ފާއިތުވި ތިން އަހަރަކީ ޖުޑީޝަލް ސަރވިސް ކޮމިޝަން (ޖޭއެސްސީ)ގެ މަސައްކަތްތައް އެންމެ ފުރިހަމައަށް އަދާކުރެވުނު ތިން އަހަރުކަމަށް ޖޭއެސްސީން ބުނެފިއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅުދައްކަވަމުން ޖުޑީޝަލް ސަރވިސް ކޮމިޝަންގެ މެމްބަރު އަބްދުލް މާނިއު ހަސަން ވިދާޅުވީ ޖޭއެސްސީގެ މަސައްކަތްތަކުގެ ތެރެއިން ފާއިތުވި ތިން އަހަރުގެ މަސައްކަތަކީ ގާނޫނު އަސާސީގައި ބަޔާންކޮށްފައިވާ ގޮތަށް ޖޭއެސްސީގެ ދައުރު އެންމެ ފުރިހަމައަށް އަދާކުރެވުނު ތިންއަހަރު ކަމަށެވެ.

މިދިޔަ އަހަރަކީ އަންދާޒާ ކުރެވުނު ވަރަށްވުރެ ގިނަ މައްސަލަތަކެއް ޖޭއެސްސީއަށް ހުށަހެޅުނު އަހަރެއްކަން ފާހަގަކުރައްވާ މާނިއު ވިދާޅުވީ މިދިޔަ އަހަރުގެ ތެރޭގައި ރައްޔިތުންގެ ފަރާތުން އިންތިހާއަށް ގިނަ ޝަކުވާތަކެއް އެކޮމިޝަނަށް ހުށަހެޅިފައިވާ ކަމަށެވެ. އެގޮތުން މިދިޔަ އަހަރުގެ ތެރޭގައި އެކޮމިޝަނަށް 404 ޝަކުވާއެއް ހުށަހެޅިފައިވާކަމަށް މާނިއު ވިދާޅުވިއެވެ. އޭގެ ތެރެއިން 9 ޝަކުވާ ފިޔަވާ ބާކީ 374 ޝަކުވާއާމެދު ޖޭއެސްސީން ވަނީ ގޮތްނިންމާފައެވެ. އަދި ބާކީ 9 ޝަކުވާ މިހާރު ދިރާސާ ކުރަމުން އަންނަކަމަށް މާނިއު ވިދާޅުވިއެވެ.

މިދިޔަ އަހަރުގެ ތެރޭގައި ޖޭއެސްސީއަށް ހުށަހެޅުނު ޝަކުވާތަކުގެ 93 އިންސައްތަ ޝަކުވާއާ މެދު ގޮތް ނިންމިފައިވުމަކީ އެކޮމިޝަނަށް ހާސިލުކުރެވުނު ވަރަށް މުހިންމު ލަނޑުދަނޑިއެއްގެ ގޮތުގައި މާނިއު ފާހަގަކުރެއްވިއެވެ.

މާނިއު ވިދާޅުވީ ކުރިއާ ޚިލާފަށް ޝަކުވާތަކުގައި އޮންނަ ވާހަކަތަކަށް ބަލާލުމަށްފަހު މިހާރު ގޮތް ނުނިންމާ ކަމަށެވެ. އޭގެ ބަދަލުގައި ޝަކުވާއެއް ހުށަހެޅުމާއެކު ޝަކުވާ އިތުރަށް ދިރާސާކޮށް، އެޝަކުވާއަކާ ގުޅޭ ފަރާތްތަކާ ސުވާލުކޮށް އިތުރު މައުލޫމާތު ހޯދާކަމަށެވެ. އަދި ކޮމިޝަނަށް ހުށަހެޅޭ މައްސަލަތަކަށް ގޮތް ނިންމަނީ އެޝަކުވާ ތަހުގީގު ކުރުމަށްފަހު އެއީ ފަނޑިޔާރެއްގެ ސުލޫކީ މައްސަލައަކާ ގުޅުންއޮތް ކަމަކަށްވޭތޯ ބެލުމަށްފަހު ކަމަށެވެ.

ހަމައެހެންމެ ފާއިތުވި ތިން އަހަރު ތެރޭގައި ކޮމިޝަނަށް ހުށަހެޅޭ މައްސަލަތައް އަހަރަކަށްވުރެ އަހަރެއް އިތުރުވަމުން އަންނަކަން ފާހަގަކުރައްވާ މާނިއު ވިދާޅުވީ 2019 ވަނަ އަހަރު އެކޮމިޝަނަށް 114 މައްސަލައެއް ހުށަހެޅިފައިވާ ކަމަށެވެ. އަދި 2020 ވަނަ އަހަރު ޖޭއެސްސީއަށް ހުށަހެޅިފައިވަނީ 288 މައްސަލައެކެވެ. އެހެންކަމުން ކޮންމެ އަހަރެއްގެ މައްޗަށް އެކޮމިޝަނަށް ހުށަހެޅޭ މައްސަލަ ގާތްގަނޑަކަށް ދެގުނަ އިތުރުވަމުން އަންނަކަމަށް މާނިއު ފާހަގަކުރެއްވިއެވެ.

މާނިއު ވިދާޅުވީ 2008 ވަނަ އަހަރުން ފެށިގެން 2018 ވަނަ އަހަރާ ހަމައަށް އެކޮމިޝަނަށް ހުށަހެޅިފައިވާ މައްސަލަތަކުގެ އަދަދާ ފާއިތުވި 2021 ވަނަ އަހަރު ހުށަހެޅިފައިވާ މައްސަލަތަކުގެ އަދަދު ނުބައްދަލު ކަމަށެވެ. އަދި ޖޭއެސްސީއަށް ހުށަހެޅޭ މައްސަލަތަކުގެ އަދަދު ބޮޑުތަނުން އިތުރުވުމަކީ އެކޮމިޝަނަށް ހުށަހަޅާ މައްސަލަތައް ރަނގަޅަށް ބެލޭކަމުގެ އަލާމާތެއްކަމަށެވެ.

ޖެއެސްސީއަކީ ފަނޑިޔާރުންގެ ޝަކުވާތައް އެތަނަކަށް ހުށަހެޅި، ފަނޑިޔާރުންގެ ސުލޫކީ މައްސަލަތައް ބެލުމަށް ހެދިފައިވާ ކޮމިޝަނެކެވެ.