ސްޕެނިޝް ސުޕަ ކަޕް 12 ވަނަ ފަހަރަށް ރެއާލަށް
ބިލްބާއޯ އަތުން ރެއާލް މޮޅުވީ 2-0 ގެ ނަތީޖާއަކުން
ސްޕެނިޝް ސުޕަ ކަޕުގެ ތައްޓާއެކު ރެއާލުގެ ކުޅުންތެރިން އުފާފާޅުކުރަނީ
އެންމެ ފަހުގެ ޗެމްޕިއަން އެތުލެޓިކް ބިލްބާއޯ ބަލިކޮށް ރެއާލް މެޑްރިޑުން 12 ވަނަ ފަހަރަށް ސްޕެނިޝް ސުޕަ ކަޕް ކާމިޔާބުކޮށްފިއެވެ.
ސައުދީ އަރަބިއްޔާ މި ފަހަރުގެ މުބާރާތް ކުރިއަށްދިޔައިރު، އާދީއްތަ ދުވަހުގެރޭ ކުޅުނު ފައިނަލް މެޗުން ރެއާލް މޮޅުވީ 2-0 ގެ ނަތީޖާއަކުންނެވެ.
މި މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، މެޗުގެ ފުރަތަމަ ހާފުގައި ރެއާލުން ވަނީ ލީޑު ނަގާފައެވެ. މެޗުގެ 38 ވަނަ މިނެޓުގައި ރޮޑްރީގޯ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ލޫކާ މޮޑްރިޗެވެ. އަދި ދެވަނަ ހާފު ފަށައިގެން ހަތްވަނަ މިނެޓުގައި ލިބުނު ޕެނަލްޓީއަކުން ކަރީމް ބެންޒެމާ ވަނީ ރެއާލަށް ލީޑު ފުޅާކޮށްދީފައެވެ. މިއީ އޭރިއާ ތެރެއިން ބިލްބާއޯގެ ޔެރާއި އަލްވާރޭޒް އަތުގައި ބޯޅަ ޖެހުމުން، ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ދިން ޕެނަލްޓީއެކެވެ.
އޭގެ ފަހުން މެޗުގެ 86 ވަނަ މިނެޓުގައި ބިލްބާއޯއަށްވެސް ވަނީ ޕެނަލްޓީއެއް ލިބިފައެވެ. މިއީ އޭރިއާ ތެރެއިން ރެއާލުގެ އެޑާ މިލިޓާއޯގެ އަތުގައި ބޯޅަ ޖެހުމުން، ވީއޭއާރް ބެލުމަށްފަހު ދިން ޕެނަލްޓީއެކެވެ. އަދި އެއާއެކު ރެފުރީ ވަނީ އޭނާއަށް ސީދާ ރަތް ކާޑެއްވެސް ދައްކާފައެވެ. އެކަމަކު ބިލްބާއޯގެ ރައުލް ގާސިއާ ފޮނުވާލި ޕެނަލްޓީ ރެއާލުގެ ގޯލްކީޕަރު ތިބައޫ ކޯޓުއާ ވަނީ މަތަކޮށްފައެވެ.
މި މޮޅާއެކު ރެއާލުން 12 ވަނަ ފަހަރަށް ސްޕެނިޝް ސުޕަ ކަޕް ކާމިޔާބުކުރިއިރު، މިއީ އެ ޓީމުގެ ކޯޗުގެ މަގާމާ ކާލޯ އަންޗެލޮޓީ އަލުން ހަވާލުވުމަށްފަހު ހޯދި ފުރަތަމަ ކާމިޔާބީއެވެ. ސްޕެނިޝް ސުޕަ ކަޕުގެ އެންމެ ކާމިޔާބު ޓީމަކީ ބާސެލޯނާއެވެ. އެ ޓީމުން ވަނީ މިހާތަނަށް މި މުބާރާތް 13 ފަހަރު ކާމިޔާބުކޮށްފައެވެ.
