އެއަރޕޯޓުގައި މަސައްކަތްކުރާ ޓޫރިސްޓު ރެޕުންނަށް ފަސޭހަކަމާއެކު ބޫސްޓަރ ޑޯޒު ޖެހޭނެ އިންތިޒާމު ހަމަޖައްސައިފިއެވެ.

މި އިންތިޒާމު ހަމަޖައްސާފައިވަނީ މިނިސްޓްރީ އޮފް ޓޫރިޒަމްއާއި މޯލްޑިވެސް އެއަރޕޯޓް ކޮމްޕެނީ ލިމިޓެޑް ގުޅިގެންނެވެ. އެއަރޕޯޓުގައި މަސައްކަތްކުރާ ޓޫރިސްޓު ރެޕުންނަށް ފަސޭހަކަމާއެކު ބޫސްޓަރ ޑޯޒް ޖެހޭނެ އިންތިޒާމުތައް ހަމަޖައްސާފައި މިވަނީ އެފަރާތްތަކަކީ ރާއްޖެއަށް ދަތުރުކުރާ ފަތުރުވެރިންނާ އެންމެ ގާތުން މަސައްކަތް ކުރާނެ ފަރާތްތައް ކަމަށްވާތީއެވެ.

މި ފަރާތްތަކުގެ ތެރެއިން ބޫސްޓަރ ޑޯޒް ޖެހޭނީ ކޮންމެ ދުވަހަކުވެސް އެދުވަހަށް ކަނޑައަޅާފައިވާ އެއަރޕޯޓް ރެޕުންނަށެވެ. ވެކްސިން ޖެހުން އޮންނާނީ ކޮންމެ ދުވަހެއްގެވެސް ހެނދުނު 09:00ން 11:00ށެވެ. ވެކްސިން ޖަހަން ދާއިރު ހުރިހާ ފަރާތްތަކުންވެސް ރެޕް ކާޑާއި، އައިޑީ ކާޑުގެ އިތުރުން ވެކްސިން ކާޑު ގެންދިއުމަށް މިނިސްޓްރީން ވަނީ އެދިފައެވެ.

އެއަރޕޯޓް ރެޕުންގެ އިތުރުން އެއަރޕޯޓްގައި މަސައްކަތްކުރާ މުވައްޒަފުންނަށްވެސް ފަސޭހައިން ވެކްސިން ޖެހޭނެ އިންތިޒާމް އެމްއޭސީއެލްއިން ވަނީ ހަމަޖައްސާފައެވެ.

ކޮވިޑް-19ގެ ވެކްސިނެއްގެ 2 ޑޯޒް ފުރިހަމަކޮށް 6 މަސް ވެފައިވާ 18 އަހަރުން މަތީގެ އެންމެންނަށް ކޯވިޑް-19 ވެކްސިންގެ ބޫސްޓަރ ޑޯޒް ޖެހޭނެއެވެ. ބޫސްޓަރ ޑޯޒްގެ ގޮތުގައި ދޭން ނިންމާފައިވަނީ ފައިޒަރ ވެކްސިނެވެ. ރާއްޖޭގައި ބޫސްޓަރ ޑޯޒް ޖަހަން ފަށާފައި މިވަނީ، ކޮވިޑްގެ އައު ވޭރިއެންޓް އޮމިކްރޮން ރާއްޖެއިން ފެނި، ކޯވިޑަށް ގިނަ ބަޔަކު ޕޮޒިޓިވްވަމުންދާ ދަނޑިވަޅެއްގައެވެ.