ސްޕެނިޝް ސުޕަ ކަޕުގެ ސެމީ ފައިނަލުގައި ބުދަ ދުވަހުގެރޭ ބާސާ ކަޓުވާލުމަށްފަހު މުބާރާތުގެ ފައިނަލަށް ރެއާލް މެޑްރިޑް ދަތުރުކޮށްފިއެވެ.

ސައުދީ އަރަބިއްޔާ މި ފަހަރުގެ މުބާރާތް ކުރިއަށްދާއިރު، ބުދަ ދުވަހުގެރޭ ކުޅުނު އެލް ކްލަސިކޯ މެޗުން ރެއާލް މޮޅުވީ ބާސާ އަތުން 3-2 ގެ ނަތީޖާއަކުންނެވެ. މިއީ ބާސާ އަތުން ރެއާލް ޖެހިޖެހިގެން މޮޅުވި ފަސްވަަނަ މެޗެވެ. އަދި ކްލަސިކޯ މެޗުގެ ތާރީޚުގައި ރެއާލް މޮޅުވި 100 ވަަނަ މެޗެވެ.

ބުދަ ދުވަހުގެރޭ ކުޅުނު މެޗުގައި ބާސާއިން މެޗު ޑޮމިނޭޓުކޮށްގެން ކުޅުނު ނަމަވެސް، މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ރެއާލުންނެވެ. މެޗުގެ 25 ވަނަ މިނެޓުގައި ކަރީމް ބެންޒެމާ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ވިނީޝިއުސް ޖޫނިއާއެވެ. އެކަމަކު ފުރަތަމަ ހާފު ނިމެން ހަތަރު މިނެޓަށް ވެފައި ވަނިކޮށް ބާސާއިން ވަނީ ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ލޫކް ޑި ޔޮންއެވެ.

މި މެޗުގެ ދެވަނަ ހާފުގައިވެސް އެންމެ ލީޑު ނަގާފައިވަނީ ރެއާލުންނެވެ. މެޗުގެ 72 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ މި ސީޒަނުގައި ތަފާތު މޮޅު ކުޅުމެއް ދައްކަމުން އަންނަ ބެންޒެމާއެވެ. އެކަމަކު މެޗު ނިމެން ހަތް މިނެޓަށް ވެފައި ވަނިކޮށް ބާސާއިން އަލުން ނަތީޖާ އެއްވަރުކުރިއިރު، ޖޯޑީ އަލްބާ ނެގި ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި އަންސޫ ފަޓީއެވެ.

މެޗުގެ 90 މިނެޓު ހަމަވިއިރު ދެ ޓީމު 2-2 ގެ ނަތީޖާއަކުން އެއްވަރުވެފައި އޮތުމާއެކު، ނަތީޖާ ނެރުމަށް ވަނީ އިތުރު ވަގުތުގެ ދެ ހާފު ކުޅެފައެވެ. އިތުރު ވަގުތުގެ ފުރަތަމަ ހާފުގެ ކުޅުން ފެށިގެން އަށްވަނަ މިނެޓުގައި ރެއާލް މި މެޗުން މޮޅުކޮށްދިން ލަނޑު ޖަހައިދިނީ ފެޑެރީކޯ ވަލްވޭޑޭއެވެ.

މި މޮޅާއެކު މި މުބާރާތުގެ ފައިނަލަށް ރެއާލް ދަތުރުކުރިއިރު، ފައިނަލުގައި ރެއާލާ ކުޅޭ ޓީމެއް އެނގޭނީ ބުރާސްފަތި ދުވަހުގެރޭ އެތުލެޓިކޯ މެޑްރިޑާއި އެތުލެޓިކް ބިލްބާއޯ ކުޅޭ ދެވަނަ ސެމީގެ މެޗަށްފަހުއެވެ. އެންމެ ފަހުން ސުޕަ ކަޕް ކާމިޔާބުކޮށްފައިވަނީ ބާސާ ބަލިކޮށް ބިލްބާއޯއިންނެވެ.