ބްރައިޓަން އަތުން ޗެލްސީއަށް ޕޮއިންޓެއް

އިނގިރޭސި ޕްރިމިއާ ލީގުގައި އަންގާރަ ދުވަހުގެރޭ ކުޅުނު މެޗުން ބްރައިޓަންއާ އެއްވަރުވެ، ޗެލްސީން ލީގުގެ ރޭހުގައި ކުރިއަށްދިޔުމަށް ހުރަސްތަކެއް ކުރިމަތިވެއްޖެއެވެ.

ބްރައިޓަންގެ ދަނޑުގައި ކުޅުނު މެޗު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ. މި މެޗުން ޗެލްސީ އެއްވަރުވިއިރު، ލީގުގައި އެންމެ ފަހުން ކުޅުނު ހަތަރު މެޗުގައިވެސް އެ ޓީމަށް މޮޅެއް ހޯދިފައެއް ނުވެއެވެ.

މި މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، މެޗުގެ 28 ވަނަ މިނެޓުގައި ޗެލްސީން ވަނީ ލީޑު ނަގާފައެވެ. އޭރިއާ ބޭރުން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ހަކީމް ޒިޔެކެވެ. އޭގެ ފަހުން ފުރަތަމަ ހާފުގައި ބްރައިޓަންގެ ފޯވާޑް ޑެނީ ވެލްބެކަށް ވަނީ ނަތީޖާ އެއްވަރުކުރަން ހުސް ފުރުސަތެއް ލިބި ބޭކާރުވެފައެވެ.

އަދި މި މެޗުގެ ދެވަނަ ހާފުގެ ކުރީކޮޅު ބްރައިޓަނުގެ ވެލްބެކަށް އިތުރު ފުރުސަތެއް ލިބުނު ނަމަވެސް، އޭރިއާ ތެރެއިން އޭނާ ފޮނުވާލި ހަމަލާ ދިޔައީ ގޯލާ އަމާޒުނުވެއެވެ. މި މެޗުގައި ބްރައިޓަނުން ނަތީޖާ އެއްވަރުކޮށްފައިވަނީ މެޗުގެ 60 ވަނަ މިނެޓުގައެވެ. އަލެކްސިސް މެކްއަލިސްޓާ ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން އެޑަމް ވެބްސްޓާއެވެ.

އޭގެ ފަހުން ލީޑު ނަގަން ބްރައިޓަނުގެ މެކަލިސްޓާއަށް ރަނގަޅު ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ ޗެލްސީގެ ގޯލްކީޕަރު ކެޕާ އަރިއްޒަބަލާގާ ވަނީ ދިފާއުކޮށްފައެވެ. އަދި މި މެޗުގެ ފަހުކޮޅު ޗެލްސީމް ގިނަ ބަދަލުތަކެއް ގެނެސްގެން ކުޅުނު ނަމަވެސް، އެ ޓީމުގެ ކުޅުންތެރިންނަށް މި މެޗުގައި އެންމެ އެދެވޭ ކުޅުމެއް ދެއްކިފައެއް ނުވެއެވެ.

މި ނަތީޖާއާއެކު ޗެލްސީ އޮތީ ތާވަލުގެ ތިންވަނައިގައި ކުޅުނު 23 މެޗުން ލިބުނު 44 ޕޮއިންޓާއެކުއެވެ. ތާވަލުގެ އެއްވަނައިގައި އޮތް އެންމެ ފަހުގެ ޗެމްޕިއަން މެންޗެސްޓާ ސިޓީއަށް 22 މެޗުން 56 ޕޮއިންޓް ލިބިފައިވާއިރު، ދެވަނައިގައި އޮތް ލިވަޕޫލަށް 21 މެޗުން ވަނީ 45 ޕޮއިންޓް ލިބިފައެވެ. އަދި ޗެލްސީއާ އެއްވަރުކުރި ބްރައިޓަން އޮތީ ނުވަވަނައިގައި 21 މެޗުން 29 ޕޮއިންޓާއެކުއެވެ.