ގްރެފިޓީ ފޮހެލުމުން "ނުހުއްޓުވޭނެ" ކަމަށް ބުނެ، އަނެއްކާވެސް ފުލުހުންނަށް ހުތުރު ބަސްތަކެއް
18 ޖެނުއަރީ 2022 | އަންގާރަ 11:23މާލެ ސަރަހައްދުގެ 27 ސަރަހައްދެއްގައި ހުރި ގްރެފިޓީތައް ނައްތާލާފައިވޭ
ފުލުހުންނަށް ހުތުރު ބަހުން ލިޔެފައިވާ އިބާރަތްތައް އަނެއްކާވެސް ވަނީ މާލޭގެ ބައެއް ސަރަޙައްދުތަކުގެ ފާރުތަކުގައި ލިޔެފައި
މާލެ ސިޓީގެ މަގުތަކާއި ފާރުތަކުގައި ހުރި ގްރެފިޓީތައް ނައްތާލުމުގެ މަސައްކަތް ކަމާގުޅުންހުރި އިދާރާތަކުން ކުރަމުންދަނިކޮށް، ގްރެފިޓީ ފޮހެލާފައިވާ ތަންތަނުގައި އަނެއްކާވެސް ލިޔުނު މައްސަލަތަކެއް ފެންމަތިވެއްޖެއެވެ.
ފުލުހުންގެ ޚިދުމަތާއި ސިފައިން އަދި މާލެ ސިޓީ ކައުންސިލުން ގުޅިގެން ފާރުތަކުގައި ހުރި ގްރެފިޓީތައް ނައްތާލުމުގެ މަސައްކަތް ކުރިއަށްދާއިރު، އެސަރަހައްދު މޮނިޓަރ ކުރުމަށް ސަލާމަތީ ބާރުތަކުން ހަރަކާތްތެރިވެއެވެ. އެގޮތުން ފުލުހުން މާލެ ސިޓީ ކައުންސިލަށް ހިއްސާކޮށްފައިވާ ލިސްޓެއްގެ ދަށުން މާލެ ސަރަހައްދުގެ 27 ސަރަހައްދެއްގައި ހުރި ގްރެފިޓީތައް ނައްތާލާފައިވީނަމަވެސް، ގިނަ އިރުތަކެއް ނުވެ އަނެއްކާވެސް އެ ތަންތަނުގައި ވަނީ ތަފާތު އެކި ލިއުންތައް ލިޔެފައެވެ.
އެކަމާ ގުޅޭގޮތުން މާލެ ސިޓީ ކައުންސިލުގެ މީޑިއާ އޮފިޝަލް ރާއްޖެއެމްވީއަށް ވިދާޅުވީ، އެކަން ސިޓީ ކައުންސިލުގެ ސަމާލުކަމަށް އައުމާއެކު، ފުލުހުންނަށްވެސް އެކަން ހިއްސާކޮށްފައިވާނެ ކަމަށެވެ. އަދި ގްރެފިޓީ ކުރަހާފައި ހުރި ތަންތަނުގައި އަލުން ކުލަލުމުގެ މަސައްކަތް ސިޓީ ކައުންސިލުން ކުރަމުންގެންދާނެ ކަމަށް އޭނާ ވިދާޅުވިއެވެ. މިފަދަ ކަންކަމުގައި ގާނޫނީ ގޮތުން އެޅޭނެ ފިޔަވަޅުތައް ބަލައި، އެކަން ކުރަމުން ގެންދާނެކަމަށް ފުލުހުން ބުނެފައިވާކަންވެސް ސިޓީ ކައުންސިލުން ފާހަގަ ކުރެއެވެ.
އާންމުވެފައިވާ ބައެއް ފޮޓޯތަކުން ފެންނަ ގޮތުގައި މާލޭގައި ހަރަކާތްތެރިވާ ނަން މަޝްހޫރު ގޭންގުތަކުގެ ނަންތަކާއި، ބައެއް ކުރެހުންތަކުގެ އިތުރުން، ފުލުހުންނަށް ހުތުރު ބަހުން ލިއެފައިވާ އިބާރަތްތައް އަނެއްކާވެސް ވަނީ މާލޭގެ ބައެއް ސަރަހައްދުތަކުގެ ފާރުތަކުގައި ލިޔެފައެވެ.
މާލެ ސިޓީގެ މަގު ފާރުތަކުގައި ހުރި ގްރެފިޓީތައް ނައްތާލުމުގެ މަސައްކަތް ހުކުރު ދުވަހުން ފަށައިގެން ކުރަމުންދާއިރު، މި މަސައްކަތުގެ ދަށުން މާލެ ސަރަހައްދުގެ ހުރިހާ ދިމާލެއްގައި ހުރި އެފަދަ ކުރެހުންތަކާއި ލިޔުންތައް ނައްތާލާނެ ކަމަށް ކައުންސިލުން ބުނެއެވެ. ކައުންސިލުން ބުނީ އެ މަސައްކަތަކީވެސް މާލޭގެ ރައްޔިތުންނަށް އަމާން ރައްކާތެރި ވެއްޓެއް ގާއިމްކޮށްދިނުމަށް ކުރަމުންދާ މަސައްކަތެއް ކަމަށާއި، މިމަސައްކަތުގައި އާއްމު ރައްޔިތުންގެ ފަރާތުން އެއްބާރުލުން ލިބޭ ކަމަށެވެ. އަދި ކުރިއަށް އޮތްތަނުގައި މަސައްކަތްފުޅާ ކުރާނެ ކަމަށާއި، ޝަކުވާއެއް އޮތްނަމަ ކައުންސިލްއާ ހިއްސާކޮށްދިނުމަށް އެދިފައިވެއެވެ.
