އެންމެ އަސާސީ ކަންކަމަށްވެސް ރައްޔިތުން ސަލާން ޖެހުން ހުއްޓުވާލުމަކީ އެމްޑީޕީގެ ވިސްނުމެއް: މާރިޔާ

އެންމެ އަސާސީ ކަންކަމަށްވެސް ރައްޔިތުން ސަލާން ޖެހުން ހުއްޓާލުމަކީ އެމްޑީޕީގެ ވިސްނުމެއްކަމަށް ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވެއްޖެއެވެ.

ކޮމަންޑޫ ދާއިރާގެ ބައި އިލެކްޝަންގައި އެމްޑީޕީން ވާދަ ކުރައްވާ ކެންޑިޑޭޓް މުހައްމަދު ރާޝިދުގެ ކެމްޕެއިން ޖަލްސާގައި ވާހަކަފުޅު ދައްކަވަމުން މާރިޔާ ވިދާޅުވީ، ކޮމަންޑޫ ދާއިރާގެ ރައްޔިތުންނަކީ އަމިއްލަ ވިސްނުމެއް ގެންގުޅޭ، ނުހަނު ހޭލުންތެރި ބައެއް ކަމަށެވެ. އަދި ކޮމަންޑޫ ދާއިރާގެ ރައްޔިތުންނަކީ އިސްލާޙުގެ މަގަށް ޤައުމު ގެންދިއުމުގައި އާނބަސް ބުނެ، ޤައުމީ މަސައްކަތުގައި އުޅުނު ބައެއްކަމަށްވެސް މާރިޔާ ފާހަގަ ކުރެއްވިއެވެ.

މާރިޔާ ވިދާޅުވީ، 2008 ގައި އެމްޑީޕީ ސަރުކާރެއް އައިފަހުން މިއަދާއި ހަމައަަށްވެސް އެ ދާއިރާގެ ރައްޔިތުން ވޯޓު ދެއްވަމުން ގޮސްފައިވަނީ އެމްޑީޕީއަށް ކަމަށެވެ. އަދި އެ މަސައްކަތުގައި އެންމެ އިސްކޮށް އުޅުއްވި އެއް ބޭފުޅަކީ ކޮމަންޑޫ ދާއިރާގެ ކުރީގެ މެމްބަރު އަލްމަރުޙޫމް ހުސައިން ވަޙީދުކަމަށެވެ.

އެމްޑީޕީއަކީ އަބަދުވެސް ރައްޔިތުންގެ ހިޔާލާއި މަޝްވަރާ ހޯދައި، ރައްޔިތުންގެ ޙާލު ގާތުން ބެލުމަށްފަހު ވައުދުތަކެއްވާ ޕާޓީއެއްކަން ފާހަގަ ކުރައްވައި މާރިޔާ ވިދާޅުވީ، ފެށުނީއްސުރެ އެމްޑީޕީން ކަންކަން ކުރަމުން އަންނަނީ އެގޮތަށް ކަމަށެވެ. އެގޮތުން މިހާރު އާސަންދައޭ ބުނުމުން މާ ބޮޑު ކަމަކަށް ނުވެދާނެ ކަމަށާއި، އެ ޚިދުމަތް ފަށައިގަތުމުގެ ކުރިން ރައްޔިތުން އުޅުނު ޙާލު މިއަދު ހަނދާން ނުހުރެދާނެކަމަށް މާރިޔާ ވިދާޅުވިއެވެ. ހަމައެގޮތަށް ސުކޫލަށް ދިއުމަށް ކުދިން ފޮތް ފަންސުރު ހަމަކުރުމަށް އުޅެންޖެހުނު ގޮތާއި، އުމުރުން ދުވަސްވީ މީހުންނަށް ޕެންޝަން ދޭން ފެށުން ފަދަ އެތައް ކަމެއް މާރިޔާގެ ވާހަކަފުޅުގައި ފާހަގަ ކުރެއްވިއެވެ.

މާރިޔާ ވަނީ އެމްޑީޕީއަކީ އަބަދުވެސް ރައްޔިތުންނާމެދު ވިސްނާ ފިކުރުކުރާ އަދި އެއްވެސް ރައްޔިތަކު ބާކީ ނުކުރާ ޕާޓީއެއްކަމަށް ވިދާޅުވެފައެވެ. އަދި ލާމަރުކަޒީ އުސޫލުން ޤައުމު ހިންގަން ވިސްނައި، ރައްޔިތުންނާ ވީހާވެސް ގާތުން ޚިދުމަތް ދިނުމަށް އެމްޑީޕީން އަބަދުވެސް ވިސްނާކަމަށް ވިދާޅުވެ، އެންމެ އަސާސީ ކަންކަމަށްވެސް ރައްޔިތުން ސަލާން ޖެހުން ހުއްޓާލުމަކީ އެމްޑީޕީގެ ވިސްނުމެއްކަމަށް އެކަމަނާ ސިފަ ކުރެއްވިއެވެ.

މީގެއިތުރުން، ބަލިމަޑުކަމުގެ ތެރެއިން އިޤްތިސާދީ ގޮތުން މިހާ ދަތި ޙާލަތެއްގައި ޤައުމު އޮތްއިރު އަވައްޓެރި އިންޑިއާ ފަދަ ޤައުމުތަކުން ވެދެމުންދާ އެހީތެރިކަންވެސް މާރިޔާގެ ވާހަކަފުޅުގައި ފާހަގަ ކުރެއްވިއެވެ. އެގޮތުން އެކި ގޮތްގޮތުން އިންޑިއާއިން އެހީތެރިކަން ފޯރުކޮށްދެމުން ގެންދާއިރުވެސް އެކަމާވެސް ނުރުހުންވާ ބަޔަކު އެބަ ތިބިކަމަށާއި އިންޑިއާގެ އެހީގައި ގެނެސްދޭ ތަރައްޤީ ހުއްޓުވުމުގެ މަޤްސަދުގައިވެސް ބަޔަކު މަސައްކަތް ކުރަމުންދާކަމަށް އެކަމަނާގެ ވާހަކަފުޅުގައި ތުހުމަތުކުރެއްވިއެވެ.

މާރިޔާ އިތުރަށް ވިދާޅުވީ، އިދިކޮޅުން އެ ކުރާ މަސައްކަތަކީ ރައްޔިތުންނަށް އޮޅުވާލުމާއި ނަފްރަތު އުފެއްދުން ކަމަށެވެ. އަދި ރައްޔިތުންނަށްވެސް އެކަންކަން ވިސްނޭނެކަމަށް ޤަބޫލު ކުރެއްވޭކަމަށް ވިދާޅުވިއެވެ.