މަހިބަދޫން ފަހު ވަގުތު ޔޫވީއާ އެއްވަރުކޮށްފި

ޔޫތު ޗެމްޕިއަންޝިޕް ފުޓްބޯޅަ މުބާރާތުގެ ގްރޫޕް ބީގައި ހޯމަ ދުވަހުގެރޭ މަހިބަދޫ ސްޕޯޓްސް ކުލަބުން ފަހު ވަގުތު ޔުނައިޓެޑް ވިކްޓަރީ ޔޫވީއާ އެއްވަރުކޮށްފިއެވެ.

ގްރޫޕް ބީގައި ކުޅުނު މި މެޗު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ.

މި ފަހަރުގެ މުބާރާތުގެ ގްރޫޕް ބީގައި ހަތަރު ޓީމެއް ހިމެނޭއިރު، މި މުބާރާތުގައި ވާދަކުރަނީ ފުރަތަމަ ޑިވިޝަނުގެ އަށް ޓީމުގެ އިތުރުން މަހިބަދޫއެވެ. މި ފަހަރުގެ މުބާރާތުގައި މަހިބަދޫ ވާދަކުރާއިރު، އެ ޓީމުން މީގެ ކުރިންވެސް ވަނީ ޔޫތު ޗެމްޕިއަންޝިޕުގައި ވާދަކޮށްފައެވެ.

ހޯމަ ދުވަހުގެރޭ ކުޅުނު މެޗުގެ ފުރަތަމަ ހާފު ޔޫވީން ޑޮމިނޭޓުކޮށްގެން ކުޅުނުއިރު، މި ހާފުގެ ކުރީކޮޅު ލަނޑެއް ޖަހަން އެ ޓީމުގެ އަލްހިމް ފަލާހު ޝަރީފަށް ވަނީ ރަނގަޅު ފުރުސަތެއް ލިބިފައެވެ. އެކަމަކު އޭރިއާ ތެރޭގައި ހުހަށްހުރެ އޭނާ ފޮނުވާލި ބޯޅަ މަހިބަދޫގެ ގޯލްކީޕަރު މުޙައްމަދު އިގްޔާން އިގްބާލް ވަނީ ފަސޭހަކަމާއެކު ދިފާއުކޮށްފައެވެ.

އޭގެ ތިން މިނެޓު ފަހުން ޔޫވީއަށް އަނެއްކާވެސް ހުސް ފުރުސަތެއް ލިބުނު ނަމަވެސް، އެ ޓީމުގެ އާލީ މީސާގް އީސާ ފޮނުވާލި ބޯޅަ ދިޔައީ އަރިމަތީ ދަނޑި ކައިރިން ބޭރަށެވެ. އެކަމަކު މި މެޗުގެ ފުރަތަމަ ހާފުގައި ޔޫވީން ވަނީ ލީޑު ނަގާފައެވެ. މެޗުގެ 28 ވަނަ މިނެޓުގައި ލަމާން ޒުހައިރު ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ މީސާގެވެ.

އޭގެ ފަހުން މަހިބަދޫން ކުޅުން ރަނގަޅުކުރިއިރު، ފުރަތަމަ ހާފުގެ ފަހު މިނެޓުގައި އެ ޓީމުގެ ހަސަން ނާއިމް ފޮނުވާލި ހަމަލާ ޔޫވީގެ ގޯލްކީޕަރު އަލީ ޝައިބާން ވަނީ ދިފާއުކޮށްފައެވެ. އަދި މެޗުގެ ދެވަނަ ހާފުގައި ލަނޑެއް ޖަހަން މަހިބަދޫން ގިނަ މަސައްކަތްތަކެއް ކުރިއިރު، އެ ޓީމުން ނަތީޖާ އެއްވަރުކޮށްފައިވަނީ މެޗު ނިމެން ހަތަރު މިނެޓަށް ވެފައި ވަނިކޮށެވެ. މެދު ރޮނގު ކައިރިން ލިބުނު ބޯޅައެއް ހިފައިގެން ގޮސް މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން އަލީ އިޝްފާގް ހަސަން މަޖީދެވެ.

މި މެޗުން މަހިބަދޫ އާއި ޔޫވީ އެއްވަރުވިއިރު، މި ގްރޫޕުގައި ދެން ހިމެނޭ އަނެއް ދެ ޓީމަކީ ޓީސީ ސްޕޯޓްސް ކުލަބާއި ކުލަބު ވެލެންސިއާއެވެ. އެ ދެ ޓީމު ބައްދަލުކުރާ މެޗު ކުޅުމަށް ހަމަޖެހިފައިވަނީ އަންގާރަ ދުވަހުގެރެއެވެ.