މި ސީޒަނުގެ ޔޫތު ޗެމްޕިއަންޝިޕް ފުޓްބޯޅަ މުބާރާތުގައި ކުޅުނު ފުރަތަމަ މެޗުން ސުޕަ ޔުނައިޓެޑް ސްޕޯޓްސް (ސަސް) އަތުން އެންމެ ފަހުގެ ޗެމްޕިއަން ކުލަބު އީގަލްސް މޮޅުވެއްޖެއެވެ.

މި ފަހަރުގެ މުބާރާތުގައި ނުވަ ޓީމެއް ވާދަކުރާއިރު، އެ ޓީމުތަކަކީ ފުރަތަމަ ޑިވިޝަންގެ އަށް ޓީމުގެ އިތުރުން މަހިބަދޫ ސްޕޯޓްސް ކުލަބެވެ. ދެ ގްރޫޕަކަށް ބަހާލައިގެން މުބާރާތުގެ ކުޅުން ކުރިއަށްދާއިރު، ގްރޫޕް އޭގައި ކުޅުނު ފުރަތަމަ މެޗުން ސަސް އަތުން އީގަލްސް މޮޅުވީ 1-0 ގެ ނަތީޖާއަކުންނެވެ.

ގައުމީ ފުޓްބޯޅަ ދަނޑުގައި ކުޅުނު މި މެޗުގެ ފުރަތަމަ ހާފުގައި ދެ ޓީމަށްވެސް ރަނގަޅު ފުރުސަތުތަކެއް ލިބިގެންދިޔައިރު، މެޗު ފަށައިގެން ތިންވަނަ މިނެޓުގައި ސަސްގެ އަޙްމަދު ޖުމާން ފޮނުވާލި ބޯޅައެއް އީގަލްސްގެ ގޯލްކީޕަރު ޝައިހާން އަލީ ވަނީ ދިފާއުކޮށްފައެވެ. އޭގެ ފަހުން މެޗުގެ އަށްވަނަ މިނެޓުގައި އީގަލްސްގެ އަބްރާހީމް ޝަރީފް އަޙްމަދު ހުރަސްކޮށްދިން ބޯޅައަކުން، އެ ޓީމުގެ ކެޕްޓަން ހުމައިދު ހުސެއިން ފޮނުވާލި ބޯޅަ ދިޔައީ ގޯލާ އަމާޒުނުވެއެވެ.

މި މެޗުގެ 18 ވަނަ މިނެޓުގައި ސަސްގެ އަލީ ޝާޒް ހަބީބް ނުރައްކާތެރި ހަމަލާއެއް ފޮނުވާލި ނަމަވެސް، އެ ހަމަލާވެސް އީގަލްސްގެ ގޯލްކީޕަރު ޝައިހާން ދިފާއުކުރިއެވެ. އެއާއެކު މެޗުގެ 33 ވަނަ މިނެޓުގައި އީގަލްސްއިން ވަނީ ލީޑު ނަގާފައެވެ. އިސްމާޢީލް ސައިފް ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި މުޙައްމަދު ސަމާހު މޫސާ ފަތުހީއެވެ.

މި މެޗުގެ ދެވަނަ ހާފުގައި ދެ ޓީމަށްވެސް އެންމެ އެދެވޭ ކުޅުމެއް ދެއްކިފައި ނުވާއިރު، މި ހާފުގައި ދެ ޓީމުގެ ފަރާތުންވެސް މާ ގިނަ ހަމަލާތަކެއް ފެނިގެންގޮސްފައެއް ނުވެއެވެ. އެކަމަކު މެޗުގެ 58 ވަނަ މިނެޓުގައި އީގަލްސްގެ މުޙައްމަދު ސަމާހަށް ރަނގަޅަށް ފުރުސަތެއް ލިބުނުއިރު، އޭނާ ފޮނުވާލި ހަމަލާ ވަނީ ސަސްގެ ގޯލްކީޕަރު ޔޫސުފް މީސަމް އަބްދުﷲ ގެ އަތުގައި ޖެހުމަށްފަހު އަރިމަތީ ދަނޑިއަށް އަމާޒުވެފައެވެ.

މި މޮޅާއެކު އީގަލްސްއިން މި ފަހަރުގެ މުބާރާތުގެ ފެށުން ރަނގަޅުކުރިއިރު، އެންމެ ފަހުން 2019 ވަނަ އަހަރު ބޭއްވި މުބާރާތްވެސް ކާމިޔާބުކޮށްފައިވަނީ އެ ޓީމުންނެވެ. އެ ފަހަރުގެ މުބާރާތް ސައްތައިން ސައްތަ ރިކޯޑަކާއެކު އީގަލްސްއިން ކާމިޔާބުކުރިއިރު، އެ ޓީމުން ވަނީ މިހާތަނަށް ހަތަރު ފަހަރު ޔޫތު ޗެމްޕިއަންޝިޕް ކާމިޔާބުކޮށްފައެވެ.

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކޮށްގެން ކުރިއަށްގެންދާ ޔޫތު ޗެމްޕިއަންޝިޕް މި ފަހަރު ކުރިއަށްގެންދަނީ 19 އަހަރުން ދަށުގެ ކުޅުންތެރިންނަށް ޚާއްސަކޮށްގެންނެވެ. މީގެ ކުރިން މި މުބާރާތް 21 އަހަރުން ދަށަށް ޚާއްސަކޮށްގެން ބާއްވަމުން އައިރު، މި ފަހަރުގެ ކުރިން 19 އަހަރުން ދަށަށް ޚާއްސަކޮށްގެން ޔޫތު ޗެމްޕިއަންޝިޕް ބޭއްވީ 2018 ވަަނަ އަހަރު އެކަންޏެވެ. އެ ފަހަރު މުބާރާތުގެ ޗެމްޕިއަންކަން ހޯދީ ކުލަބު ގްރީން ސްޓްރީޓްސްއިންނެވެ.