ރާއްޖޭގެ ފިރިހެން ވޮލީބޯޅަ ޓީމުން ބަންގްލަދޭޝް އާއި ދެކޮޅަށް ކުޅޭ އެކުވެރިކަމުގެ މެޗުތައް ކުރިޔަށް ދާނީ އަންނަ މަހުގައި ކަމަށް ކުޅިވަރާ ބެހޭ ވަޒީރު އަޙްމަދު މަޚްލޫފް ވިދާޅުވެއްޖެއެވެ.

މި މެޗުތައް ކުޅޭގޮތަށް ހަމަޖެހިގެން ދިޔައީ މިދިޔަ މަހު ވަޒީރު ބަންގްލަދޭޝަށް ކުރެއްވި ރަސްމީ ދަތުރުފުޅުގެ ތެރެއިންނެވެ.

ކުޅިވަރާ ބެހޭ ވަޒީރު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ ބަންގްލަދޭޝްގެ ގައުމީ ފިރިހެން ވޮލީ ޓީމާ ދެކޮޅަށް ރާއްޖޭން ކުޅޭ ތިން މެޗު އޮންނާނީ އަންނަ މަހުގެ 6-12 އަށް ކަމަށެވެ. އަދި މެޗު ކުޅެން އަންނާނެކަމުގެ ޔަގީންކަން ބަންގްލަދޭޝްގެ ވޮލީބޯޅަ ފެޑެރޭޝަންގެ ރައީސް އަދި ބަންގްލަދޭޝްގެ ވެރިރަށް ޑާކާގެ މޭޔަރު އަތީގުލް އިސްލާމް ދެއްވާފައިވާ ކަމަށެވެ.

ދާދި ފަހުން ބަންގްލަދޭޝްގައި ކުރިއަށްދިޔަ ސެންޓްރަލް ޒޯން ވޮލީބޯޅަ މުބާރާތުގައި ރާއްޖޭގެ އަންހެން އަދި ފިރިހެން ވޮލީބޯޅަ ޓީމު ވަނީ ވާދަކޮށްފަ އެވެ. އަންހެން އަދި ފިރިހެން ޓީމު ޑާކާގައި މުބާރާތަށް ގޮސް ތިބިއިރު، މަހުލޫފް ވަނީ ފޯނުން ގުޅުއްވައި، ޓީމަށް ހިތްވަރު ދިނުމުގެ އިތުރުން ސަރުކާރުގެ ފަރާތުން ވޮލީބޯޅަ އަށް އިތުރު ފުރުސަތުތައް ހޯދައިދޭން އިތުރު މަސައްކަތް ކުރައްވާނެ ކަމުގެ ޔަގީންކަން ދެއްވައިފައެވެ. އަދި ވޮލީބޯޅަ ކުރިއެރުވުމުގެ ގޮތުން ޓްރެއިނިންގ ކޭމްޕުތަކާއި، އެކުވެރިކަމުގެ މެޗުތައް ހޯއްދަވައިދެއްވާނެ ކަމަށް ވަޒީރު ވިދާޅުވިއެވެ.

މީގެ ކުރިން ވަޒީރުގެ ދައުވަތަކަށް ލަންކާގެ ގައުމީ ވޮލީބޯޅަ ޓީމު ވަނީ ދެ ފަހަރެއްގެ މަތިން ރާއްޖެ އައިސް އެކުވެރިކަމުގެ މެޗުތަކެއް ކުޅެފައެވެ. އެ ގޮތުން އެންމެ ފުރަތަމަ 2019 ވަނަ އަހަރުގެ އޮގަސްޓް މަހު ރާއްޖެ އައިއިރު، ދެ ވަނަ ފަހަރަށް އައީ މިދިޔަ ޑިސެމްބަރު މަހުގެ ކުރީކޮޅުގައެވެ. ލަންކާ ގައުމީ ޓީމުގެ އިތުރުން ޑިސެމްބަރު މަހު އިންޑިއާ ލީގުގައި ކުޅޭ ހައިދަރުއާބާދު ސްޕައިކާސް ވެސް ވަނީ ރާއްޖެ އައިސް ގައުމީ ފިރިހެން ޓީމާ ދެކޮޅަށް މެޗުތަކެއް ކުޅެފައިވެއެވެ.