މިހާތަނަށް ކޮވިޑް-19އާ ދެކޮޅަށް ކުރި ހުރިހާ މަސައްކަތެއް ފެނަށް ދިޔުމުގެ ބިރު އެބައޮތް
އދ.ގެ އާންމު މަޖިލީހުގެ ރައީސް އަބްދުﷲ ޝާހިދު
މި އާލަމީ ވަބާއަށް ނިމުމެއް ގެނައުމަށް އޮތް އެންމެ މުޖައްރިބު މަގަކީ އެންމެންނަށް ވެކްސިން ކަށަވަރުކޮށްދިނުން ކަމުގައިވީ ނަމަވެސް، ދުނިޔޭގެ އެކި ކަންކޮޅުތަކުގައި ވެކްސިން ލިބުމުގެ ތަފާތުކަން އޮންނަހާ ހިނދަކު މި ބަލިމަޑުކަން ދާނީ ކުރިއަށް ކަމަށް، އދ.ގެ އާންމު މަޖިލީހުގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ޝާހިދު މިކަމަށް ގޮވާލެއްވީ އދ.ގެ އާއްމު މަޖިލީހުގެ ޖަލްސާތައް މިއަހަރަށް ފެށުމަށް ބޭއްވި ފުރަތަމަ ބައްދަލުވުމުގައި، އެމަނިކުފާނު މިއަހަރު އިސްކަން ދެއްވާނެކަންކަމާ ބެހޭ ގޮތުން އާއްމު މަޖިލީހުގައި ތަޤްރީރުކުރައްވަމުންނެވެ. ޝާހިދު ވިދާޅުވީ އާ ވޭރިއެންޓުތައް ދާނީ ފެންމަތިވަމުން ކަމަށާއި، ބައެއް ވޭރިއެންޓުތައް ވަރަށް ނުރައްކާވެ، ނޫނީ އަޅުގަނޑުމެންގެ ވެކްސިންތަކަށް ނުކަތާވަރު ވެދާނެ ކަމަށެވެ. މީގެ ސަބަބުން މިހާތަނަށް ކޮވިޑް-19އާ ދެކޮޅަށް ކުރި ހުރިހާ މަސައްކަތެއް ފެނަށް ދިޔުމުގެ ބިރު އެބައޮތް ކަމަށާއި، މި ސައިކަލް ފުނޑުކޮށްލެވެން އޮތީ ހުރިހާ ހިސާބެއްގައި ދިރިއުޅޭ ހުރިހާ އެންމެންނަށް ވަގުތުން ވެކްސިން ލިބޭގޮތް ހަދައިގެން ކަމަށެވެ.
ޝާހިދު ވިދާޅުވީ މިހާރު މުޅި ބައިނަލްއަޤުވާމީ ޚަބަރުތަކުގެ ފަލަ ސުރުޚީން ޖާގަ ހޯދަނީ ކޮވިޑް-19ގެ ބަލިމަޑުކަން ކަމުގައި ވެދާނެ ކަމަށެވެ. ނަމަވެސް ހިތަށް ތަސައްލީއެއް ލިބިގެންދަނީ ކޮންމެ ބަލިމަޑުކަމެއް ވެސް ކޮންމެވެސް އިރަކުން ނިމެނޭކަން އެނގޭތީ ކަމަށެވެ. އަދި ކޮވިޑުން އަރައިގަތުމަށް އަމާޒު ހިފާފައި އޮތްއިރު، އަދަށްވުރެ ރަނގަޅު މާދަމާއެއް ބިނާކުރުމަށް ވެސް ސަމާލުކަން ދޭންޖެހޭ ކަމަށެވެ.
އެކަން ކުރާއިރު، ފުރަތަމަ އިސްކަމެއްގެ ގޮތުގައި ބަލަންވީ މި ބަލިމަޑުކަމުން އެންމެ ބޮޑަށް އަސަރުކޮށްފައިވާ ކޮމިއުނިޓީތައް ކަމަށް ޝާހިދު ވިދާޅުވިއެވެ. އޭގެތެރެއިން އެންމެ ގިނަ މީހުން ދިރިއުޅެނީ އެލްޑީސީ އާއި، އެލްއެލްޑީސީ އަދި އެސްއައިޑީ ޤައުމުތަކުގައި ކަމަށާއި، ބައިނަލްއަޤުވާމީ މުޖުތަމަޢުއަށް ގޮވާލަނީ، އެ ޤައުމުތަކުން ކޮވިޑް-19އިން އަރައިގަތުމަށް ކުރާ މަސައްކަތްތަކަށް ބާރުދީ، ފުނޑުފުނޑުވެފައިވާ އެމީހުންގެ އިޤްތިޞާދު އަލުން ބިނާކުރުމަށް އެހީވެދިނުމަށް ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ ހަނދާން ނައްތާލައިގެން ނުވާނެ ކަމަކީ މިއަދު އެކި ޤައުމުތަކުގެ މެދުގައި އޮތް އެއްބަސްވުމަކީ، މީގެ އަހަރުތަކެއް ކުރިން ހިނގައިދިޔަ ދެ ބޮޑު ހަނގުރާމައަށްފަހު އާދެވުނު އެއްބަސްވުމެއްކަމަށެވެ. އެ ހުރިހާ ކަމަކަށްފަހު އެންމެފަހުން ސުލްޙަވެރިކަމާއި އަމާންކަންމަތީ ދެމިތިބެވެން އޮތް ގޮތަކީ، އިންސާނިއްޔަތުކަމަށް ލޯބިކޮށް، ދެބަސްވުމާއި ކޯޅުންތަކަށް މަގުފަހިކުރާ ފަރާތްތަކާއި ކަންތައްތަކާ ދެކޮޅަށް ގާޑުކޮށްގެން ކަމަށާއި، އަދި މި ނޫން ގޮތަކުން ސަލާމަތެއް ނެތް ކަމަށް ޝާހިދު ވިދާޅުވިއެވެ.
