ހިޔާ ފްލެޓްތަކުގެ ލިފްޓް ސަރަހައްދުގައި މީހުން ތޮއްޖެހޭ މައްސަލަ ހައްލުކުރަނީ
ފާރުތައް ތަޅާލުމަށްފަހު ޖާގަ ބޮޑުކުރުމުގެ އަމަލީ މަސައްކަތް މިހާރު ވަނީ ފަށާފައި
ހިޔާ ފްލެޓުގެ ލިފްޓް ސަރަހައްދު ބޮޑުކުރުމުގެ މަސައްކަތް ކުރަނީ
ހިޔާ ފްލެޓްތަކުގެ ލިފްޓް ސަރަހައްދުގައި މީހުން ތޮއްޖެހޭ މައްސަލަ ހައްލުކުރުމަށް މަސައްކަތް ކުރަމުން އަންނަކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ން ބުނެފިއެވެ.
އެޗްޑީސީން ބުނީ ހިޔާ ފްލެޓްތަކުގެ ލިފްޓް ސަރަހައްދުގައި މީހުން ތޮއްޖެހޭ މައްސަލަ ހައްލުކުރުމަށް އެސަރަހައްދުގެ ޖާގަ އިތުރުކުރުމުގެ މަސައްކަތް މިހާރު ފަށާފައިވާ ކަމަށެވެ. އެގޮތުން ލިފްޓް ހިމެނޭހެން ހަދާފައިވާ ލޮބީގައި ހުރި ބައެއް ފާރުތައް ތަޅާލުމަށްފަހު ޖާގަ ބޮޑުކުރުމުގެ އަމަލީ މަސައްކަތް މިޙާރު އެޗްޑީސީން ވަނީ ފަށާފައެވެ.
ހުޅުމާލޭގެ ދެވަނަ ފިޔަވަހީގައި އިމާރާތްކޮށްފައި ވަނީ 25 ބުރީގެ 16 ޓަވަރެވެ. މިދިޔަ އަހަރުގެ ފަހުކޮޅުން ފެށިގެން ގިނަ ބަޔަކު އަންނަނީ އެސަރަހައްދުގައި ދިރިއުޅެމުންނެވެ. ހިޔާ ފްލެޓަށް ދިރިއުޅުން ބަދަލުކުރާވަރު އިތުރުވާ ވަރަކަށް އެތަނުގައި އެކި ކަހަލަ މައްސަލަތައް އަންނަނީ ގިނަވަމުންނެވެ. އެގޮތުން ލިފްޓު ސަރަހައްދުގެ ޖާގަ ކުޑަވުމުގެ ސަބަބުން ގިނަ ބަޔަކު ތޮއްޖެހެއެވެ. ހަމައެހެންމެ ލިފްޓްތައް ހުއްޓޭ މައްސަލައެއްވެސް މިދޭތެރެއިން ވަނީ ފެންމަތިވެފައެވެ.
ގިނަ ބަޔަކު ދިރިއުޅެމުން އަންނަ ހިޔާ ފްލެޓުތަކުގައި މިހާރު ހުރީ އެންމެ ފިހާރައެކެވެ. އެ ފިހާރައިންވެސް އެސަރަހައްދުގައި ދިރިއުޅޭ މީހުން ބޭނުންވާ ގިނަ ސާމާނުތައް ނުލިބެއެވެ. އެހެންކަމުން ހުޅުމާލޭގެ ދެވަނަ ފިޔަވަހީގައި މި މަސް ތެރޭގައި އިތުރު ދެ ފިހަރާއެއް ހުޅުވުމަށް އެޗްޑީސީން އަންނަނީ މަސައްކަތް ކުރަމުންނެވެ.
