލާއެއް ހިމެނެއެވެ. އެއީ 46 އޮންލައިން ނޫހާއި، 3 މަޖައްލާއާއި، 2 ވެބްސައިޓާއި، ދުވަހު ނޫހެކެވެ.
ހޯމް މިނިސްޓްރީން ބުނީ ނޫސް މަޖައްލާ ފަދަ ތަކެތީގެ ގާނޫނުގެ ދަށުން, 2015 ޑިސެމްބަރ 31ގެ ނިޔަލަށް އެމިނިސްޓްރީގައި ރަޖިސްޓްރީކޮށްފައިވާ ނޫސް, މަޖައްލާ އަދި އޮންލައިން ނޫސްތަކުގެ ތެރެއިން ގަވާއިދުން ޝާއިއުނުކުރާ ނޫސް، މަޖައްލާ އަދި އޮންލައިން ނޫސްތައް އުވާލަން ނިންމާފައިވާކަމަށެވެ.
ނޫސްމަޖައްލާ ފަދަ ތަކެތި ޝާއިއުކުރުމާއި ބެހޭ ގަވާއިދުގެ 29 ވަނަ މާއްދާގައިވާ ގޮތަށް ނޫސް، މަޖައްލާ، އަދި އޮންލައިން ނޫސްތައް ގަވާއިދުން ނުނެރޭނަމަ, 28 ފެބްރުއަރީ 2022ން ފެށިގެން ނޫސްމަޖައްލާގެ ދަފްތަރުން އުނިކުރާނެ ކަމަށް މިނިސްޓްރީން ބުނެއެވެ.
