މިނިސްޓަރު ވިދާޅުވީ ރަށްރަށުގެ މަޝްރޫއުތައް ނުހުއްޓޭކަމަށާއި، ފެނަކައިގެ މަޝްރޫއުތައް އެމްޑަބްލިއުއެސްސީއަށް ބަދަލު ކުރަމުންދާކަމަށް

ރަށްރަށުގެ މަޝްރޫއުތައް ނުހުއްޓޭކަމަށާއި، ނަމަވެސް ފެނަކައިން ހިންގަމުންދިޔަ މަޝްރޫއުތައް އެމްޑަބްލިއުއެސްސީއަށް ބަދަލު ކުރައްވަމުންދާކަމަށް ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.

މިނިސްޓަރު އެހެން ވިދާޅުވީ އަންގާރަ ދުވަހު މަޖިލިސް ޖަލްސާއަށް ހާޒިރުވެ ވާހަކަ ދައްކަވަމުންނެވެ. މިނިސްޓަރު މަޖިލީހަށް ހާޒިރުކުރީ ކެންދޫ ދާއިރާގެ މެމްބަރު މައުރޫފު ޒާކިރު ކުރެއްވި ސުވާލަކާއި ގުޅިގެންނެވެ.

މައުރޫފު ކުރެއްވި ސުވާލަކީ ބ. ދޮންފަނުގައި މިދިޔަ ސަރުކާރުން ފަށާފައިވާ ނަރުދަމާގެ މަސައްކަތުގެ އާރްއޯ ޕްލާންޓާއި އެޑްމިން ބިލްޑިން އަދި ޕަމްޕް ސްޓޭޝަންތަކުގެ މަސައްކަތް ހުއްޓިފައި ހުރީ ކީއްވެތޯ އާއި އެ މަސައްކަތް ފެށި ރައްޔިތުންނަށް ހިދުމަތް ދެވޭނީ ކޮންއިރަކުންތޯއެވެ.

އޭގެ ޖަވާބުގައި މިނިސްޓަރު ވިދާޅުވީ، އެ މަޝްރޫއުވެސް އެމްޑަބްލިއުއެސްސީއާ ހަވާލުކޮށްގެން ކުރިއަށް ގެންދިއުމުގެ މަސައްކަތް ކުރަމުންދާކަމަށެވެ.

މިނިސްޓަރު ވިދާޅުވީ، މިވަގުތު ފެނަކައާ ހަވާލު ކޮށްގެން ހިންގަމުންދާ މަޝްރޫއުތަކެއް އެމްޑަބްލިއުއެސްސީއާ ހަވާލު ކުރުމުގެ މަސައްކަތް ކުރަމުންދާ ކަމަށެވެ. އެގޮތުން ރާއްޖޭގެ 20 ރަށެއްގައި ފެނަކައިން ހިންގަމުންދިޔަ މަޝްރޫއުތައް އެމްޑަބްލިއުއެސްސީއާ ހަވާލު ކުރަން ނިންމާފައިވާ ކަމަށާއި، ވިހާވެސް އަވަހަށް އެމަރުހަލާ ނިންމުމަށް ނެޝަނަލް ޓެންޑަރ ބޯޑާ މަޝްވަރާ ކުރައްވަމުން ގެންދަވާކަމަށް ވިދާޅުވިއެވެ.

އޭގެ އިތުރުން، އެ މަޝްރޫއުތައް ބަދަލުކުރަނީ ފެނަކައަކީ އެ ބާވަތުގެ ކޮންޓްރެކްޓު މަސައްކަތް ހިންގާ ކޮންޓްރެކްޓަރަކަށް ނުވާތީ އާއި ހިދުމަތް ފޯރުކޮށްދޭ ސާވިސް ޕްރޮވައިޑާއަކަށް ވާތީކަމަށް މިނިސްޓަރު ވިދާޅުވިއެވެ. މިނިސްޓަރު އިތުރަށް ވިދާޅުވީ، އެ މަޝްރޫއުތައް ކުރިއަށް ގެންދާނީ މައިގަނޑު އެއް ޕްރޮޖެކްޓުގެ ގޮތުގައި ކަމަށެވެ. އެގޮތުން އެ މަޝްރޫއުތަކަށް ބިލިއަނެއްހާ ރުފިޔާ ޚަރަދުވާނެކަމަށް އެމްޑަބްލިއުއެސްސީން ހުށަހަޅާފައިވާ އަންދާސީ ހިސާބަށް ބަލާއިރު ލަފާ ކުރެވޭ ކަމަށް މިނިސްޓަރ ވިދާޅުވިއެވެ.