ހަނގުރާމަވެރި ސަރަޙައްދެއްގައި އުފަންވާ ކުއްޖާ ރަޖިސްޓްރީކޮށްދެވޭނީ ކޯޓުން ގޮތެއް ކަނޑައެޅުމުން

ހަނގުރާމަވެރި ސަރަހައްދެއްގައި ދިވެހި ރައްޔިތަކަށް އުފަންވެފައިވާ ކުދިންގެ އުފަންވުން ރަޖިސްޓްރީކޮށްދެވޭނީ އެކުއްޖާއަކީ ދިވެހި ރައްޔިތަކަށް އުފަން ދަރިޔަކުކަމާމެދު ކޯޓުން ގޮތެއް ކަނޑައެޅުމުންކަމަށް ބަޔާންކޮށް، ހަނގުރާމަވެރި ސަރަޙައްދެއްގައި ދިވެހި ރައްޔިތަކަށް އުފަންވެފައިވާ ކުދިންގެ އުފަންވުން ރަޖިސްޓަރ ކުރުމާބެހޭ އުސޫލު ގެޒެޓްކޮށްފިއެވެ.

މިއުސޫލަކީ ޓެރަރިޒަމް މަނާކުރުމުގެ ގާނޫނުގެ 60 ވަނަ މާއްދާގެ 5 ވަނަ ނަންބަރުގެ ދ ގެ ދަށުން އެކުލަވާލާފައިވާ އުސޫލެކެވެ. ދ ގައި ބުނެފައިވަނީ އުފަންވުން ރަޖިސްޓަރީކުރުމާއި ބެހޭ ކަންކަމާއި، އުފަންދުވަހުގެ ސެޓްފިކެޓް ހެއްދުމާއި ގުޅޭ ކަންކަން ދައުލަތުގެ ކަމާބެހޭ ފަރާތްތަކުން ހަމަޖެއްސުމަށްޓަކައި އެކުލަވާލަންޖެހޭ އުސޫލު ޓެރަރިޒަމް މަނާކުރުމުގެ ގާނޫނަށް 3 ވަނަ އިސްލާހު ގެނައުމުގެ ގާނޫނަށް އަމަލުކުރަން ފަށާތާ 30 ދުވަހުގެ ތެރޭގައި ހަދައި، ދިވެހި ސަރުކާރުގެ ގެޒެޓްގައި ޝާއިއުކުރަންވާނެކަމަށެވެ. މިގާނޫނު ތަސްދީގުކޮށް އަމަލުކުރަން ފަށާފައިވަނީ މިދިޔަ އަހަރުގެ ޑިސެމްބަރ މަހުގެ 15 ވަނަ ދުވަހުއެވެ.

Advertisement

މިގާނޫނުގެ ދަށުން އެކުލަވާލާފައިވާ ގަވާއިދުގައި ބުނެފައިވަނީ ހަނގުރާމަވެރި ސަރަޙައްދެއްގައި ދިވެހި ރައްޔިތަކަށް އުފަންވެފައިވާ ކުދިންގެ އުފަންވުން، ކަމާބެހޭ ޤާނޫނުތަކުގައިވާ ގޮތުގެމަތިން ދިވެހިރާއްޖޭގައި ރަޖިސްޓަރ ކޮށްފައިނުވާނަމަ، އެ ކުދިންގެ އުފަންވުން، މި އުސޫލުގައި ބަޔާންކޮށްފައިވާ ގޮތުގެ މަތިން ދިވެހިރާއްޖޭގައި ރަޖިސްޓަރ ކުރަންވާނެކަމަށެވެ.

ކުއްޖާއަކީ ދިވެހި ރައްޔިތަކަށް އުފަން ދަރިޔަކާމެދު ކޯޓުން ގޮތެއް ނިންމާތާ 4 ދުވަހުގެ ތެރޭގައި އެ ކުއްޖާގެ ބެލެނިވެރިޔާ، ނުވަތަ ބެލެނިވެރިޔާގެ ޕަވަރ އޮފް އެޓަރނީ އެއް މެދުވެރިކޮށް ކަނޑައަޅާ ފަރާތަކުން އެ ކުއްޖެއްގެ އުފަންވުން ރަޖިސްޓަރ ކުރުމަށާއި އުފަން ދުވަހުގެ ސެޓުފިކެޓު ހެދުމަށް، ފޯމު މެދުވެރިކޮށް އެ ކުއްޖެއްގެ މަންމަ ނުވަތަ ބައްޕަ ރަށްވެހިވެފައިވާ ރަށެއްގެ ނުވަތަ ސިޓީ އެއްގެ ކައުންސިލަށް ހުށަހަޅަންވާނެ ކަމަށް ގަވާއިދުގައި ބުނެފައިވެއެވެ. އަދި ފޯމު ހުށަހަޅާއިރު ކޯޓުން މައްސަލަ ނިންމިގޮތުގެ ރިޕޯޓްވެސް ހުށަހަޅަންވާނެކަމަށް ގަވާއިދުގައި ބުނެފައިވެއެވެ.

އަދި ގާނޫނުގައި ބުނެފައިވާ މުއްދަތުގެ ތެރޭގައި ކޯޓުގެ ނިންމުމުގައި ބަޔާންކޮށްފައިވާ މަޢުލޫމާތުގެ މައްޗަށް ބިނާކޮށް، އެ ކުއްޖެއްގެ އުފަންވުން، އެ ކައުންސިލަކުން ރަޖިސްޓަރ ކޮށްދޭންވާނެކަމަށް ގަވާއިދުގައި ބުނެފައިވެއެވެ. ޓެރަރިޒަމް މަނާކުރުމުގެ ގާނޫނުގައި ބުނެފައިވަނީ ކޯޓަށް ހުށަހެޅޭ މައްސަލައެއް ނިސްބަތްވާ ކުއްޖާއަކީ ދިވެހި ރައްޔިތަކަށް އުފަންވެފައިވާ ދަރިއަކު ކަމުގައި ކޯޓުން ކަނޑައަޅެމާއެކު 7 ދުވަހުގެ ތެރޭގައި އެކުއްޖެއްގެ އުފަންވުން ރަޖިސްޓްރީ ކުރުމާއި ބެހޭ ކަންކަމާއި އުފަންދުވަހުގެ ސެޓްފިކެޓް ހެއްދުމާއި ގުޅޭ ކަންކަން ދައުލަތުގެ ކަމާބެހޭ ފަރާތްތަކުން ހަމަޖައްސަންވާނެކަމަށެވެ.

ކުއްޖާގެ އުފަންވުން ރަޖިސްޓްރީ ކުރުމަށްފަހު ކައުންސިލުން ބަލަހައްޓާ އުފަންވުމުގެ ރަޖިސްޓްރީގައި އެކުއްޖެއްގެ އުފަންވުމާއި ގުޅޭ މައުލޫމާތު ހިމަނަންވާނެކަމަށް ގަވާއިދުގައި ބުނެއެވެ. އަދި ކުއްޖެއްގެ އުފަންވުން ރަޖިސްޓްރީކުރުމަށްފަހު ޑިޕާޓްމަންޓް އޮފް ނޭޝަނަލް ރަޖިސްޓްރޭޝަނަށް މައުލޫމާތު ދިނުމަށް "ގެމެން ޕޯޓަލް" މެދުވެރިކޮށް އެމައުލޫމާތު ކައުންސިލުން ހުށަހަޅަންވާނެކަމަށްވެސް ގަވާއިދުގައި ބުނެފައިވެއެވެ.

"ގެމެން ޕޯޓަލް" އަކީ، ކައުންސިލްތަކުގެ ވިހާ މަރުވާ އާއި، ގޯތިގެދޮރުގެ މަޢުލޫމާތާއި، ވޯޓުލާ މީހުންގެ ރަޖިސްޓަރ އާއި، ވަގުތީ ގޮތުން ދިރިއުޅޭ މީހުންގެ ދަފުތަރު ފަދަ، އާބާދީއާއި ގުޅޭ މަޢުލޫމާތު ބެލެހެއްޓުމުގެ މަސައްކަތް ކުރުމަށް ތައްޔާރުކޮށްފައިވާ އޮންލައިން ޕޯޓަލެކެވެ.

ޓެރަރިޒަމް މަނާކުރުމުގެ ގާނޫނަށް ރައްޔިތުންގެ މަޖިލީހުން އެންމެފަހުން ގެނައި އިސްލާހާއެކު "އަނބުރާ އަންނަ ހަނގުރާމަވެރިންގެ މައްޗަށް ހިންގޭ ޚާއްސަ އިޖުރާއަތުތަކާބެހޭ ގަވާއިދު" ވަނީ 5 ޖެނުއަރީގައި ދިވެހި ސަރުކާރުގެ ގެޒެޓްގައި ޝާއިއުކޮށް އަމަލުކުރަން ފަށާފައެވެ.