ސަރުކާރުން ބުނި ގޮތަށް ފަހު ކުއާޓާގައި ވެސް މަޝްރޫޢުތައް ނުފެށުމުން، ކުށްވެރިކުރީ ކުރީ ސަރުކާރު
28 އޮކްޓޯބަރު 2024 | ހޯމަ 11:10މީގެ އިތުރުން ޕެންޑިން ބިލުތަކެއް ހުރުމުން މަޝްރޫޢުތައް ހިންގަން ދަތިތަކެއް ކުރިމަތިވި ކަމަށް މުއްތަލިބު ވިދާޅުވި
ޑރ. އަބްދުﷲ މުއްތަލިބު
ފަހު ކުއާޓާގައި މަޝްރޫޢުތައް ފަށާނެކަމަށް ކުރިން ބުނުމަށް ފަހު، މަޝްރޫޢުތައް ކުރިއަށް ނުދަނީ ކުރީ ސަރުކާރުގެ ސަބަބުން ކަމަށް އަނެއްކާވެސް ސަރުކާރުން ބުނެފިއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ކޮންސްޓްރަކްޝަން މިނިސްޓަރު އަބްދުﷲ މުއްތަލިބުވަނީ ގިނަ މަޝްރޫޢުތައް ކުރިއަށް ނުދާކަމަށް އިއުތިރާފް ވެވަޑައިގަންނަވާފައެވެ. އެހެންނަމަވެސް އެކަން އެހެންވަނީ ކުރީ ސަރުކާރުގެ ސަބަބުން ކަަމަށް މިނިސްޓަރ ވަނީ ތަކުރާރުކޮށް ވިދާޅުވެފައެވެ. އެ ޕްރޮޖެކްޓުތައް ހިންގަން ބޭނުންވާ ފައިސާ ކުރީ ސަރުކާރުން ބަޖެޓުކޮށްފައި ނުވާ ކަމަށް މުއްތަލިބް ވިދާޅުވެފައިވާ އިރު މީގެ ކުރިން ސަރުކާރުން ބުނީ މި އަހަރުގެ ފަހު ކުއާޓާގައި މަޝްރޫއުތައް ފަށާނެ ކަަމަށެވެ. އެހެންނަމަވެސް މިހާރުވެސް ގިނަ ޕްރޮޖެކްޓްތައް ކުރިއަށް ދާ ކަމަށް އޭނާ ވަނީ ވިދާޅުވެފައެވެ. އޭނާ އެހެން ވިދާޅުވީ މަޝްރޫޢޫތައް ނުހިނގާތީ އާއްމުން ފާޑުކިޔަމުންދާ ދަނޑިވަޅެއްގައެވެ.
މުއްތަލިބް ވިދާޅުވީ ސޮއިކޮށްފައި ހުރި މަޝްރޫއުތައް ކުރިއަށް ގެންދިޔުމަށް ބޭނުންވާ ފައިސާގެ ތެރެއިން ބަޖެޓުގައި ހުރީ ބައިކުޅަ ބައި ފައިސާ ކަމަށެވެ. މީގެ އިތުރުން ޕެންޑިން ބިލުތަކެއް ހުރުމުން މަޝްރޫޢުތައް ހިންގަން ދަތިތަކެއް ކުރިމަތިވި ކަމަށް މުއްތަލިބު ވިދާޅުވި އެވެ. މިނިސްޓްރީ އަށް ޚަރަދު ކުރެވޭނީ ގާނޫނުގައިވާ ގޮތުން ބަޖެޓު ކަނޑައަޅާފައިވާ އަދި އެ ފައިސާ ލިބޭ މިންވަރަކުން ކަމަށް ވެސް އޭނާ ވަނީ ވިދާޅުވެފައެވެ. އެގޮތުން ދައުރު ފެށުނު އިރު ކޮންސްޓްރަކްޝަން މިނިސްޓްރީގައި ޕެންޑިން ބިލުގެ ގޮތުގައި 1.72 ބިލިއަން ރުފިޔާ ބިލުތައް އެބަ ހުރިކަމަށް މިނިސްޓަރ ވިދާޅުވިއެވެ. މަޝްރޫއުތައް ހިންގަން ބޭނުންވާ ފައިސާ ނެތް ކަމަށް ބުނެ، ބަޖެޓް ކޯޑަށް ބަދަލުގެންނަން ރައީސް ޑރ.މުހައްމަދު މުއިއްޒުގެ ސަރުކާރުން ކުރިން ނިންމިއެވެ. އޭގެ ފަހުން އެހެން އަމަލު ކޮށްގެން ވެސް މަޝްރޫޢުތައް ނުހިނގި ސަބަބު ސަރުކާރަށް ސާފުކޮށެއް ނުދެވެއެވެ.
