މިސްކިތްތަކުގައި މާސްކު އަޅަން ހަނދާންކޮށްދެން: އިސްލާމިކް މިނިސްޓަރ

މިސްކިތްތަކުގައި މާސްކު އަޅަން ހަނދާންކޮށްދެމުންދާ ކަމަށް އިސްލާމިކް މިނިސްޓަރ ޑރ. އަހުމަދު ޒާހިރު އަލީ ވިދާޅުވެއްޖެއެވެ.

މި ދުވަސްވަރު މުޅި ރާއްޖެއިން ފެންނަ ކޮވިޑް-19ގެ ކޭސްތައް އިތުރުވަމުންދާއިރު، މާލެ ސަރަހައްދުން ރިޕޯޓްކުރާ ކޭސްތައް މިހާރު ހުންނަނީ 1،000އިން މަތީގައެވެ. އެހެންނަމަވެސް ބަލި ކޮންޓްރޯލްކުރުމަށް މިހާތަނަށް އެއްވެސް އިދާރާއަކުން ހަރުކަށި ފިޔަވަޅެއް އަޅާފައެއް ނުވެއެވެ. އެހެންނަމަވެސް މާލެ ސަރަހައްދުން އަތޮޅުތެރެއަށް ދަތުރުކުރާއިރު ކޮވިޑަށް ޓެސްޓްކުރަންޖެހެއެވެ.

މި ދުވަސްވަރުގައި މިސްކިތްތަކުގައި ނަމާދުކުރާއިރު ވަކި ޚާއްސަ ފިޔަވަޅެއް އަަޅަން އެއްވެސް އިދާރާއަކުން އަންގާފައިވޭތޯ ރާއްޖެއެމްވީން ކުރި ސުވާލަށް ޖަވާބުދެއްވަމުން އިސްލާމިކް މިނިސްޓަރ ޑރ. އަހުމަދު ޒާހިރު އަލީ ވިދާޅުވީ، މިސްކިތްތަކުގައި ވަކި ގޮތަކަށް އަމަލުކުރާކަށް އެޗްޕީއޭއިންވެސް އަދި އެހެން އިދާރާއަކުންވެސް މިހާތަނަށް އެއްވެސް އެންގުމެއް އަންގާފައިނުވާކަމަށެވެ.

ރަސްމީ އިދާރާއަކުން ވަކި ގޮތަކަށް އަމަލުކުރަން އަންގާފައިނުވިނަމަވެސް އިސްލާމިކް މިނިސްޓްރީން ގެންދަނީ މިސްކިތްތަކުގައި މާސްކު އެޅުން ތަންފީޒުކުރަން މަސައްކަތްތަކެއް ކުރައްވަމުން ކަމަށް މިނިސްޓަރ ވިދާޅުވިއެވެ. މިގޮތުން މިސްކިތަށް ވަންނަ މީހުންނަށް މާސްކު އަޅަން ބާރު އެޅުމަށް އިމާމުންނަށް އަންގާފައިވާކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ މި ދުވަސްވަރު އެހެނިހެން ކަންކަން ކުރުމަށް އެއްވެސް ހުރަހެއް ނެތް ކަމަށެވެ. އެހެންކަމުން ޖަމާއަތުގައި ނަމާދުކުރާއިރު، ގައިދުރުކަން ބަހައްޓައިގެން ނަމާދު ކުރުން ތަންފީޒުކުރުމަށް ދަތިވެލައްވާކަމަށް މިނިސްޓަރ ވިދާޅުވިއެވެ. އެހެންކަމުން މިވަގުތަށް ބާރު އަޅަމުންދަނީ މާސްކު އެޅުން ތަންފީޒުކުރުމަށް ކަމަށް މިނިސްޓަރ ވިދާޅުވިއެވެ.

އެޗްޕީއޭއިން އެންމެ ފަހުން އާންމުކުރި މައުލޫމާތުގައިވާގޮތުން ފާއިތުވި 24 ގަޑިއިރުގެ ތެރޭގައި މުޅި ރާއްޖެއިން 2،137 މީހުން ވަނީ ކޮވިޑް-10އަށް ޕޮޒިޓިވްވެފައެވެ. މީގެ ތެރެއިން މާލެ ސަރަހައްދުން 1،219 މީހަކު ޕޮޒިޓިވްފެވައިވާއިރު، އަތޮޅުތެރެއިން 547 މީހުން ވަނީ ޕޮޒިޓިވްވެފައެވެ. އަދި ރިސޯޓުތަކުން 89 މީހަކާއި، ސަފާރީތަކުން 4 މީހުންގެ އިތުރުން ޕޮޒިޓިވްވީ ކޮން ތަނަކުންކަން ދެނެގަނެވިފައިނުވާ 278 ކޭސް ހިމެނޭ ކަމަށް އެޗްޕީއޭއިން ބުނެފައިވެއެވެ.