ފީފާގެ މޮޅު ކުޅުންތެރިޔާގެ އެވޯޑް މި ފަހަރުވެސް ލެވަންޑޯސްކީއަށް

ދަ ބެސްޓް ފީފާ ފުޓްބޯލް އެވޯޑްސްގައި އަހަރުގެ އެންމެ މޮޅު ފިރިހެން ފުޓްބޯޅަ ކުޅުންތެރިޔާގެ އެވޯޑް ބަޔާން މިއުނިކަށް ކުޅެމުން އަންނަ ޕޮލެންޑުގެ ތަރި ރޮބަޓް ލެވަންޑޯސްކީ ހޯދައިފިއެވެ.

ލެވަންޑޯސްކީ މި ފަހަރުގެ މޮޅު ކުޅުންތެރިޔާގެ އެވޯޑް ހޯދީ ދާދި ފަހުން ހަތްވަނަ ފަހަރަށް ބަލޮންޑޯ އެވޯޑް ހާސިލުކުރި ޕީއެސްޖީއަށް ކުޅެމުން އަންނަ އާޖެންޓީނާގެ ތަރި ލިއޮނަލް މެސީ އާއި ލިވަޕޫލަށް ކުޅެމުން އަންނަ މިސްރުގެ ތަރި މުހައްމަދު ސަލާހާ ވާދަކޮށެވެ. އެގޮތުން ލެވަންޑޯސްކީއަށް 48 ޕޮއިންޓް ލިބުނުއިރު، ދެވަނައަށް ދިޔަ މެސީއަށް ލިބުނީ 44 ޕޮއިންޓެވެ. އަދި ސަލާހަށް ލިބުނީ 39 ޕޮއިންޓެވެ.

މި އަހަރުގެ އެވޯޑް ލެވަންޑޯސްކީ ހޯދިއިރު، މިދިޔަ އަހަރުގެ އެވޯޑުވެސް ހޯދާފައިވަނީ އޭނާއެވެ. މިދިޔަ އަހަރުގެ އެވޯޑް ލެވަންޑޯސްކީ ހާސިލުކޮށްފައިވަނީ މެސީ އާއި މެންޗެސްޓާ ޔުނައިޓެޑަށް ކުޅެމުން އަންނަ ޕޯޗުގަލުގެ ތަރި ކްރިސްޓިއާނޯ ރޮނާލްޑޯއާ ވާދަކޮށްގެންނެވެ.

ލެވަންޑޯސްކީ މިދިޔަ ސީޒަނުގައިވެސް ތަފާތު މޮޅު ކުޅުމެއް ދެއްކިއިރު، އޭނާ ވަނީ މިދިޔަ އަހަރު ޕޮލެންޑުގެ ގައުމީ ޓީމާއި ބަޔާނަށް މިދިޔަ އަހަރު 45 މެޗުން 51 ލަނޑު ޖަހާފައެވެ. އަދި މި ފަހުން ލެވަންޑޯސްކީ ވަނީ ޖަރުމަނުގެ ލެޖެންޑަރީ ފޯވާޑް ގާޑް މުލާގެ އެތަކެއް އަހަރުވީ ރިކޯޑުތަކެއް މުގުރާލާފައެވެ. އެގޮތުން މިދިޔަ އަހަރު ލެވަންޑޯސްކީ ވަނީ އެއް އަހަރު ތެރޭ ޖަރުމަން ލީގުގައި އެންމެ ގިނަ ގޯލު ޖަހައިގެން 1972 ވަނަ އަހަރު މުލާ ހެދި ރިކޯޑާއި، އެއް ސީޒަނެއްގައި އެންމެ ގިނަ ލީގު ގޯލު ޖަހައިގެން މުލާ ހަދާފައިވާ ރިކޯޑު މިދިޔަ ސީޒަނުގައި މުގުރާލާފައެވެ.

މީގެ އިތުރުން ދަ ބެސްޓް ފީފާ ފުޓްބޯލް އެވޯޑްސްގައި ހޮވި އެންމެ މޮޅު އަންހެން ފުޓްބޯޅަ ކުޅުންތެރިޔާގެ މަގާމު ހޯދީ ދާދި ފަހުން ބަލޮންޑޯ އެވޯޑް ހާސިލުކުރި ބާސެލޯނާއަށް ކުޅެމުން އަންނަ ސްޕެއިނުގެ މިޑްފީލްޑަރު އަލެކްސިއާ ޕުޓެއްޔަސްއެވެ. މީގެ އިތުރުން އެންމެ މޮޅު ފިރިހެން ކޯޗުގެ މަގާމަށް ޗެލްސީގެ ކޯޗު ތޯމަސް ޓުޗެލް ހޮވުނުއިރު، އެންމެ މޮޅު އަންހެން ކޯޗުގެ މަގާމަށް ހޮވުނީ ޗެލްސީ އަންހެން ޓީމުގެ އެމާ ހޭސްއެވެ.

އަދި އެންމެ މޮޅު ލަނޑަށް ދޭ ފީފާ ޕުސްކަސް އެވޯޑް މި ފަހަރު ލިބުނީ ޓޮޓެންހަމް ހޮޓްސްޕާގެ އެރިިކް ލަމޭލާއެވެ. މި ފަހަރުގެ ޕުސްކަސް އެވޯޑަށް ހޮވާފައިވަނީ އިނގިރޭސި ޕްރިމިއާ ލީގުގައި އާސެނަލާ ދެކޮޅަށް ލަމޭލާ ޖެހި ލަނޑެވެ. މި އެވޯޑުތަކުގެ އިތުރުން ފީފާގެ އެންމެ މޮޅު ސަޕޯޓަރުންގެ އެވޯޑާއި ފެއާ ޕްލޭ އެވޯޑް ލިބުނީ ޑެންމާކް ޓީމާއި ޑެންމާކްގެ މެޑިކަލް ޓީމުގެ އިތުރުން ޑެންމާކުގެ ސަޕޯޓަރުންނާއި ފިންލެންޑްގެ ސަޕޯޓަރުންނަށެވެ. މީގެ އިތުރުން ވަނީ ފީފާގެ އެންމެ މޮޅު ޓީމުގެ ގޮތުގައި ފީފާ ޕްރޯ އެލެވެންވެސް ވަނީ ހޮވާފައެވެ.

އަދި މި ފަހަރުގެ އެވޯޑް ހަފުލާގައި ވަނީ ރޮނާލްޑޯއަށް ފީފާގެ ޚާއްސަ އެވޯޑެއް ދީފައެވެ. އޭނާއަށް ފީފާއިން ހާއްސަ އެވޯޑެއް ދިނީ މިދިޔަ އަހަރު ދުނިޔޭގެ ފުޓްބޯޅައިގައި ގައުމީ ޓީމަށް އެންމެ ގިނަ ގޯލު ޖެހުމުގެ ރިކޯޑު ރޮނާލްޑޯ މުގުރާލުމުންނެވެ.

ދަ ބެސްޓް ފީފާ ފުޓްބޯލް އެވޯޑްސް ފެށުމަށްފަހު ފީފާއިން ގެނައި އެންމެ ބޮޑު ބަދަލަކީ ސަޕޯޓަރުންނަށް ވޯޓު ލެވޭ ގޮތް ހެދުމެވެ. ސަޕޯޓަރުންގެ ވޯޓު ނަގާފައިވަނީ މުޅި ދުނިޔެއިން ހޮވާލެވުނު 200 މީޑިއާއެއްގައި ސެޓް ކުރި ވޯޓިން ޕޯލްތަކުންނެވެ. ފީފާގެ އެވޯޑުގައި ދެން ވޯޓުލާފައިވަނީ ގައުމީ ޓީމުތަކުގެ ކޯޗުންނާއި ކެޕްޓަނުންގެ އިތުރުން ހޮވާލެވުނު ނޫސްވެރިންނެވެ.