ސްކޫލްތަކުގައި ކިޔަވައިދޭ ޓީޗަރުންގެ ހިތްތަކުގައި ބިރުވެރިކަން އުފެއްދުމަށް ކުރިއަށްގެންދާ ހަރަކާތްތައް ބަލައި ނުގަންނަވާނެ ކަމަށް ރައީސުލްޖުމްހޫރިއްޔާގެ ނާއިބު ފައިސަލް ނަސީމް ވިދާޅުވެއްޖެއެވެ.

ނާއިބު ރައީސް މިފަދައިން ވިދާޅުވީ އިދިކޮޅު ޕީޕީއެމް ޕީއެންސީ ކޯލިޝަނުން ކުރިއަށްގެންދާ "އިންޑިއާ އައުޓް" ކެމްޕޭނަށް ރިއާޔަތްކުރައްވައެވެ. މި ކެމްޕޭން ފުރަތަމަ ފެށިއިރު އިދިކޮޅުން ގޮވާލަމުން ދިޔައީ އިންޑިއާ މިލިޓަރީ ރާއްޖެއިން ފެބުމަށެވެ. އެހެންނަމަވެސް މިހާރު އިދިކޮޅުން ގެންދަނީ އިންޑިއާ މީހުން ރާއްޖޭގައި ތިބުމާ ދެކޮޅަށްވެސް އަޑުއުފުލަމުންނެވެ. މިގޮތުން ދާދި ފަހުން ށ. ފުނަދޫ ސްކޫލްގެ ބޭރު ފާރުގައިވެސް "ސޭ ނޯ ޓު އިންޑިއަން" އަދި "އިންޑިއާ އައުޓް" މިހެން ޖަހާފައިވާތަން ފެންނަ ފޮޓޯއެއް ވަނީ ސޯޝަލް މީޑިއާގައި އާންމުވެފައެވެ. އަދި އިންޑިއާ މީހުންނަށާއި، އިންޑިއާ ޓީޗަރުންނަށް މަގުމަތިން ފުރައްސާރަކޮށް ބިރުދައްކާ މައްސަލަ ވަނީ ފެންމަތިވެފައެވެ.

މިފަދަ ދަނޑިވަޅެއްގައި ރާއްޖޭގެ 3 ރަށެއްގައި ސެޓެލައިޓް ސްކޫލް އިފްތިތާހުކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައި ނާއިބު ރައީސް ވިދާޅުވީ ދަތި އުނދަގޫ ދުވަސްވަރެއްގައި ރާއްޖޭގެ ސްކޫލްތަކުގައި ތައުލީމު އުނގަންނައިދިނުމުގައި މަސައްކަތް ކުރަމުންދާއިރު، ދެކެން ބޭނުން ނުވާ އެތައް ކަމެއް ފެންނަމުންދާކަމަށެވެ. އެކި ނަންނަމުގައި އެކި ގޮތްގޮތަށް ހިންގާ ހަރަކާތްތަކުގެ ތެރެއިން ގޮސް، ސްކޫލާ ހަމައަށް ދިއުމަކީ ވަރަށް ކަންބޮޑުވެވަޑައިގަންނަވާ ކަމެއް ކަމަށް ނާއިބު ރައީސް ފައިސަލް ވިދާޅުވިއެވެ.

އެކި ގޮތްގޮތުން ޓީޗަރުންގެ ހިތްތަކުގައި ނުތަނަވަސްކަން އުފެއްދުމަށްޓަކައި ކުރާ މަސައްކަތް ކުށްވެރިކުރައްވާ ކަމަށް ނާއިބުރައީސް ވިދާޅުވިއެވެ.

މީގެ އިތުރުން ސެޓެލައިޓް ސްކޫލަށް އަލިއަޅުވާލައްވައި ނާއިބު ރައީސް ވިދާޅުވީ މިއީ ޖަޒީރާ ތަރައްގީގެ މުޅިން އައު ފެށުމެއް ކަމަށެވެ. މި ޕްރޮގްރާމުގެ ސަބަބުން އަޅާނުލެވި ދޫކޮށްލެވިފައި އޮތް 3 ރަށުގެ ދަރިވަރުންނަށާއި ބެލެނިވެރިންނަށް އައު އުންމީދުތަކެއް ލިބިފައިވާކަމަށާއި، އެ ރަށްތަކުގެ ބެލެނިވެރިންނާއި ދަރިވަރުން އުފުލި ތަކުލީފު ހަނދާން އެބަހުރި ކަމަށް ނާއިބު ރައީސް ވިދާޅުވިއެވެ.

ނާއިބު ރައީސް ފައިސަލް ނަސީމް ވިދާޅުވީ މުޖުތަމައެއް ބިނާކުރުމުގެ އެންމެ މުހިންމު އެއްކަމަކީ ތައުލީމީ ނިޒާމު ވަރުގަދަކުރުން ކަމަށެވެ. މި ސަރުކާރުން ތައުލީމީ ނިޒާމު ފުޅާކުރުމަށް ގިނަ މަސައްކަތްތަކެއް ކުރަމުންދާ ކަމަށާއި، މިހާތަނަށް އައިއިރުވެސް ތައުލީމީ ނިޒާމާ ގުޅުންހުރި 40 ޕްރޮޖެކްޓެއް ނިންމާފައިވާކަމަށް ނާއިބު ރައީސް ވިދާޅުވިއެވެ. އަދި 50 ޕްރޮޖެކްޓު ކުރިއަށްދާކަމަށާއި، ކުރިއަށްވެސް ގިނަ ޕްރޮޖެކްޓުތަކެއް އެބަހުރި ކަމަށް ވިދާޅުވިއެވެ. އަދި ޓީޗަރުން ތަމްރީނުކުރުމާއި، ޕްރިންސިޕަލުން ތަމްރީނުކުރުމުގެ މަސައްކަތްވެސް ކުރިއަށްދާކަމަށް ނާއިބު ރައީސް ވިދާޅުވިއެވެ.

ސެޓެލައިޓް ސްކޫލް ގާއިމްކޮށްފައިވާ 3 ރަށަކީ ބ. ފެހެންދޫ، ވ. ރަކީދޫ އަދި ވ. ތިނަދޫއެވެ.