މިދިޔަ އަހަރުގެ ތިންވަނަ ކުއާޓަރގައި ދަށު ކޯޓުތަކަށް ނިންމުނު މައްސަލަތައް، އޭގެ ކުރީއަހަރާ އަޅާބަލާއިރު ގިނަ

މިދިޔަ އަހަރުގެ ތިންވަނަ ކުއާޓަރގައި ދަށު ކޯޓުތަކަށް ނިންމުނު މައްސަލަތައް އޭގެ ކުރީއަހަރާ އަޅާބަލާއިރު ގިނަކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންއިން ބުނެފިއެވެ.

2021 ވަނަ އަހަރުގެ 3 ވަނަ ކުއާޓަރގައި ޝަރުއީ ކޯޓުތަކަށް ހުށަހެޅުނު މައްސަލަތަކުގެ މައުލޫމާތާއި، 2020 ވަނަ އަހަރުގެ 3 ވަނަ ކުއާޓަރގައި ކޯޓުތަކަށް ހުރި މައްސަލަތަކުގެ މައުލޫމާތުތަކުގެ މައްޗަށް ބިނާކޮށް ދިރާސީ ވިސްނުމަކުން އެކުލަވާލާފައިވާ ޝަރުއީ ދާއިރާގެ 2021 ވަނަ އަހަރުގެ 3 ވަނަ ކުއާޓަރގެ ކޭސް މެނޭޖްމަންޓް ރިޕޯޓް ވަނީ އާންމުކޮށްފައެވެ.

Advertisement

އެ ރިޕޯޓުގައި ބަޔާންކޮށްފައިވާ ގޮތުން 2020 ވަނަ އަހަރުގެ ތިންވަނަ ކުއާޓަރއާ އަޅާ ބަލާއިރު، 2021 ވަނަ އަހަރުގެ ތިންވަނަ ކުއާޓަރގައި ދަށު ކޯޓުތަކަށް ހުށަހެޅުނު މައްސަލަތަކުގެ އަދަދު ވަނީ ދަށްވެފައެވެ. ނަމަވެސް ނިންމި މައްސަލަތަކުގެ އަދަދު ވަނީ އިތުރުވެފައެވެ. އެހެންނަމަވެސް، ސުޕީރިއަރ ކޯޓުތަކަށް ހުށަހެޅުނު މައްސަލަތަކުގެ އަދަދު ވަނީ 20 އިންސައްތަ އިތުރުވެފައެވެ. އަދި މެޖިސްޓްރޭޓު ކޯޓުތަކަށް ހުށަހެޅުނު މައްސަލަތަކުގެ އަދަދު ވަނީ 15 އިންސައްތަ ދަށްވެފައެވެ. އެގޮތުން 2020 ވަނަ އަހަރުގެ ތިންވަނަ ކުއަރޓަރގައި މެޖިސްޓްރޭޓު ކޯޓުތަކަށް 2995 މައްސަލަ ހުށަހެޅިފައިވާއިރު، 2021 ވަނަ އަހަރުގެ މި މުއްދަތުގެ ތެރޭގައި މެޖިސްޓްރޭޓު ކޯޓުތަކަށް ޖުމްލަ 2554 މައްސަލައެއް ހުށަހެޅިފައިވެއެވެ.

މިދިޔަ އަހަރުގެ ތިންވަނަ ކުއާޓަރގައި ދަށު ކޯޓުތަކަށް އެންމެ ގިނައިން ހުށަހެޅިފައިވަނީ އާއިލީ ބާވަތުގެ މައްސަލަތައްކަމަށް ރިޕޯޓުގައި ބަޔާންކޮށްފައިވެއެވެ. އެގޮތުން މިދިޔަ އަހަރުގެ ތިންވަނަ ކުއާޓަރގައި ހުށައެޅިފައިވާ މައްސަލަތަކުގެ ތެރެއިން 51 އިންސައްތަ މައްސަލައަކީ އާއިލީ މައްސަލަތަކެވެ. އަދި 15 އިންސައްތައަކީ ޖިނާއީ މައްސަލަތަކެވެ.

މިދިޔަ އަހަރުގެ އެ މުއްދަތުގައި އެންމެ ގިނަ މައްސަލަ ނިންމާފައިވަނީ ސިވިލް ކޯޓުންނެވެ. ދެވަނައަށް ފެމިލީ ކޯޓު ހިމެނޭއިރު، ތިންވަނައަށް ހިމެނެނީ ޑްރަގް ކޯޓެވެ.

އޭގެ އިތުރުން، ތިންވަނަ ކުއާޓަރގައި ސުޕީރިއަރ ކޯޓުތަކުގެ ކޭސް ކްލިއަރެންސް ރޭޓަށް ބަލާއިރު، ފެމެލީ ކޯޓު ފިޔަވާ ދެން ހުރި ހުރިހާ ކޯޓުތަކެއްގެ ކޭސް ކްލިއަރެންސް ރޭޓް %100 އަށްވުރެ މަތީގައި ހުރިކަން ރިޕޯޓުގައި ފާހަގަ ކޮށްފައިވެއެވެ.

އޭގެ އިތުރުން ކޯޓުތަކުގެ އަހަރުވެފައިވާ މައްސަލަތަކުގެ އިންސައްތަ ވަނީ %30ށް %32ށް އިތުރުވެސް ވެފައެވެ.

ރިޕޯޓުގައި ފާހަގަ ކޮށްފައިވާ ގޮތުން ތިންވަނަ ކުއާޓަރގައި، އެންމެ ގިނަ މައްސަލަ ސ އަތޮޅަށް ނިސްބަތްވާ މެޖިސްޓްރޭޓް ކޯޓުތަކަށް ހުށަހެޅިފައިވާއިރު، މި މުއްދަތުގައި އެންމެ ގިނަ މައްސަލަ ނިންމާފައިވަނީވެސް ސ އަތޮޅަށް ނިސްބަތްވާ ކޯޓުތަކުންނެވެ. ސ. އަތޮޅު ފިޔަވައި، މި މުއްދަތުގައި ދެން އެންމެ ގިނަ މައްސަލަ ހުށަހެޅިފައިވަނީ ހުޅުމާލެ މެޖިސްޓްރޭޓް ކޯޓު، ހދ، ރ، ކ، ލ އަދި ގދ އަތޮޅަށް ނިސްބަތްވާ މެޖިސްޓްރޭޓް ކޯޓުތަކަށެވެ. އަދި މުއްދަތުގައި އެންމެ ގިނަ މައްސަލަ ނިންމި އަތޮޅުތަކުގެ ތެރޭގައިވެސް އެ އަތޮޅުތައް ހިމެނޭއިރު، އެ އަތޮޅުތަކަކީ އާބާދީގެ ގޮތުން މީހުން ގިނަ އަތޮޅުތަކެކެވެ.