ރިހިވެލި މައްސަލަ: ސޭވް ދަ ޑްރީމްސް މޯލްޑިވްސްގެ ގާނޫނީވަކީލުގެ މައްސަލައެއް ބާރ ކައުންސިލަށް
16 ސެޕްޓެންބަރުގައި ބޭއްވުނު އާ ކައުންސިލުގެ އެގްޒެކެޓިވް ކޮމިޓީގެ 14 ވަނަ ޖަލްސާގައި އެ މައްސަލަ ބެލުމަށް ނިންމާފައިވޭ
ރިހިވެލި ރިސޯޓު- ރިހިވެލި ރިސޯޓުގެ މައްސަލައިގައި ސޭވް ދަ ޑްރީމް ފްރާންސަށް ދައުވާކުރެވޭނެ ހައިސިއްޔަތެއް ނެތް ކަމަށް ހައިކޯޓުން ވަނީ ޙުކުމް ކޮށްފައި
ކ. މަހާނައެޅިހުރާގައި ހިންގަމުންދާ ރިހިވެލި ބީޗް ރިސޯޓާ ގުޅިގެން ދިވެހިރާއްޖޭގެ ހައިކޯޓަށް ހުށަހެޅިފައިވާ މައްސަލައިގައި ހިމެނޭ ސޭވް ދަ ޑްރީމްސް މޯލްޑިވްސްގެ ޤާނޫނީ ވަކީލު އަހުމަދު ނާޒިމް އަބްދުއްސައްތާރާ ގުޅޭ ސުލޫކީ މައްސަލައެއް ދިވެހިރާއްޖޭގެ ބާރ ކައުންސިލުން ބަލަން ފަށައިފިއެވެ.
ބާރ ކައުންސިލުން ވަނީ ވަކީލުގެ މައްސަލައެއް ބަލަމުންދާކަން ސިޓީއަކުން އަންގާފައެވެ. އެގޮތުން ސޯޝަލް މީޑިއާގައި އެ މައްސަލައިގެ އަޑުއެހުންތައް ތާވަލުކުރެވޭ ގޮތާ ޙަވާލާދީ ވާހަކަ ދެއްކުމާއި، މައްސަލަ ބައްލަވާ ގާޟީ ޓެގް ކުރައްވާ ސޯޝަލް މީޑިއާގައި މައްސަލައާ ގުޅުންހުރި ވާހަކަތައް ދައްކަވަމުންދާކަމަށް ބުނެ، މި ޢަމަލަކީ މައްސަލަ ބައްލަވާ ފަނޑިޔާރުންނަށް ނުފޫޒު ފޯރުވުމުގެ ގޮތުން ކުރަމުންދާ އަމަލެއް ކަމަށް ބާރ ކައުންސިލަށް ހުށައެޅިފައިވާ މައްސަލައިގައި ބުނެއެވެ. އަދި މި ފަދަ ޢަމަލުތަކަކީ ޤާނޫނީ ވަކީލުން ޢަމަލުކުރަންޖެހޭ ސުލޫކާ ޚިލާފު އަމަލުތަކެއް ކަމަށް ބުނެ، މާހަލް ޓުއަރސް ޕވޓ ލޓޑ ގެ މެނޭޖިންގް ޑިރެކްޓަރ މުޙައްމަދު ޝިހާމްގެ ފަރާތުން އެ މައްސަލަ ބާރ ކައުންސިލަށް ވަނީ ހުށައަޅާފައެވެ.
އެކަމާ ގުޅޭގޮތުން ބާރ ކައުންސިލުން ބުނީ، 16 ސެޕްޓެންބަރު 2021 ގައި ބޭއްވުނު އާ ކައުންސިލުގެ އެގްޒެކެޓިވް ކޮމިޓީގެ 14 ވަނަ ޖަލްސާގައި އެ މައްސަލަ ބެލުމަށް ނިންމާފައިވާ ކަމަށެވެ. ކައުންސިލުން ވަނީ މައްސަލައިގައި ހުށައަޅަން ބޭނުންވާ ލިޔެކިޔުންތަކާއި ހެކިންގެ މަޢުލޫމާތު 19 ޖަނަވަރީ 2022 ގެ 15:00 ގެ ކުރިން ކައުންސިލަށް ހުށަައެޅުމަށް އަންގާފައެވެ.
އެކަމާ ގުޅޭގޮތުން ނާޒިމް ވިދާޅުވީ، ދަށު ކޯޓުން އެ މައްސަލަ ނިންމާފައިވަނީ 31 އޯގަސްޓު 2021ގައި ކަމަށެވެެ. އަދި ހައިކޯޓުގައި މައްސަލަ ރަޖިސްޓްރީ ކޮށްފައިވަނީ 13 ސެޕްޓެމްބަރު 2021 ގައި ކަމަށާއި، އެ ދެމެދުގައި ކުރާ ޓްވީޓުތަކުން ނުފޫޒު ފޯރުވޭނެ މައްސަލައެއް އެއްވެސް ކޯޓެއްގައި ނޯންނާނެ ކަމަށެވެ.
ރިހިވެލި ރިސޯޓުގެ މައްސަލައިގައި ސޭވް ދަ ޑްރީމް ފްރާންސަށް ދައުވާކުރެވޭނެ ހައިސިއްޔަތެއް ނެތް ކަމަށް ހައިކޯޓުން ވަނީ ޙުކުމް ކޮށްފައެވެ.
ސޭވް ދަ ޑްރީމް ފްރާންސާއި މާހަލް ޓުއާސްއާ ދެމެދު އެއްބަސްވުމެއްގައި ސޮއިކުރީ 15 ފެބުރުއަރީ 2018 އެވެ. ސޭވް ދަ ޑްރީމް މޯލްޑިވްސް އަކީ ރިހިވެލި ސަބްލީސްކުރުމަށް ސޭވް ދަ ޑްރީމް ފްރާންސް ކުންފުނީގެ 50-50 ހިއްސާ އޮންނަ ގޮތަށް ހެދި "ސޭވް ދަ ޑްރީމް މޯލްޑިވްސް" ކިޔާ ކުންފުންޏެކެވެ. ރިހިވެލި ރިސޯޓް ސަބްލީސްކުރުމުގެ އެއްބަސްވުމުގައި ސޮއިކުރީ 8 މެއި 2018 ގައެވެ. އަދި މާހަލް އިން ސަބްލީސް އެގްރީމަންޓް ބާތިލުކުރީ ސޭވް ދަ ޑްރީމް މޯލްޑިވްސްގެ ފަރާތުން ދައްކަންޖެހޭ ސަބްލީސް ކުއްޔާއި ހެޑްލީސް ކުލި ނުދައްކާތީއެވެ. ސަބްލީސް އެއްބަސްވުން ބާތިލުކޮށް ޓާމިނޭޝަން ނޯޓިސް ފޮނުވީ 14 ސެޕްޓެމްބަރު 2020 ގައެވެ.
މި މައްސަލައިގައި މީގެ ކުރިން ސިވިލް ކޯޓުން ކުރި ހުކުމްގައި ބުނެފައިވަނީ ދައުވާ ކުރުމާއި ދައުވާ ރައްދު ކުރުމަކީ، ހަމައެއް ލަމައެއް ނެތި ހިތުހުރިހާ ގޮތަކަށް ކުރެވެން އޮންނަ ކަމެއް ނޫން ކަމަށެވެ. އަދި ދައުވާ ރައްދު ކުރުމުގައި އެ ފަރާތެއްގެ މަސްލަހަތާއި އެ ދައުވާއެއް ކުރުމުގެ ގާނޫނީ ހައިސިއްޔަތު އެ ފަރާތަކަށް ހަމަ ހަގީގަތުގައި ވެސް ލިބިފައިވޭތޯ ބަލަންޖެހޭނެ ކަމަށެވެ.
ހައިކޯޓުގެ ޝަރީއަތުގައި ފަނޑިޔާރުންގެ ބެންޗުން ވިދާޅުވެފައިވަނީ މި މައްސަލަ އިސްތިއުނާފްކުރާ ފަރާތުން ސިވިލް ކޯޓުގެ ޤަޟިއްޔާގެ ޙުކުމަށް ބަދަލު ގެންނަން ޖެހޭކަމަށް ކަނޑައަޅައި، 14 ސެޕްޓެމްބަރ 2020 ގައި މާހަލް ޓުއާރސް އިން ނެރުނު ޓާމިނޭޝަން ނޯޓިސް ބާޠިލުކަމަށް ކަނޑައަޅައި، އެ ޓާމިނޭޝަން ނޯޓިސްއާ ޙަވާލާދީ ރިހިވެލި ރިސޯޓުގެ އޮޕަރޭޓިންގ ލައިސެންސް ބާޠިލުކަމަށް ކަނޑައަޅައި ދިނުމަށް އެދިފައިވާ ކަމަށެވެ. އަދި ސޭލްސް އެންޑް ޕާޗޭސް އެގްރީމެންޓާ ޚިލާފުވެފައިވާތީ، އެ އެގްރީމެންޓްގެ 4 ވަނަ މާއްދާގެ ދަށުން، އިނީޝިއަލް ޕޭމަންޓްގެ ގޮތުގައި 300،000 ޑޮލަރާއި ސައިނިން ފީ އެއްގެ 500،000 ޑޮލަރު، ދަޢުވާކުރާ ފަރާތުން ދަޢުވާ ލިބޭ ފަރާތަށް ދައްކާފައިވާއިރު، އެ ފައިސާ އަނބުރާ، ދަޢުވާކުރާ ފަރާތަށް ދެއްކުމަށް އެދިވަޑައިގެންފައިވާ ކަމަށެވެ.
މީގެ އިތުރުން ސަބްލީސް އެއްބަސްވުމަށް ދެ ފަރާތުންވެސް ތަބާވުމަށް ކަނޑައަޅައިދިނުމަށް އެދިފައިވެއެވެ.
