ކޮވިޑް-19 އިން ދިފާއުވުމަށް ބޫސްޓަރ ޑޯޒް ނުޖަހާ ފަރާތްތަކަށް ފިޔަވަޅުތައް ހަރުކަށިކުރަން މަޝްވަރާ ކުރަމުންދާކަމަށް ރައީސް އޮފީހުން ބުނެފިއެވެ.
ރައީސް އޮފީހުގެ އޮފިޝަލަކު ރާއްޖެއެމްވީއަށް މައުލޫމާތުދެއްވަމުން ވިދާޅުވީ، ބޫސްޓަރ ޑޯޒް ޖެހުމަށް ޝަރުތު ހަމަވާ ފަރާތްތަކުން ޑޯޒް ނުޖަހާނަމަ، ކަރަންޓީންއާ ނުލައި ދަތުރުކުރެވޭ ގޮތަށް އޮތް ލުއިތަކަށް ބަދަލު ގެނައުމާއި، 14 ދުވަހުގެ ކަރަންޓީން ފުރިހަމަ ކުރަން ޖެހޭ ގޮތަށް އުސޫލު ބަދަލުކުރުން ފަދަ މަޝްވަރާތައް މިހާރު ކުރިއަށްދާ ކަމަށެވެ.
ރާއްޖޭގައި މިހާރު އާންމުކޮށް ހުޅުވާލައިގެން ކޮވިޑް-19 ވެކްސިންގެ ބޫސްޓަރ ޑޯޒް ދޭން ވަނީ ފަށާފައެވެ. ކޮވިޑް-19 ވެކްސިންގެ ކަނޑައެޅިފައިވާ ޑޯޒްތައް ފުރިހަމަކޮށް 6 މަސް ފުރިހަމަ ވެފައިވާ 18 އަހަރުން މަތީގެ ހުރިހާ ފަރާތްތަކަށް ބޫސްޓަރ ޑޯޒެއްގެ ގޮތުގައި ފައިޒަރ ވެކްސިން އަންނަނީ ޖަހަމުންނެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން އާންމުކޮށްފައިވާ ތަފާސް ހިސާބުތަކަށް ބަލާލާއިރު މިމަހުގެ 22 ވަނަ ދުވަހު 2601 މީހަކު ވަނީ ބޫސްޓަރ ޑޯޒް ޖަހާފައެވެ. އޭގެތެރޭގައި ހިމެނެނީ މާލެ ސަރަހައްދުން ބޫސްޓަރ ޑޯޒް ޖެހި 2007 މީހުންނާއި އަތޮޅުތަކުން ބޫސްޓަރ ޑޯޒް ޖެހި 594 މީހެކެވެ.
ކޮވިޑް-19 ގެ ވެކްސިނެއް ޖަހައި ދެ ޑޯޒް ފުރިހަމަކޮށް އަދި ދެވަނަ ޑޯޒް ޖަހާފައިވާތާ 6 މަސް ވެފައިވާނަމަ، ބޫސްޓަރ ޑޯޒް ފައިޒަރ ވެކްސިންއިން ޖެހެއެވެ. އަދި ދެވަނަ ޑޯޒް ނުޖަހައި ތިބި ފަރާތްތަކަށްވެސް އަދިވެސް ޑޯޒް ފުރިހަމަ ކުރުމަށް ފުރުސަތު އެބައޮތް ކަމަށް އެޗްޕީއޭއިން މައުލޫމާތު ދެއެވެ. އެގޮތުން ފައިޒަރ ވެކްސިން މިހާރު ހުރި ސެންޓަރުތަކުން ޖެހޭނެ ކަމަށާއި، އެސްޓްރަޒެނެކާ އާއި ސިނޮފަރމް ވެކްސިން ނަމަ ސެނަހިޔާއިން އެޕޮއިންޓްމަންޓަކާއި ނުލައި ދެވަނަ ޑޯޒް ފުރިހަމަ ކުރުމުގެ ފުރުސަތު އޮންނާނެކަމަށް އެޗްޕީއޭއިން ވަނީ ބުނެފައެވެ.
އެޗްޕީއޭއިން ބުނީ، ބޫސްޓަރ ޑޯޒް ޖެހުމަށް އެޗްޕީއޭގެ ޕޯޓަލް މެދުވެރިކޮށް އެޕޮއިންޓްމެންޓް ހެއްދޭނެ ކަމަށެވެ. އަދި ވެކްސިން ޖަހަން ދާއިރު އައިޑީކާޑު ނުވަތަ ކާކުކަން އަންގައިދޭ ރަސްމީ ލިޔުމެއް ގެންދިއުމަށާއި، ބަލީގެ އެއްވެސް އަލާމާތެއް ނެތުމާއި، ކަރަންޓީންގައި ހުރި މީހަކަށް ނުވުމާއި، ގަޔަށް ދޫ، ފަސޭހައިން ވެކްސިންޖަހާތަން ދެއްކޭނެ ހެދުމެއް ލުމަށާއި، ވެކްސިން ޖަހަން ދާއިރު ރަނގަޅަށް ކައިގެން ހުރުމަށާއި، އަމިއްލަ ފެންފުޅިއެއް ގެންދިއުމަށް އެދިފައެވެ. އަދި ވެކްސިން ޖަހަންދާއިރު އެކުގައި އެކަކަށްވުރެ ގިނައިން ނުދިއުމަށް އެޗްޕީއޭއިން ވަނީ އަންގާފައެވެ.
