ފުލުހުން ބުނަނީ، އަލީ ގެނައުމަށް އިނގިރޭސި ބަހުން ކޯޓު އަމުރެއް ހޯދަން 2 ފަހަރު އެދުނުކަމަށް، ނަމަވެސް ކޯޓުން އެކަން ދޮގުކުރޭ
އަޑުބަރޭ ވަނީ ކަން ހިނގި ގޮތް އަންގައި ކްރިމިނަލް ކޯޓަށްވެސް ސިޓީއެއް ފޮނުވާފައި
އަލީ ވަހީދު ރާއްޖެވަޑައިގަތުމަށް އެދުމުން އެކަމަށް އޭނާ ވަނީ އިންކާރުކުރައްވާފައި
ޖިންސީ ގޯނާގެ ގިނަ ދައުވާތަކެއް ރައްދުވާ ކުރީގެ ޓޫރިޒަމް މިނިސްޓަރު އަލީ ވަހީދު އެނބުރި ރާއްޖެ ގެނައުމަށް އިނގިރޭސި ބަހުން ކޯޓު އަމުރެއް ހޯދަން ދެފަހަރު ކްރިމިނަލް ކޯޓުގައި އެދިފައިވާނެކަމަށް ފުލުހުން ބުނެފިއެވެ.
އެކަމާ ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލު ވިދާޅުވީ، އިންޓަރޕޯލުން ބޭނުންވާ މައުލޫމާތަކާއި، އިނގިރޭސި ބަހުން ކޯޓު އަމުރެއް ހޯދުމަށް އެދި ނިމިދިޔަ ޑިސެމްބަރު މަހު ކްރިމިނަލް ކޯޓުގައި ސިޓީއަކުން އެދިފައިވާނެ ކަމަށެވެ. އަދި ނިމިދިޔަ ހަފުތާގައިވެސް އިތުރު ސިޓީއެއް ކޯޓަށް ފޮނުވާފައިވާނެ ކަމަށާއި، ނަމަވެސް މިހާތަނަށް ކޯޓު އަމުރު ލިބިފައިނުވާކަމަށް ފުލުހުންގެ މީޑިއާ އޮފިޝަލު ވިދާޅުވިއެވެ. އަދި ކޯޓު އަމުރުގެ އިނގިރޭސި ތަރުޖަމާއެއް ހޯދުމުގެ މަސައްކަތް ކްރިމިނަލް ކޯޓާ ގުޅިގެން ކުރަމުންދާކަމަށް އޭނާ ވިދާޅުވިއެވެ.
އެކަމާ ގުޅޭގޮތުން ރާއްޖެއެމްވީން ސުވާލު ކޮށްލުމުން ކްރިމިނަލް ކޯޓުގެ މީޑިއާ އޮފިޝަލް ވިދާޅުވީ، އަލީ ވަހީދު ބަންދުގައި ބަހައްޓައިގެން ކޯޓަށް ހާޒިރު ކުރުމަށް ކްރިމިނަލް ކޯޓުން ދިވެހި ފުލުހުންގެ ހިދުމަތުގެ މައްޗަށް އަމުރެއް ނެރެފައިވީނަމަވެސް، އެ އަމުރުގެ އިނގިރޭސި ތަރުޖަމާއެއް ހޯދުމަށް އެދި ފުލުހުންގެ ކިބައިން މައްސަލަ ބައްލަވާ ގާޒީއަށް ހުށައަޅުއްވާފައި ނުވާ ކަމަށެވެ. އެގޮތުން އިނގިރޭސި ތަރުޖަމާއާއި އިނގިރޭސި އަމުރަކަށް އެދި 13 ޖެނުއަރީއާ ހަމައަށްވެސް ފުލުހުންގެ ފަރާތުން އެދިފައިނުވާކަން ކޯޓުގެ މީޑިއާ އޮފިޝަލް ކަށަވަރު ކޮށްދެއްވިއެވެ.
އެ ދުވަހުގެ އަޑުއެހުމުގައި އަލީ ވަހީދު ދެން ޝަރީއަތަށް ހާޒިރު ކުރެވޭނީ ފުލުހުންގެ ބެލުމުގެ ދަށުން ބަންދުކޮށްގެން ކަމަށާއި، އޭނާ ޝަރީއަތަށް ހާޒިރުވެވަޑައިގަންނަވާނެ ކަމުގެ ޔަގީންކަންދީ އެކަމުގައި ޖާމިނުވި އަޑުބަރޭއާ މެދުވެސް އެ މޭރުމުން ފިޔަވަޅު އެޅުމަކީ، ގާނޫނީ ވެރިކަން ދެމެހެއްޓުމަށާއި ކޯޓުގެ ހުރުމަތް ރައްކާތެރި ކުރުމުގެ ގޮތުން ކޮންމެހެން ކުރަންޖެހޭ ކަމެއްކަމަށް ދެކިވަޑައިގަންނަވާ ކަމަށް ކޯޓުން ބުނެފައިވަނީ ނިމިދިޔަ އަހަރުގެ ނޮވެމްބަރު މަހުގެ 28 ވަނަ ދުވަހު ބޭއްވި އަޑުއެހުމުގައެވެ. އެގޮތުން އަލީ ވަހީދު އެނބުރި ރާއްޖެ ވަޑައިގަތުމަށް އަޑުބަރޭ އެދުނު ނަމަވެސް އަލީ ވަހީދު ވަނީ އެކަމަށް އުޒުރުވެރިވެފައެވެ.
ރާއްޖެއެމްވީއަށް އެނގިފައިވާ ގޮތުގައި ހަމަ އެދުވަހު އަޑުބަރޭ ވަނީ އަލީ ވަހީދަށް، އެނބުރި ރާއްޖެ ވަޑައިގަތުމަށް އީމެއިލް މެދުވެރިކޮށް އެދިފައެވެ. އޭގެ ޖަވާބުވެސް ހަމަ އެދުވަހު އަލީ ވަހީދު ވަނީ ސިޓީއަކުން ދެއްވާފައެވެ. އެ ސިޓީގައި އޭނާ ވަނީ މިވަގުތު ހުރީ އިނގިރޭސިވިލާތުގެ އިމިގްރޭޝަން ބަންދެއްގައިކަން ފާހަގަކޮށް، އެ މައުލޫމާތު 27 އޯގަސްޓުގައި ސިޓީއަކުން ކްރިމިނަލް ކޯޓަށްވެސް ހިއްސާ ކޮށްފައިވާނެ ކަމަށް ބުނެފައެވެ. އަދި އެ ގައުމުގެ އިޚްތިސާސުން ބޭރަށް ދެވޭނީ އޭނާ ބަންދު ކުރި މައްސަލައާއި އޭނާގެ ފަރާތުން ހުށައަޅާފައިވާ މައްސަލައަށް ގޮތެއް ނިމުމުންކަމަށްވެސް އަލީ ވިދާޅުވެއެވެ.
މި މައްސަލައިގައި އަލީ ވަހީދު ހާޒިރުވެވަޑައިގަތުމަށް އުޒުރުވެރިވާތީ އަޑުބަރޭ ވަނީ އެކަން އަންގައި ކްރިމިނަލް ކޯޓަށްވެސް ސިޓީއެއް ފޮނުވާފައެވެ. އެ ސިޓީގައި އޭނާ ވަނީ އޭނާ މި މައްސަލައިގައި ޖާމިނުވީ 4 މަަހަށް ކަމަށް ބުނެ، އެ މުއްދަތުގެ ތެރޭގައި އަލީ ވަހީދު ކޯޓަށް ހާޒިރުވެވަޑައިގަތުމަށް ކޯޓުން އެއްވެސް އެންގުމެއް އަންގާފައިނުވާކަމަށް ބުނެފައެވެ.
ކޯޓުގައި ހިނގަމުންދާ އެއްވެސް މައްސަލައަކާއި ގުޅިގެން ދައުވާލިބޭ ފަރާތް ދިވެހިރާއްޖޭގެ ސަރަހައްދުން ބޭރުގައި ވަނިކޮށް އޯޑިއޯ/ވީޑިއޯ ކޮންފަރެންސް މެދުވެރިކޮށް ޝަރީއަތް ކުރިއަށް ނުގެންދެވޭނެ ކަމަށް 4 ނޮވެމްބަރު 2021ގައި ސުޕްރީމް ކޯޓުން ކްރިމިނަލް ކޯޓުގެ މައްޗަށް އަމުރެއް ނެރެފައިވެއެވެ. ނަމަވެސް އޮންލައިންކޮށް އަލީ ވަހީދު އަޑުއެހުންތަކުގައި ބައިވެރިވެވަޑައިގަތް މައްސަލާގައި، ސުޕްރީމް ކޯޓުގެ އެންގުމާއި އެއްގޮތަށް އޭނާ ކޯޓަށް ހާޒިރުވެފައިނުވާތީ ކޯޓުން ވަނީ އަލީ ވަހީދުގެ މައްޗަށް 2 މަހާއި 12 ދުވަހުގެ ޖަލު ހުކުމެއްވެސް އިއްވާފައެވެ.
