އަހަރެން ނިކަމެތި ކުރުމަށް ވަރަށް ގިނައިން މަސައްކަތް ކުރި: ވިނީޝިއުސް

ފުޓުބޯޅަ ކެރިއަރުގައި ކުރިއަށް ދިޔުމަށް ކުރަމުން އަންނަ މަސައްކަތުގައި އޭނާ ދަށްކޮށްލުމާއި، ނިކަމެތި ކުރުމަށް ބަޔަކު ވަރަށް ގިނަ އިން މަސައްކަތް ކުރާ ކަމަށް، ރެއާލް މެޑްރިޑަށް ކުޅެމުން އަންނަ ބްރެޒިލްގެ ވިނީޝިއުސް ޖޫނިއާ ބުނެފި އެވެ.

އޭނާ މިހެން ބުނީ، ދުނިޔޭގެ ފުޓުބޯޅައިގެ މައި އިދާރާ (ފީފާ) އިން އަހަރުގެ މޮޅު ފުޓުބޯޅަ ކުޅުންތެރިޔާ އަށް ދެމުން އަންނަ އެވޯޑު ކާމިޔާބު ކުރުމަށްފަހު އެވެ. ޤަތަރުގެ ވެރި ރަށް، ދޯހާގައި ކުރިއަށް ދިޔަ އެވޯޑު ހަފުލާއި ވިނީޝިއުސް މޮޅު ކުޅުންތެރިޔާގެ އެވޯޑު ހޯދީ، ސްޕެއިންގެ ރޮޑްރީ އަދި އިންގްލެންޑުގެ ޖޫޑް ބެލިންހަމާ ވާދަކޮށެވެ.

އެވޯޑު ކާމިޔާބު ކުރުމަށްފަހު ވިނީޝިއުސް ބުނީ، އޭނާ އަކީ މީގެ ކުރިން އެތައް ލެޖެންޑުންނެއް އެ އެވޯޑު ކާމިޔާބު ކުރި މަންޒަރު ބެލި ކުޅުންތެރިޔެއް ކަމަށެވެ. ވިނީޝިއުސް ބުނީ އޭނާގެ ވަގުތު އައިސް ޖެހިއްޖް ކަމަށާއި، އޭނާ އަކީ ދުނިޔޭގައި ހުރި އެންމެ މޮޅު ކުޅުންތެރިޔާ ކަމަށެވެ. އަދި އެކަން ޙާސިލު ކުރުމަށްޓަކައި އޭނާ ވަރަށް ގިނަ އަދި ބުރަ މަސައްކަތް ކޮށްފައިވާ ކަމަށް ވެސް ވިނީޝިއުސް ވަނީ ބުނެފަ އެވެ.

މީގެ އިތުރުން ވިނީޝިއުސް ބުނީ އޭނާ ދަށްކޮލުމަށް ނުވަތަ ނިކަމެތިކޮށްލުމަށް ބަޔަކު ވަރަށް ގިނައިން މަސައްކަތް ކުރި ކަމަށެވެ. އެހެން ނަމަވެސް، އޭނާ ކުރިއަށް ދިޔުމުގައި ކުރަން ޖެހޭ ކަންތައްތަކާއި، ޙާސިލު ކުރަން ބޭނުންވާ ކަންކަން އެއިން އެއްވެސް މީހަކަށް ނުބުނެވޭނެ ކަމަށް ވިނީޝިއުސް ބުންޏެވެ. ވިނީޝިއުސް ބުނީ ސައޮ ގޮންސާލޯގައި އޭނާ އުޅުނުއިރު، އެތަނުގައި އޮތް ސިސްޓަމަށް އޭނާ ފިޓު ނުވާ ކަމަށާއި، އޭނާ އަށް ކުރިއަށް ދެވުނީ ކިރިޔަ ކިރިޔާ ކަމަށެވެ.

ފީފާ އެވޯޑަށް އިޝާރާތް ކުރަމުން ވިނީޝިއުސް ބުނީ އެއީ އޭނާގެ އަމިއްލަ ނަފުސުގެ އިތުރުން، އޭނާގެ އާއިލާއަށްޓަކައި ހޯދި އެވޯޑެއް ކަމަށެވެ. މިހާ ހިސާބަށް އައުމުގައި އޭނާ އަށް ވަރަށް ގިނަ ފަރާތްތަކެއްގެ އެހީތެރިކަން ލިބުނުކަން ވެސް ވިނީޝިއުސް ވަނީ ފާހަގަ ކޮށްފަ އެވެ. އެގޮތުން ބްރެޒިލްގެ ފްލެމެންގޯ، ރެއާލް މެޑްރިޑު އަދި ބްރެޒިލް ޤައުމީ ފުޓުބޯޅަ ޓީމުގެ ނަން އޭނާ ވަނީ ފާހަގަ ކޮށްފަ އެވެ. އަދި ފާއިތުވި އަހަރުތަކުގައި އޭނާ އާއެކު ޓީމުތަކުގައި ކުޅުނު ކުޅުންތެރިންނާއި، ކޯޗުން އަދި ކޮންމެ ދުވަހަކު އެކި ކަންކަމުގައި ވާހަކަ ދައްކާ އެހެނިހެން ފަރާތްތައް ހިމެނޭނެ ކަމަށް ވެސް ވިނީޝިއުސް ބުންޏެވެ.

ފީފާ އިން ހޮވާ އަހަރުގެ މޮޅު ކުޅުންތެރިޔާގެ އެވޯޑު ވިނީޝިއުސް އަށް ލިބުނުއިރު، ގިނަ ބަޔަކު ޤަބޫލުކޮށްގެން ތިބީ މިއަހަރުގެ ބެލެންޑިއޯ އެވޯޑު ވެސް ވިނީޝިއުސް އަށް ލިބޭނެ ކަށެވެ. ނަމަވެސް ވިނީޝިއުސްއާ ވާދަކޮށް ބެލެންޑިއޯ އެވޯޑު ރޮޑްރީ ހޯދިއިރު، ވިނީޝިއުސް އަށް އެވޯޑު ނުލިބުމުން ބައެއް ކުޅުންތެރިންނާއި ކޯޗުން ވަނީ އެކަމަށް ފާޑު ވެސް ކިޔައިފަ އެވެ. ބެލެންޑިއޯ އެވޯޑު ހަފުލާގައި ރެއާލް މެޑްރިޑުން ބައިވެރިނުވެ، އެވޯޑު ހަފުލާ ވަނީ ބޮއިކޮޓްކޮށްފަ އެވެ.