ރަށްތަކަށް އުންމީދު ގެނެސްދެއްވީ ރައީސް ސޯލިހު: މެމްބަރު ސަލީމް

ރަށްތަކަށް އުންމީދު ގެނެސް ރަށްވެހި ފަތިހަކަށް އަލުން އަލިވިލޭނެ ކަމުގެ އުފާވެރި ޚަބަރު ދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކަމަށް ހޯރަފުށީ ދާއިރާގެ މެމްބަރު އަހުމަދު ސަލީމް ވިދާޅުވެއްޖެއެވެ.

މެމްބަރު ސަލީމް މިހެން ވިދާޅުވީ ހޯރަފުށީގެ މަގު ހެދުމުގެ މަޝްރޫއުގެ އަމަލީ މަސައްކަތް ފެށުމަށް ބޭއްވި ޚާއްސަ ރަސްމިއްޔާތުގައި ވާހަކަދައްކަވަމުންނެވެ.

މެމްބަރު ސަލީމް ވިދާޅުވީ، އެތައް ޒަމާންތަކެއް ކުރިން އުންމީދާއެކު ދިރިއުޅެން ފެށި ވަޒަން ދޫކޮށް، ފުރުސަތު ބޮޑު އުންމީދު އޮތްތަންތަނަށް މީހުން ހިޖުރަކުރާ މިންވަރު ވަރަށް ބޮޑަށް އިތުރުވެފައިވާ ކަމަށާއި، އެ މަންޒަރު ރާއްޖޭގެ ހުރިހާ ހިސާބަކުން ފެންނަ ކަމަށެވެ. މިއަދު ރަށްރަށުގައި ތިބީ ކުޑަކުދިންނާއި، އުމުރުން ދުވަސްވީ މީހުން ކަމަށްވާއިރު، ގާބިލް ތައުލީމީ ބޭފުޅުން ރަށްރަށުގައި ދިރިއުޅޭލެއް މަދު ކަމަށް ސަލީމް ވިދާޅުވިއެވެ.

ދިރާސީ ރިޕޯޓުތަކުން ދައްކާ ގޮތުގައި، ރާއްޖޭގެ ބޮޑެތި ބައިބޯ އަތޮޅުތަކާއި ރަށްތަކުގެ 50 އިންސައްތައަށްވުރެ ގިނަ މީހުން ދިރިއުޅެނީ އެމީހުންގެ އަމިއްލަ ވަޒަނުގައި ނޫންކަން ފާހަގަކުރައްވައި މެމްބަރު ސަލީމް ވިދާޅުވީ، މިއަދުގެ ސަރުކާރުން މަސައްކަތް ކުރަނީ އެކަން ބަދަލު ކުރުމަށް ކަމަށެވެ. އެގޮތުން ރަށްރަށަށް އުންމީދު ގެނެސް ރަށްވެހި ފަތިހަކަށް ރަށްތައް އަލުން އަލިވިލޭނެ ކަމުގެ އުފާވެރި ޚަބަރު ދެއްވީ ރައީސް ސޯލިހު ކަމަށާއި، ރައްޔިތުންނަށް ވެވަޑައިގެންނެވި ވައުދު ފުއްދަވަމުން ގެންދަވާ ކަމަށް މެމްބަރު ސަލީމް ވިދާޅުވިއެވެ. އަދި ވިދާޅުވީ އެކަމަށް ސުވާލު އުފައްދާނެ އެއްވެސް ޖާގައެއް ނެތް ކަމަށާއި، ރާއްޖޭގެ ކޮންމެ ހިސާބަކުން ވެސް ތަރައްގީގެ މަޝްރޫއުތައް ކުރިއަށްދާތަން ފެންނަ ކަމަށެވެ.

ރާއްޖޭގެ ތަރައްގީއަށް އިޝާރާތް ކުރައްވައި މެމްބަރު ސަލީމް ވިދާޅުވީ، ތަރައްގީގެ ރޮނގުން ރާއްޖެ މިދާ ސްޕީޑުގައި މިއިން ޒަމާނެއްގައި ވެސް ދިވެހި ތާރީޚުން ފެނިފައިނުވާ ކަމަށެވެ. އަދި މަޝްރޫއުތައް ހިންގައި، ތަރައްގީ ގެނައުމަށް އެމްޓީސީސީ ކުރަމުންދާ މަސައްކަތްވެސް މެމްބަރު ސަލީމް ފާހަގަކުރެއްވިއެވެ.