އިނގިރޭސި އެފްއޭ ކަޕުގެ ތިންވަނަ ބުރުގައި ހޮނިހިރު ދުވަހުގެރޭ ކުޅުނު މެޗުން އިނގިރޭސި ފަސްވަނަ ޑިވިޝަނުގައި ވާދަކުރަމުން އަންނަ ޗެސްޓާފީލްޑް ބަލިކޮށް މުބާރާތުގެ ހަތަރުވަނަ ބުރަށް ޗެލްސީ ދަތުރުކޮށްފިއެވެ.

އަމިއްލަ ދަނޑުގައި ކުޅުނު މެޗުން ޗެލްސީ މޮޅުވީ ޗެސްޓާފީލްޑް އަތުން ފަސޭހަކަމާއެކު 5-1 ގެ ނަތީޖާއަކުންނެވެ.

މި މެޗުގައި ޗެލްސީން މޮޅު ކުޅުމެއް ދެއްކިއިރު، މެޗުގެ ފުރަތަމަ ހާފުގައި އެ ޓީމުން ވަނީ ހަތަރު ލަނޑުގެ ލީޑެއް ނަގާފައެވެ. އެގޮތުން މެޗު ފަށައިގެން ހަވަނަ މިނެޓުގައި ޓިމޯ ވާނާ ޗެލްސީއަށް ލީޑު ނަގައިދިންއިރު، މެޗުގެ 18 ވަނަ މިނެޓުގައި ކަލުމް ހަޑްސަން-އޮޑޯއި ވަނީ ލަނޑެއް ޖަހައި، އެ ޓީމުގެ ލީޑު ފުޅާކޮށްދީފައެވެ.

އޭގެ ދެ މިނެޓު ފަހުން ރޮމެލޫ ލުކާކޫ ޗެލްސީގެ ތިންވަނަ ލަނޑު ކާމިޔާބުކޮށްދިންއިރު، ފުރަތަމަ ހާފު ނިމުމުގެ ކުރިން ޗެލްސީގެ ހަތަރުވަނަ ލަނޑު ޖަހައިދިނީ އަންޑްރެއަސް ކްރިސްޓެންސަންއެވެ. އަދި މި މެޗުގެ ދެވަނަ ހާފުގެ ކުރީކޮޅު ޕެނަލްޓީއަކުން ހަކީމް ޒިޔެކް ޗެލްސީގެ ފަސްވަނަ ލަނޑު ޖެހިއިރު، މެޗުގައި ޗެސްޓާފީލްޑުން ކާމިޔާބުކުރި ހަމައެކަނި ލަނޑު މެޗު ނިމެން 10 މިނެޓަށް ވެފައި ވަނިކޮށް ކާމިޔާބުކޮށްދިނީ އަކްވާސޭ އަސާންޓީއެވެ.

މި މެޗުން މޮޅުވެ އެފްއޭ ކަޕުގެ ހަތަރުވަނަ ބުރަށް ޗެލްސީ ދަތުރުކުރިއިރު، ހޮނިހިރު ދުވަހުގެރޭ ކުޅުނު މެޗުން އިނގިރޭސި ތިންވަނަ ޑިވިޝަނުގެ ކޭމްބްރިޖް ޔުނައިޓެޑުން ވަނީ 1-0 ގެ ނަތީޖާއަކުން ދުނިޔޭގެ އެންމެ މުއްސަނދި ކުލަބު ކަމަށްވާ ނިއުކާސަލް ޔުނައިޓެޑް ބަލިކޮށް، އެ ޓީމު މި މުބާރާތުން ކަޓުވާލާފައެވެ.