ގދ. ފަރެސްމާތޮޑާ، ކޮކާ، އިބްރާހިމް އާގިލް (18އ) މަރާލި މައްސަލާގައި ދައުލަތުން ދައުވާއުފުލާފައިވާ މީހުންގެ ޝަރީއަތުގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ތާވަލު ކުރުމަށްފަހު ކެންސަލްކޮށްފިއެވެ.

މި މައްސަލަ ތާވަލު ކޮށްފައި އޮތީ ބުދަ ދުވަހުގެ ހެނދުނު 09:00 އަށެވެ. އެހެންނަމަވެސް، މި އަޑުއެހުން ކެންސަލްވެފައިވަނީ ދިފާއީ ވަކީލުގެ އެދިލެއްވުމަކަށް ކަމަށް ކްރިމިނަލް ކޯޓުން މައުލޫމާތު ދެއެވެ. އެގޮތުން ދިފާއީ ވަކީލު އެހެން މައްސަލައެއްގެ އަޑުއެހުމެއް އެގަޑީގައި އޮތްކަމަށް ވިދާޅުވެ ސިޓީއަކުން އަންގަވާފައިވާކަމަށް ކޯޓުން މައުލޫމާތު ދެއެވެ.

އާގިލް މަރާލި މައްސަލައިގައި ދައުލަތުން ދައުވާ ކޮށްފައިވަނީ ލ. ފޮނަދޫ، ހިޔާ، ހަމްދޫން ހަމްޒަތާއި ސ. ހިތަދޫ، ސްވޭހުހީނާގެ، އަލީ މިޖުވާދު މާލިކު އިބްރާހީމްގެ އިތުރުން، ހއ. ދިއްދޫ، ސްނޯބާޑް، އިބްރާހީމް ވިޝާމްގެ މައްޗަށެވެ. މި މައްސަލައިގައި ހަމްދޫން ހަމްޒަތުގެ މައްޗަށް އުފުލާފައިވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާއެވެ. ހަމްދޫނުގެ އިތުރުން މިޖުވާދު މާލިކުގެ މައްޗަށްވެސް އުފުލާފައިވަނީ ހަމަ އެ ދައުވާއެވެ. އޭގެ އިތުރުން، މި މައްސަލައިގައި އިބްރާހީމް ވިޝާމްގެ މައްޗަށް އުފުލާފައިވަނީ ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން ގަސްތުގައި މީހަކު މެރުމުގައި އެހީތެރިވުމުގެ ކުށުގެ ދައުވާއެވެ.

މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ ޑިސެމްބަރު މަހުގެ 13 ވަނަ ދުވަހުއެވެ. އެ އަޑުއެހުމަކީ މައްސަލައިގެ ހެކިބަސް ނެގުމަށް ބޭއްވި އަޑުއެހުމެކެވެ. އެގޮތުން މައްސަލައިގެ ސީން އޮފް ކްރައިމް ރިޕޯޓު ތައްޔާރު ކުރެއްވި ފުލުސް އޮފިސަރު ވަނީ ހާޒިރުކޮށްފައެވެ. ދައުލަތާއި ދިފާއުން ވަނީ އެ ހެކިވެރިޔާއާ ސުވާލުކޮށްފައެވެ. ދައުލަތުން އެ ހެކިވެރިޔާ ހާޒިރުކޮށްފައިވަނީ ސީން އޮފް ކްރައިމް ރިޕޯޓަކީ ސައްޙަ ރިޕޯޓެއްކަން ކަށަވަރު ކުރުމަށެވެ.

މި މައްސަލައާ ގުޅިގެން ހެކިބަސް ދެއްވަމުން ހެކިވެރިޔާ ވަނީ ރިޕޯޓުގައި ހިމަނާފައިވާ އަނިޔާގެ ފޮޓޯތަކާއި ގުޅިގެން ދައުލަތުންނާއި ދިފާއުން ކޮށްފައިވާ ސުވާލުތަކަށް ޖަވާބު ދެއްވާފައެވެ. އެގޮތުން އެންމެ ބޮޑެތި ޒަޚަމްތަކެއް ގޮތުގައި ފާހަގަ ކުރެވުނީ ވައަތްފަރާތު މޭ މަތީގައި ހުރި ޒަޚަމްތަކެއްކަން އޭނާ ފާހަގަ ކުރިއެވެ.

މި އަޑުއެހުމުގައި އިތުރު ހެކިވެރިންތަކެއްގެ ހެކިބަސް ނެގުމަށްވެސް އޮތީ ތާވަލު ކުރެވިފައެވެ. އެހެންނަމަވެސް، އެ ހެކިން ހާޒިރު ކުރެވިފައިނުވާތީ ދެން އޮންނަ އަޑުއެހުމެއްގައި އޮންނާނީ ބާކީ ތިބި ހެކިންގެ ހެކިބަސް ނެގުން ކަމަށް ގާޒީ އޭރު ވިދާޅުވެފައިވެއެވެ.