ލޯނު އުސޫލުން މާޝިއަލް ސެވިއްޔާއަށް

ލޯނު އެއްބަސްވުމެއްގެ ދަށުން މެންޗެސްޓާ ޔުނައިޓެޑަށް ކުޅެމުން އަންނަ ފްރާންސް ފޯވާޑް އެންތަނީ މާޝިއަލް ސްޕެއިނުގެ ސެވިއްޔާއަށް ބަދަލުވާން އެއްބަސްވެފައިވާ ކަމަށް ރިޕޯޓުތައް ބުނެފިއެވެ.

އުމުރުން މިހާރު 26 އަހަރުގެ މަޝިއަލް ޔުނައިޓެޑަށް ބަދަލުވީ 2015 ވަނަ އަހަރުގެ ސެޕްޓެމްބަރު މަހު، 36 މިލިޔަން ޕައުންޑުގެ ފީއަކަށެވެ. އެ ފަހަރު އޭނާ ވަނީ ޔުނައިޓެޑާއެކު ހަތަރު އަހަރުގެ އެއްބަސްވުމެއް ހަދާފައެވެ. އަދި 2019 ވަނަ އަހަރުގެ ޖެނުއަރީ މަހުގެ ތެރޭގައި މާޝިއަލް ވަނީ ޔުނައިޓެޑުގެ އެއްބަސްވުން އިތުރު ފަސް އަހަރަށް އާކޮށްފައެވެ. އެހެންކަމުން ޔުނައިޓެޑާއެކު މާޝިއަލް މިހާރު ހަދާފައިވާ އެއްބަސްވުން ހަމަވާނީ 2024 ވަނަ އަހަރުގެ ހޫނު މުސުމުގައެވެ.

ފްރާންސްގެ ލިޔޯނުން ކެރިއަރު ފަށައި މޮނާކޯއަށްވެސް ކުޅުނު މާޝިއަލް ވަނީ މިހާތަނަށް ޔުނައިޓެޑަށް ކުޅެދިން 269 މެޗުގައި 79 ލަނޑު ޖަހާފައެވެ. އެކަމަކު މި ފަހަކަށް އައިސް މާޝިއަލަށް ޔުނައިޓެޑުގައި އެންމެ އެދެވޭ ކުޅުމެއް ދެއްކިފައި ނުވާއިރު، ޔުނައިޓެޑުގެ ފުރަތަމަ އެގާރައިން ފުރުސަތު ލިބުން އޭނާއަށް ވަނީ މަދުވެފައެވެ.

ރިޕޯޓުތައް ބުނާ ގޮތުން ޔުނައިޓެޑުން މިހާރު ވަނީ ލޯނު އެއްބަސްވުމެއްގެ ދަށުން މި ސީޒަނަށް މާޝިއަލް ސެވިއްޔާއަށް ދޫކޮށްލަން އެއްބަސްވެފައެވެ. މި އެއްބަސްވުމުގެ ދަށުން ސެވިއްޔާއިން ޔުނައިޓެޑަށް ފަސް މިލިޔަން ޕައުންޑުގެ ފީއެއް ދައްކާއިރު، މި މުއްދަތުގައި މާޝިއަލްގެ މުސާރަވެސް ދައްކާނީ އެ ކުލަބުން ކަމަށް ރިޕޯޓުތައް ބުނެއެވެ. މާޝިއަލް މިހާރު ޔުނައިޓެޑާއެކު ހަދާފައިވާ އެއްބަސްވުމުގެ ދަށުން އޭނާއަށް ހަފުތާއަކު 150،000 ޕައުންޑުގެ މުސާރައެއް ލިބެއެވެ.

ލޯނު އުސޫލުން މާޝިއަލް ސެވިއްޔާއަށް ބަދަލުވާއިރު، އޭނާ ވަނީ މިހާތަނަށް ޔުނައިޓެޑާއެކު ހަ ސީޒަން ހޭދަކޮށްފައެވެ. އަދި މި މުއްދަތުގައި އޭނާ ވަނީ އެ ޓީމާއެކު އިނގިރޭސި އެފްއޭ ކަޕާއި އިނގިރޭސި ލީގު ކަޕް އަދި ޔުއެފާ ޔޫރޮޕާ ލީގު ކާމިޔާބުކޮށްފައެވެ. އަދި ފްރާންސްގެ ގައުމީ ފުޓްބޯޅަ ޓީމާއެކު 2016 ވަނަ އަހަރުގެ ޔޫރޯ ފުޓްބޯޅަ މުބާރާތުގެ ރަނަރަޕްކަން ހޯދި މާޝިއަލް ވަނީ ގައުމީ ޓީމަށް ކުޅުނު 30 މެޗުގައި ދެ ލަނޑު ޖަހާފައެވެ.