މިއަހަރު ފަތުރުވެރިކަމަށް 6000-8000 ދެމެދުގެ އަދަދަަކަށް އެނދު އިތުރު ކުރެވޭނެ - ޑރ. މައުސޫމް

މި އަހަރު ފަތުރުވެރިކަން 6000-8000 ދެމެދުގެ އަދަދަަކަށް އެނދު އިތުރު ކުރެވޭނެ ކަމަށް ޓޫރިޒަމް މިނިސްޓަރ ޑރ.އަބްދުﷲ މައުސޫމް ވިދާޅުވެއްޖެއެވެ.

ފަތުރުވެރިކަމުގެ ދާއިރާ ފުޅާކުރުމަށް ކުރައްވާ މަސައްކަތްތަކާ ގުޅިގެން ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަފުޅު ދައްކަވަމުން މިނިސްޓަރ ވިދާޅުވީ، ހަމަ އެކަނި ރިސޯޓް ތަކުންވެސް ދެހާހެއްހާ އެނދު އިތުރު ކުރެވިގެންދާނެ ކަމަށެވެ. އަދި ގެސްޓް ހައުސްތަކާއި ސަފާރީތަައް ހިމެނޭ ގޮތަށް ހަ ހާހާއި އަށްހާހާ ދެމެދުގެ އިނދު މިއަހަރު ފަތުރުވެރިކަމަށް އިތުރު ކުރެވިގެންދާނެ ކަމަށެވެ.

ރާއްޖޭގެ ފަތުރުވެރިކަަމަށް 50 އަހަރު ފުރިގެންދާއިރު މި ދާއިރާގައި ދުނިޔޭގެ އެންމެ އުހުގައި ހިފަހައްޓާލުމަށް އިތުރު މޮޑެލްތައް ތައާރަފް ކުރުމަށް ޕްލޭން ކުރެވިފައިވާ ކަމަށްވެސް ވިދާޅުވިއެވެ. އަދި މިހާރު ދޫކޮށް ނުހެދި ހުރި ރަށްތައް މި އަހަރުގެ ތެރޭގައި ހަދަން ފެށޭނެ ގޮތަށް މިހާރު ސިޔާސަތުތަކަށް ބަދަލު ގެނެވިފައިވާކަމަށް ވިދާޅުވިއެވެ. އެގޮތުން ހުރި ޖޫރިމަނާތަކަށް ލުއި ދީ، ރިސޯޓްތަރައްގީ ކުރުމަށް އެ ފަރާތްތަކަށް ތިން އަހަރުގެ މުހުލަތެއް ދީފައިވާނެ ކަމަށް ވިދާޅުވިއެވެ. މިނިސްޓަރ ވިދާޅުވީ، ތިން އަހަރު ތެރޭގައި ނުހެދޭނަމަ އެ ރަށްތައް އަނބުރާ ނަގާ ގޮތަށް އެއްބަސްވެފައިވާ ކަމަށެވެ.

ރިސޯޓްތައް ހެދުމަށް ދޫކޮށްފައިވާ ރަށްތަކާއި ހަވާލުކޮށްފައިވާ މީހުން އެނގޭ ގޮތަށް ތަފްސީލްތައް ވަރަށް އަވަހަށް އާއްމު ކުރައްވާނެ ކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ، އެއްވެސް ޕާޓީއަކާއެކު ހަދާފައިވާ އެއްބަސްވުމެއް ބާތިލް ކުރުމަކީ މިނިސްޓްރީގެ ވިސްނުމެއް ނޫން ކަމަށެވެ. އެހެންނަމަވެސް ރަށްތަކުގެ ފައިދާ ރައްޔިތުންނާ ދައުލަތަށް ލިބެންޖެހޭ ކަމަށެވެ.

ފަތުރުވެރިކަން ފުޅާ ކުރުމަށް އިންވެސްޓަރުން ހޯދުމަށް މި މަހު ވާރޗުއަލް އިންވެސްޓްމެންޓް ފޯރަމެއް ބޭއްވުމަށް މިހާރު ތައްޔާރުވަމުން އަންނަ ކަމަށް ވިދާޅުވިއެވެ. އެ ފޯރަމްގެ ތެރެއިން މިހާރު ދީފައި ހުރި ރަށްތައް އަދި ނުހެދި ހުރި ރަށްތައް އެކި މޮޑެލްގައި ޕްރޮމޯޓް ކުރަން އެ ރަށްތައް ގެންގުޅޭ މީހުންނާއެކު އެއްބަސްވެފައިވާކަމަށްވެސް ޓުއަރިޒަމް މިނިސްޓަރު ވިދާޅުވިއެވެ.

އިންޑަސްޓްރީއަށް އައު މޮޑުލްތައް ތައާރަފް ކުރުމަށް މަސައްކަތް ކުރާއިރު، ނުކުޅެދުންތެރިކަން ހުންނަ މީހުންނަށް ޚާއްސަ ކޮށްގެން ވެސް ފަތުރުވެރިކަން ޕްރޮމޯޓް ކުރުމުގެ މަސައްކަތް ކުރުމުގެ މުހިއްމުކަން މިނިސްޓަރ ފާހަގަކުރެއްވިއެވެ. މިނިސްޓަރ ވިދާޅުވީ، އެއީވެސް ބޮޑު މާކެޓެއް ކަމަށާއި، މި އަހަރުގެ މާސްޓަރ ޕްލޭންގައި އެކަން ހިމަނާފައިވާނެ ކަމަށެވެ. އަދި އަމާޒަކީ ހުރިހާ ކެޓެގަރީއަކަށް ފަތުރުވެރިކަން ހުޅުވާލުން ކަމަށެވެ.

ދިވެހިންގެ މެހުމާންދާރީއާއެކު އެންމެ މަގްބޫލް މަންޒިލްގެ ގޮތުގައި ރާއްޖެއަށް ދެމި އޮވެވޭނެ ކަމުގެ ޔަގީންކަން އެބައޮތް ކަމަށް މިނިސްޓަރ ވިދާޅުވިއެވެ. ސަގާފީ ފަތުރުވެރިކަމާއި، މިހާރު ތައާރަފްކުރާ ލޯންގް ސްޓޭ ނުވަތަ ރިއަލް އެސްޓޭޓް ޓުރިޒަމާއެކު ދާއިރާގެ އެންމެ އުހުގައި ހިފަހައްޓާލެވޭނެ ކަމުގެ ޔަގީންކަން އެބައޮތް ކަމަށް ޓުއަރިޒަމް މިނިސްޓަރު ޑރ. މައުސޫމް ވިދާޅުވިއެވެ.