ރައީސް ސޯލިޙު ކޮވިޑަށް ޕޮޒިޓިވް، މިހާރު ހުންނެވީ އައިސޮލޭޝަންގައި
އެމަނިކުފާނު ޕޮޒިޓިވްކަން އެނގިވަޑައިގަތީ އަތޮޅުތެރެއަށް ދަތުރު ކުރެއްވުމަށް ޕީސީއާރް ޓެސްޓް ހެއްދެވުމުން
ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިޙު
ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިޙު ކޮވިޑް-19 އަށް ޕޮޒިޓިވްވެއްޖެއެވެ.
އެކަން ހާމަ ކުރައްވާފައިވަނީ ހޮނިހިރު ދުވަހު އެމަނިކުފާނު ކުރެއްވި ޓްވީޓެއްގައެވެ. އެގޮތުން ރައީސް ސޯލިޙު ވިދާޅުވީ، އެމަނިކުފާނު ޕޮޒިޓިވްކަން އެނގިވަޑައިގެންނެވީ އަތޮޅުތެރެއަށް ދަތުރު ކުރެއްވުމަށް ޕީސީއާރް ޓެސްޓް ހެއްދެވުމުން ކަމަށެވެ.
އަދި މިހާރު ހުންނެވީ ގެކޮޅުގައި އެކަހެރިވެވަޑައިގެން ކަމަށްވެސް ރައީސް ސޯލިޙު ވިދާޅުވިއެވެ.
ރައީސް ވިދާޅުވީ، އެމަނިކުފާނުގެ ޙާލުކޮޅު ރަނގަޅު ކަމަށެވެ.
ރައީސް ސޯލިޙު ކޮވިޑަށް ޕޮޒިޓިވްވެވަޑައިގެންފައި މިވަނީ، ހޮނިހިރު ދުވަހުގެ ރޭ އެމްޑީޕީން ބާއްވާ ބޮޑު ޖަލްސާގައި ބައިވެރިވެވަޑައިގަތުމަށް ފޯކައިދޫއަށް ފުރާވަޑައިގަންނަވަން ހަމަޖެހިފައި ވަނިކޮށެވެ. އަދި މިހާރު ކުރިޔަށްދާ ޕްރެޒިޑެންޓްސް ކަޕް ފުޓުބޯޅަ މުބާރާތުގެ ފައިނަލް މެޗު ބެއްލެވުމަށް އާދިއްތަ ދުވަހު އަލިފުއްޓަށް ރަސްމީ ދަތުރުފުޅެއް ކުރެއްވުމަށްވެސް އޮތީ ހަމަޖެހިފައެވެ.
