ވިލާއިން ޔުނައިޓެޑާ އެއްވަރުކުރިއިރު، ސިޓީއަށް 13 ޕޮއިންޓުގެ ލީޑެއް
ޗެލްސީ އަތުން ސިޓީ މޮޅުވީ 1-0 ގެ ނަތީޖާއަކުން
ވިލާ އާއި ޔުނައިޓެޑް ބައްދަލުކުރި މެޗުގެ ތެރެއިން
އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ކުޅުނު މެޗުން އެސްޓަން ވިލާއިން ފަހަތުން އަރައި މެންޗެސްޓާ ޔުނައިޓެޑާ އެއްވަރުކުރިއިރު، ޗެލްސީ ބަލިކޮށް އެންމެ ފަހުގެ ޗެމްޕިއަން މެންޗެސްޓާ ސިޓީން ތާވަލުގެ އެއްވަނައިގައި 13 ޕޮއިންޓުގެ ލީޑެއް ނަގައިފިއެވެ.
އަމިއްލަ ދަނޑުގައި ކުޅުނު މެޗުން ވިލާއިން ފަހަތުން އަރައި ޔުނައިޓެޑާ އެއްވަރުކުރީ 2-2 ގެ ނަތީޖާއަކުންނެވެ.
މި މެޗު ފަށައިގެން ހަވަނަ މިނެޓުގައި ޔުނައިޓެޑުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން ބޭންޑް އަޅައިގެން ކުުޅުނު ބްރޫނޯ ފެނާންޑޭސްއެވެ. އަދި މެޗުގެ 67 ވަނަ މިނެޓުގެ ފްރެޑުގެ އެހީތެރިކަމާއެކު ފެނާންޑޭސް ވަނީ ޔުނައިޓެޑަށް ދެ ލަނޑުގެ ލީޑެއް ނަގާދީފައެވެ.
އޭގެ މިނެޓެއް ފަހުން ވިލާއިން ވަނީ ބާސެލޯނާގެ ލޯނު އެއްބަސްވުމެއްގެ ދަށުން އެ ޓީމާ އަލަށް ގުޅުނު ފިލިއްޕޭ ކުޓީނިއޯ ކުޅެން އަރުވާފައެވެ. އެއާއެކު މެޗުގެ 77 ވަަނަ މިނެޓުގައި ކުޓީނިއޯ ތަނަވަސްކޮށްދިން ފުރުސަތަކުން ޖޭކަބް ރާމްސީ ވަނީ ވިލާއަށް ފަރަގު ކުޑަކޮށްދީފައެވެ. އަދި އޭގެ ފަސް މިނެޓު ފަހުން ރާމްސީ ދިން ބޯޅައަކުން ކުޓީނިއޯ ވަނީ ލަނޑެއް ޖަހައި، ވިލާއަށް ނަތީޖާ އެއްވަރުކޮށްދީފައެވެ.
މި މެޗުން މޮޅުވެގެން ތާވަލުގެ ހަވަނައަށް އެރުމުގެ ފުރުސަތު ޔުނައިޓެޑަށް އޮތް ނަމަވެސް، މެޗު އެއްވަރުވުމުން އެ ޓީމު އޮތީ ތާވަލުގެ ހަތްވަނައިގައި ކުޅުނު 20 މެޗުން ލިބުނު 32 ޕޮއިންޓާއެކުއެވެ. އަދި ޔުނައިޓެޑާ އެއްވަރުކުރި ވިލާ އޮތީ ތާވަލުގެ 13 ވަނައިގައި 20 މެޗުން 23 ޕޮއިންޓާއެކުއެވެ.
މީގެ އިތުރުން ލީގުގައި ހޮނިހިރު ދުވަހުގެރޭ ކުޅުނު މެޗުން ސިޓީ ވަނީ 1-0 ގެ ނަތީޖާއަކުން ޗެލްސީ ބަލިކޮށް ތާވަލުގެ އެއްވަނައިގައި 13 ޕޮއިންޓުގެ ލީޑެއް ނަގާފައެވެ.
ސިޓީގެ ދަނޑުގައި ކުޅުނު މި މެޗުގައި އެ ޓީމުން ގިނަ ހަމަލާތަކެއް އުފެއްދިއިރު، އެ ހަމަލާތަކުގެ ހުރަހަކަށްވީ ޗެލްސީގެ ގޯލްކީޕަރު ކެޕާ އަރިއްޒަބަލާގާއެވެ. އެކަމަކު މެޗުގެ 70 ވަނަ މިނެޓުގައި ސިޓީން ވަނީ ލީޑު ނަގާފައެވެ. އޭޜިއާ ބޭރުން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ކެވޮން ޑި ބްރޭނާއެވެ.
މި މޮޅާއެކު ތާވަލުގެ އެއްވަނައިގައި ސިޓީ އޮތީ 22 މެޗުން 56 ޕޮއިންޓާއެކުއެވެ. ދެވަނައިގައި އޮތް ޗެލްސީއަށް 22 މެޗުން ލިބިފައިވަނީ 43 ޕޮއިންޓެވެ. އަދި ތިންވަނައިގައި ލިވަޕޫލް އޮތީ 20 މެޗުން 42 ޕޮއިންޓާއެކުއެވެ.
