ތ. ތިމަރަފުށީގައި ހަރުކަށި ފިކުރުފަތުރާ، ހަމަލާދޭން އުޅުނު ކަމުގެ ތުހުމަތުކުރެވޭ މީހުންގެ ޝަރީއަތުގެ އަޑުއެހުމެއް ހޮނިހިރު ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި ހިމެނޭ މީހުންނަކީ ތ. ތިމަރަފުށި، ފެހިވިދުވަރުގެ، އަބްދުﷲ ޝަރީފް އާއި، ތ. ތިމަރަފުށި، ކެނެރީގެ، ޢަލީ މުނީޒު އާއި ތ. ތިމަރަފުށި، އަސުރުމާގެ، މުޙައްމަދު އާޞިރު އާއި، ތ. ތިމަރަފުށި، އަސްރަފީވިލާ، އަޙްސަން މުޙައްމަދު އާއި، ރ. މަޑުއްވަރި، ބީޗްހައުސް ޢަބްދުﷲ ޢިމާދު އާއި، ތ. ތިމަރަފުށި، ސައިމާ، ޝަމާޚު ޝަރީފް އާއި، ނ. ކުޑަފަރި، ރޯޒްމީޑު، އިބްރާހިމް ލޫޠު، އަދި ރ. ކަނދޮޅުދޫ، ފެހިވިލާ، ޢަލީ އަރުހަމް މުޙައްމަދުއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.
މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ ނިމިދިޔަ ޑިސެމްބަރު މަހުގެ 14 ވަނަ ދުވަހުއެވެ. އެ ދުވަހުގެ އަޑުއެހުމުގައި ގާޒީ ވަނީ ދައުލަތުން މި މައްސަލައިގައި ހެކި ރައްކާތެރި ކުރުމުގެ އަމުރަކަށް އެދި ފޯމެެއް ހުށައަޅާފައިިވީނަމަވެސް، ދިފާއަށް އެކަމާ ގުޅޭ ލިޔެކިއުން ފޯރުކޮށްދިނުމަށްފަހު، ފޯމާމެދު ގޮތެއް ނިންމެވުމަށް ނިންމަވާފައެވެ. ގާޒީ ވަނީ ފޯމުގައި ސިއްރު ކުރަން ބޭނުންވާ މައުލޫމާތުތައް ސިއްރުކޮށް، ދިފާއާ ހިއްސާ ކުރެވޭ މިންވަރަށް ފޯމު އިސްލާޙު ކުރުމަށްފަހު ހުށައެޅުއްވުމަށް އެދިވަޑައިގެންފައެވެ. އަދި ދެން އޮންނަ އަޑުއެހުމެއްގައި ހެކި ރައްކާތެރި ކުރުމާމެދު ގޮތެއް ނިންމަވާނެކަމަށް އޭރު ގާޒީ ވިދާޅުވިއެވެ.
އޭގެ އިތުރުން، ދައުވާލިބޭ އަލީ އަރުހަމަށް ވަކީލަކު އައްޔަނު ކުރުމަށް 10 ދުވަހުގެ މުއްދަތެއްވެސް އޭރު ދެއްވާފައިވެއެވެ. ނަމަވެސް ހޮނިހިރު ދުވަހުގެ އަޑުއެހުމާއި ހަމައަށްވެސް ވަކީލަކު ހަމަޖެހިފައިނުވާތީ އޭނާ ވަނީ އަދި އިތުރު ވަގުތު ބޭނުންވާކަމަށް ބުނެފައެވެ. އޭނާއަށް ވަކީލަކު އައްޔަނު ކުރުމަށް ގާޒީ ވަނީ އިތުރު ފުރުސަތެއްވެސް ދެއްވާފައެވެ.
ދައުލަތުން ހުށައަޅާފައިވާ ހެކި ރައްކާތެރި ކުރުމުގެ ފޯމާއިމެދު ދެފަރާތުން ވަނީ ހޮނިހިރު ދުވަހުގެ އަޑުއެހުމުގައި ވާހަކަ ދައްކާފައެވެ. އެގޮތުން ދައުލަތުގެ ވަކީލު ވިދާޅުވީ، މި މައްސަލައިގައި ހިމެނޭސިއްރު ހެކިން ތަހުގީގަށް ދީފައިވާ ބަޔާންސިއްރުކޮށްދިނުމަށް އެދޭ ކަމަށާއި، ސަބަބަކީ އެ ލިއުންތައް ދޫކޮށްފިނަމަ ސިއްރު ހެކިންގެ މައުލޫމާތު ހާމަވެދާނެތީ ކަމަށެވެ. އަދި ސިއްރު ހެކިންގެ ގޮތުގައި ހުށައަޅާފައިވާ ހެކިވެރިން ތައްޔާރުކޮށްފައިވާރިޕޯޓުތަކަކާއި ތަރުޖަމާތަކެއްވެސް(އިސްލާމިކް މިނިސްޓްރީން ތައްޔާރު ކޮށްފައިވާ) ސިއްރު ކޮށްދިނުމަށް ދައުލަތުން އެދިފައިވެއެވެ.
އެ ރިޕޯޓުތަކުގެ ތެރޭގައި އައިސިސް ޖަމާއަތުން ދިވެއްސަކު އަމީރެއްގެ ގޮތުގައި އައްޔަނު ކޮށްފައިވާކަން ބަޔާންކޮށްފައިވާ ލިއެކިއުމެއްވެސް ހިމެނޭއިރު، އެ ސަބަބަށް ބަލައި، ބައެއް މައުލޫމާތުތައް އުނިކުރުމަށްފަހުވެސް ދިފާއަށް ލިއެކިއުންތައް ހަވާލު ކުރުމަށް ދައުލަތުން ދެކޮޅު ހަދައެވެ. އެގޮތުން ރިޕޯޓުތަކުގައި ވާ ނަންތައް އުނިކުރުމަށްފަހު، ކޯޓުން ކަނޑައަޅާ ޝަރުތުތަކަަކާއެކު، ރިޕޯޓު ތައްޔާރުކުރި މީހުން ނޭނގޭ ގޮތަށް ޝަރީއަތް މެދުވެރިކޮށް ދިފާއަށް ދިރާސާ ކުރެވޭނެ ގޮތް ހެއްދެވުމަށް ދައުލަތުން އެދެއެވެ. އެ ސިޓީއަކީ ދައުވާލިބޭ ފަރާތެއްގެ ފޯނުން ހޯދާފައިވާ ސިޓީއެކެވެ.
ހަމައެއާއެކު،މައްސަލައިގެ ތަހުގީގު ބަޔާންވެސް އެއްކޮށް ސިއްރު ކޮށްދިނުމަށް އެދިފައިވާއިރު، ހެކި ރައްކާތެރި ކުރުމަށް ދައުލަތުން އެދިފައިވާ ގޮތަކީ، ބަޔާންތައް ސިއްރުކޮށް، އެއީ ކޮން ހެކިންތަކެއްކަން ނޭނގޭ ގޮތަށް ހެކިބަސް ނެގުމެވެ. އަދި ތަހުގީގަށް ހުރަސް އެޅުމުގެ އިހުތިމާލް އޮތުމާއެކު، އައިއީޑީ ތައްޔާރު ކުރުމާއި ގުޅޭ މައުލޫމާތުތައް ބަޔާންކޮށް ތައްޔާރުކޮށްފައިވާއެނެލިޓިކަލް ރިޕޯޓުތަކެއްސިއްރު ކޮށްދިނުމަށްވެސް ދައުލަތުން އެދެއެވެ.
އަދި ފުލުހުން މިފަދަ އޮޕަރޭޝަންތައް ހިންގުމުގެ އުކުޅުތައް ހާމަވެދާނެ ސަބަބެއްގެ ގޮތުގައި ފާހަގަކޮށް ދައުލަތުން ވަނީފުލުހުންގެ އިންޓެލިޖެންސް ރިޕޯޓުވެސް ސިއްރުކޮށްދިނުމަށް އެދިފައެވެ. މި ރިޕޯޓުތައް ޝަރުތުތަކަކާއެކު ޝަރީއަތް މެދުވެރިކޮށް ބެލޭނެ ގޮތް ހެދުމަށް ދައުލަތުން އެދެއެވެ. ނަމަވެސް ގާޒީވެސް ވަނީ ތަކުރާރުކޮށް، އިންޓެލިޖެންސް ރިޕޯޓު ޝަރީއަތަށް އައިސް ބެލުމާއި، ވަކީލުންގެ އަތަށް ދޫކުރުމާމެދު އޮތް ފަރަޤަކީ ކޮބައިތޯ ސުވާލު ކުރައްވާފައެވެ. އެކަމާއި ގުޅޭގޮތުން ދައުލަތުގެ ވަކީލު ވިދާޅުވީ، އިންޓެލިޖެންސް ރިޕޯޓުތަކަކީ އޭގެ ޒާތުގައި މުޖުތަމައަށް ސިއްރުކޮށްފައި އޮންނަ އެއްޗެއް ކަމަށާއި، އެ ނަކަލު ކުރުމަށްފަހު ދޫކޮށްފިނަމަ މުޖުތަމައަށް ބޭރުވުމުގެ ފުރުސަތު އެބައޮތް ކަމަށެވެ. އަދި ވަކި ޝަރުތުތަކަކާއެކު ކޯޓަށް އައިސް ބެލޭނެ އިންތިޒާމު ހަމަޖެއްސުމަށް ދައުލަތުން އެދުނީވެސް ދިފާއާއި، ދައުލަތުގެ ޙައްޤުތައް ހަމަހަމަކޮށް، ބެލެންސް ކުރުމުގެ މަޤްސަދުގައިކަން ދައުލަތުގެ ވަކީލު ފާހަގަ ކުރެއްވިއެވެ.
"މި ޑޮކިއުމަންޓު ތަކަކީ މުޖުތަމައުގެ ތެރޭގައި ބޭނުންހާ ތަނަކަށް ގެންދެވި، ނަކަލު ކުރެވޭނެ އެއްޗެއް ނޫންކަމަށް ދައުލަތުން ދެކެން" ދައުލަތުގެ ވަކީލު ވިދާޅުވިއެވެ.
އެހެންނަމަވެސް ދިފާއީ ވަކީލު ވަނީ ދައުލަތާއި ދިފާއީ ވަކީލުންވެސް ތިބެނީ ހުވައެއް ކޮށްގެންކަން ފާހަގަ ކުރައްވައި، ދިފާއަށް އިންޓެލިޖެންސް ރިޕޯޓު ދޫކޮށްފިނަމަ މުޖުތަމައަށް ލީކުކޮށް، މީޑިއާތަަކަށް ދީ، އެ ރިޕޯޓުތައް ލީކުވެގެންދާނެކަމަށް ދެކުމަކީ ކަންބޮޑުވާކަމެއްކަން ފާހަގަ ކުރައްވާފައެވެ.
ބޭރުގެ އިންޓެލިޖެންސް ރިޕޯޓެއްވެސް ހެކީގެ ގޮތުގައި ހިމެނޭއިރު، ހެކި ޝަރުއީ މަރުޙަލާގައި ބޭނުން ކުރެވޭނެ ގޮތް ވަންދެން އެ ހެކިތައް ހާމަ ނުކުރުމަށް ދައުލަތުން އެދެއެވެ. އެއީ ބޭރުގެ އިންޓެލިޖެންސް އިދާރާއަކުން ތައްޔާރުކޮށްފައިވާ ލިއުމެއް ކަމަށްވާތީ ޝަރީއަތަށް ހިއްސާ ކުރެވޭ މިންވަރަށް ހިއްސާ ކުރުމަށެވެ. ޕީޖީ އޮފީހުން މިހާރު ވަނީ ފުލުހުން މެދުވެރިކޮށް އެ ރިޕޯޓު ހޯދުމުގެ މަސައްކަތް ފަށާފައެވެ.
ހެކި ރައްކާތެރި ކުރުމާއި ގުޅޭ ޖުމުލަ 63 ހުށައެޅުމެއް ދައުލަތުން ވަނީ ހުށައަޅާފައެވެ.
އެހެންނަމަވެސް، ދިފާއީ ވަކީލުންވަނީ ދިފާއު ބިނާ ކުރުމަށްޓަކައި ތަހުގީގު ބަޔާންތައް ކޮންމެހެން ބޭނުންވާކަމަށް ފާހަގަކޮށްފައެވެ. އެގޮތުން ބަޔާންތަކުގައި ހިމެނޭ މީހުންގެ ޒާތީ މައުލޫމާތުތައް އުނިކުރުމަށްފަހު، އެ ބަޔާންތައް ލިބޭނެ ގޮތް ހައްދަވައިދެއްވުމަށް ދިފާއީ ވަކީލުން އެދެއެވެ. އަދި ޝަރީއަތުން ކަނޑައަޅާ ޝަރުތުތަކާއެކު ކޯޓަށް ގޮސް އަބަދު ލިއެކިއުންތައް ބަލަން ޖެހުމަކީވެސް ދަތިވާ ކަމެއްކަމަށް ދިފާއުން ފާހަގަ ކުރެއެވެ.
ދިފާއީ ވަކީލުން ވަނީ މި މައްސަލައިގެ ލިއެކިއުންތައް ލިބިފައިވަނީވެސް ނުހަނު ލަހުންކަން ފާހަގަކޮށްފައެވެ. އަދި ލިއެކިއުންތައް ދިރާސާ ކޮށްލުމަށް ފުރުސަތެއް ނުލިބި، ދައުލަތުގެ ހުށައެޅުމަކާއި ގުޅޭގޮތުން ވާހަކަ ދައްކާނީ ކިހިނެއްތޯ ވަކީލު ސުވާލު ކުރެއްވިއެވެ. ނަމަވެސް ގާޒީ ވަނީ މި މަރުޙަލާއަކީ ލިއެކިއުންތައް ހަމަ ކުރުމާއި ގުޅޭ މަރުޙަލާކަމަށްވުމުން، ލިއެކިއުންތައް ހޯދުމުގެ މަސައްކަތް މި މަރުޙަލާގައި ކުރެވޭނެކަމަށް ވިދާޅުވެފައެވެ.
މައިގަނޑު ގޮތެއްގައި ދިފާއީ ހުރިހާ ވަކީލުންވެސް ވަނީ ތަހުގީގު ބަޔާންތައް ދިފާއަށް ހިއްސާ ކުރެވެންވާނެކަަމަށް ދެކިލައްވާކަމަށް ވިދާޅުވެފައެވެ. އެކަމާއި ގުޅޭގޮތުން ދައުލަތުގެ ވަކީލު ވިދާޅުވީ، އެކަމަށް ދައުލަތުން ކަނޑައެޅިގެން ދެކޮޅު ކަމަށެވެ. ސަބަބަކީ ބަޔާންތަކުގެ މައުލޫމާތުތަކަކީ އޭގެ ޒާތުގައި ހެކިވެރިންގެ މައުލޫމާތުތައް އެނގޭނެފަދަ މައުލޫމާތުތަކެއް ކަމަށާއި، އެފަދަ މައުލޫމާތުތައް ބަޔާނުން ސިއްރު ކުރާނަމަ، މުޅި ބަޔާނުގެ ބޮޑު ބައެއް ސިއްރުކުރަން ޖެހިދާނެކަން ދައުލަތުގެ ވަކީލު ފާހަގަ ކުރެއްވިއެވެ. ދައުލަތުގެ ވަކީލު ވިދާޅުވީ، ސިއްރު ހެކިން ހުށައަޅާ ސަބަބުތައް ދައުލަތުން ބަޔާންކޮށްދީފައިވާނެ ކަމަށާއި، އެ ސަބަބުން ދިފާއުވުމަށް ދިފާއަށް ފުރުސަތު އެބައޮތް ކަމަށެވެ.
ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ ވަނީ ދެން އޮންނަ އަޑުއެހުމެއްގައި ހެކި ރައްކާތެރި ކުރުމުގެ އަމުރާއި ގުޅޭގޮތުން ގޮތެއް ނިންމަވާނެ ކަމަށެވެ. އެ އަޑުއެހުން އޮންނާނީ 18 ޖެނުއަރީ ވާ އަންގާރަ ދުވަހުއެވެ. އެއަށްފަހު 20 ޖެނުއަރީގައި ލިއެކިއުންތައް ހަމަ ކުރުމަށް އިޖުރާއީ އަޑުއެހުމެއް ބޭއްވުމަށް ގާޒީ ނިންމެވިއެވެ.
މައްސަލައިގެ ޚުލާސާ:
އެމީހުންގެ މައްޗަށްދައުވާއުފުލާފައިވަނީ، ތިމަރަފުށީގައި ދީނުގެ ނަމުގައި ޓެރަރިސްޓް ޖަމާޢަތްތަކަށް ތާޢީދުކޮށް ޓެރަރިޒަމަށް ހިތްވަރުދީ ޓެރަރިސްޓް ޖަމާޢަތްތަކުގެ ޢަމަލުތަކަކީ ސަބަބުވެރި ޢަމަލުތަކެއްކަމަށް ދައްކައި ޓެރަރިސްޓް ޖަމާޢަތެއްކަމަށްވާ އިސްލާމިކް ސްޓޭޓް ޖަމާޢަތުގެ އިރުޝާދުގެ ދަށުން ދިވެހިރާއްޖޭގައި ޓެރަރިޒަމްގެ ޢަމަލުތައް ކުރުމަށް ރާވައި އެކަމަށް ހިތްވަރުދިނުމެވެ.
އަދި ތިމަރަފުށީގައި ހަރަކާތްތެރިވާ ދީނީ ހަރުކަށި ފިކުރުގެ އިސްފަރާތްތަކުން އޮޕަރޭޓްކުރާ "ނަސާޙް 3" ދޯނި ތެރޭގައި އިމްޕްރޮވައިޒްޑް އެކްސްޕްލޯސިވް ޑިވައިސް (އައި.އީ.ޑީ)އެއް ތައްޔާރުކުރުމަށްފަހު އައި.އީ.ޑީ ގޮއްވާލައި ދިވެހިރާއްޖޭގެ ޤައުމީ ސަލާމަތަށް ނުރައްކަލެއް ކުރިމަތިކުރުވުމަށް ތައްޔާރީތައްވަމުން ދިއުމުގެ ތުހުމަތު ވެސް އެމީހުންގެ މައްޗަށް ކުރެވެއެވެ.
މީގެއިތުރުން، ދަތުރު ދިއުމުގެ ނަމުގައި ފަޅުރަށްރަށަށް ގޮސް ހަނގުރާމައިގެ އެކި އުކުޅުތައް ދަސްކޮށް، ތަމްރީނުތައް ހަދަމުންދިއުމާއި، ތިމަރަފުށީގައި ދީނުގެ ނަމުގައި ހަރުކަށި ފިރުކު ފެތުރުމުގެ ގޮތުން އެރަށުގެ ބައެއް ގޭގޭގައި ހަރުކަށި ފިކުރުތަކަށް ހިތްވަރުލިބޭފަދަ ކްލާސްތައް ހިންގައި، ތިމަރަފުށީގައި ދިރިއުޅޭ ކުޑަކުދިންނަށް އަމާޒުކޮށްގެން އެކުދިން ހަރުކަށި ފިކުރަށް ލެންބުވުމަށް މަސައްކަތްކޮށްފައިވާ ކަމަށް ވެސް އެމީހުންގެ މައްޗަށް ތުހުމަތު ކުރެވެއެވެ.
