އަދާލަތުގެ ތާއީދު އެމްޑީޕީގެ ކެންޑިޑޭޓަށް
23 ޖެނުއަރީ 2022 | އާދީއްތަ 03:51ކޮމަންޑޫ ދާއިރާގެ ބައި އިލެކްޝަން އޮންނަނީ އަންނަ ފެބުއަރީ މަހުގެ 5 ގައި
އަދާލަތު ޕާޓީގެ މެމްބަރުން
އަންނަ ފެބްރުއަރީ މަހުގެ 5 ވަނަ ދުވަހު އޮންނަ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަންގައި އަދާލަތު ޕާޓީން ތާއީދުކުރަނީ އެމްޑީޕީ ކެންޑިޑޭޓަށް ކަމަށް އެ ޕާޓީން ބުނެފިއެވެ.
މިކަމާއި ގުޅިގެން ސަރުކާރު ހިންގާ ކޯލިޝަންގައި ހިމެނޭ އަދާލަތު ޕާޓީން ބުނީ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަންގައި، ވާދަކުރާ 3 ކެންޑިޑޭޓުންގެ ތެރެއިން އެމްޑީޕީގެ ކެންޑިޑޭޓަށް ތާއީދުކުރެއްވުމަށް ޕާޓީގެ އެންމެ އިސް ލީޑަރު އަދި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު އެދިވަޑައިގަންނަވާފައިވާކަމަށެވެ. ރައީސުލްޖުމްހޫރިއްޔާގެ އެދިވަޑައިގެންނެވުމުގެ މަތިން އަދާލަތު ޕާޓީގެ މަޝްވަރާ މަޖިލީހުން ވަނީ އެމްޑީޕީގެ ކެންޑިޑޭޓަށް ތާއީދުކުރަން ނިންމާފައި ކަމަށް އަދާލަތު ޕާޓީން ބުނެފައިވެއެވެ.
އަދާލަތު ޕާޓީން ބުނީ އެ ޕާޓީން އެމްޑީޕީގެ ކެންޑިޑޭޓަށް ތާއީދުކުރަން ނިންމީ މައިގަނޑު 4 ކަމެއްގެ މައްޗަށް ބިނާކޮށް ކަމަށެވެ. އެގޮތުން ފުރަތަމަ ކަމެއްގެ ގޮތުގައި އެ ޕާޓީން ފާހަގަކޮށްފައިވަނީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ސަރުކާރުގައި، އަމާން ސުލްޙަވެރި މުޖްތަމައެއް ގާއިމްކޮށް، ސިޔާސީ ހަލަބޮލިކަން ކުޑަކޮށް، ކޮވިޑް-19 ގެ އާލަމީ ވަބާއާއި އެއާއެކު މެދުވެރިވި އިގުތިސާދީ ދަތިތަކާއެކުވެސް، ރާއްޖޭގެ އިގްތިސާދު ހަރުދަނާކޮށް، އެމަނިކުފާނު ވައުދުވެވަޑައިގެންފައިވާ ފަދައިން ގިނަ ޕާޓީއެކުލެވޭ ކޯލިޝަން ސަރުކާރެއް ކާމިޔާބުކަމާއެކު ހިންގަވާ ކަމެވެ.
ދެވަނަ ކަމެއްގެ ގޮތުގައި ފާހަގަކޮށްފައިވަނީ ރާއްޖޭގެ އިސްލާމީ ޝަޚުސިއްޔަތަށް ބޮޑު ގޮންޖެހުމެއް ދިމާވެދާނެކަމަށް ފާހަގަކުރެވި، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ އަރިހުގައި އެޕާޓީން ކަންބޮޑުވުން ފާޅުކުރި ކޮންމެ ކަމެއްގައި އެކަށީގެންވާ ހައްލު ހޯދުމަށް މަސައްކަތްކުރައްވާފައިވާތީއެވެ.
ތިންވަަނަ ކަމެއްގެ ގޮތުގައި ފާހަގަކޮށްފައިވަނީ މި ސަރުކާރުން ގައުމުގެ ސުލްހަ މަސަލަސްކަން ގާއިމްކޮށް އަމާން ވެއްޓެއް ގާއިމްކުރުމަށް ކުރަމުންދާ މަސައްކަތްތަކެވެ. މިގޮތުން މަސްތުވާތަކެތީގެ މައްސަލަތައް ހައްލުކުރުމަށް މީގެ ކުރިން އެއްވެސް ސަރުކާރަކުން ނުކުރާހާ މަސައްކަތް ކޮށްފައިވާ ކަމަށް އަދާލަތު ޕާޓީން ބުނެފައިވެއެވެ.
މީގެ އިތުރުން ހަތަރުވަނަ ކަމެއްގެ ގޮތުގައި ފާހަގަކޮށްފައިވަނީ ރައްޔިތުންގެ ހައްގުތައް ކަށަވަރުކޮށް، މިނިވަން ދީމިގްރާތީ ވެއްޓެއް ގާއިމްކޮށް، ހަމަހަމަ އުސޫލެއްގެ ދަށުން އަސާސީ ޚިދުމަތްތައް ރާއްޖޭގެ ހުރިހާ ރައްޔިތުންނަށް ފޯރުކޮށްދީ، އުމްރާނީ ގޮތުން ރާއްޖެ ތަރައްގީކުރާކަން މިއަދު ފެންނަން އެބައޮތްކަމަށް އަދާލަތު ޕާޓީން ބުނެފައިވެއެވެ. އެހެންކަމުން އަދާލަތު ޕާޓީން މިނިންމުން ނިންމާފައިވަނީ ގައުމާ ރައްޔިތުންގެ އެންމެ އިސް މަސްލަހަތަށާއި، ރާއްޖޭގެ ސިޔާސީ މަސްރަހަށާއި އަދާލަތު ޕާޓީން ކުރިއަރުވާ ސިޔާސަތުތަކަށް ރިއާޔަތްކުރުމަށްފަހުގައި ކަމަށް އަދާލަތު ޕާޓީން ބުނެފައިވެއެވެ.
މީގެ އިތުރުން މިކަންކަން އެގޮތުގައި ދެމެހެއްޓުމަށްޓަކައި، ގުޅިފައިވާ ސިޔާސީ ޕާޓީތަކުން އެކުގައި ފަށާފައިވާ މަސައްކަތުގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހަށް އެހީތެރިވެ އެއްބާރުލުން ދިނުމަކީ ރައްޔިތުންގެ އެންމެ ބޮޑު މަސްލަހަތު މިވަގުތަށް އޮތް ކަން ކަމުގައި އަދާލަތު ޕާޓީން ދެކޭ ކަމަށްވެސް ބުނެފައިވެއެވެ.
