ފުރަތަމަ ޑިގްރީ ސްކީމްގެ ދަށުން މިހާރުވެސް 12،000ށް ވުރެ ގިނަ ދަރިވަރުން ކިޔަވަމުންދޭ
އެމްއެންޔޫ ފަހިދުވަސް
ކުރިޔާ ޚިލާފަށް މިސަރުކާރުން މީހުން ބިނާކުރުމުގައި ގިނަ ސްކީމްތަކެއް ހިންގަމުންދާކަމަށާއި މީހުން ބިނާކުރުމަކީ މިސަރުކާރުން ޚާއްސަ އިސްކަމެއްދޭ ކަމެއްކަމަށް ހަޔަރ އެޑިޔުކޭޝަން މިނިސްޓަރ ޑރ އިބްރާހީމް ހަަސަން ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި މީހުން ބިނާކުރުމަށް ކުރަމުންދާ މަސައްކަތްތަކާ ގުޅޭގޮތުން ވާހަކަފުޅު ދައްކަވަމުން މިނިސްޓަރ ވިދާޅުވީ ބައެއް ފަހަރަށް ދޫކުރާ ލޯނުގެ އަދަދު މަދުކަމަށް ނުވަތަ ލިބޭ ފުރުސަތުގެ މަދުކަމަށް ބައެއް ފަރާތްތަކަށް ހީވެދާނެކަމަށެވެ. ނަމަވެސް މިސަރުކާރުން މީހުން ބިނާކުރުމުގައި ތަފާތު ސްކީމްތަކެއް ގެންގުޅެމުން އަންނަކަމަށް މިނިސްޓަރ ވިދާޅުވިއެވެ.
އެގޮތުން ފުރަތަމަ ޑިގްރީއަށް ހިލޭ ކިޔަވައިދިނުމަކީ މިސަރުކާރުން އަލަށް ތައާރަފްކުރި ސްކީމެއްކަމަށް މިނިސްޓަރ ވިދާޅުވިއެވެ. ފުރަތަމަ ޑިގްރީ ސްކީމްގެ ދަށުން މިހާރުވެސް 12،000ށް ވުރެ ގިނަ ދަރިވަރުން ކިޔަވަމުން އަންނަކަމަށް މިނިސްޓަރ ވިދާޅުވިއެވެ. މީގެއިތުރުން ކުރިންވެސް ހިންގަމުން އައި ލޯން ސްކީމް ހިންގަމުން އަންނައިރު ސްކޯލަރޝިޕްތައްވެސް ދެމުން އަންނަކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ކޮވިޑްގެ ދަތި ހާލަތުގައިވެސް މިސަރުކާރުން މީހުން ބިނާކުރުމުގެ މަސައްކަތަށް ހުއްޓުމެއް ނުގެންނަކަމަށެވެ. އަދި މީހުން ބިނާކުރުމަށް މިއަދާ ހަމައަށް އަދުގެ ސަރުކާރުން 1.5 ބިލިއަން ރުފިޔާއަށްވުރެ ގިނަ ރުފިޔާ ޚަރަދުކޮށްފައިވާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ލޯން ސްކީމްގެ ދަށުން މިހާރުވެސް 31 ގައުމެއްގައި 1045 ދަރިވަރުން ކިޔަވަމުންދާކަމަށެވެ. އަދި ޖެނުއަރީ މަސް ނިމުމުގެ ކުރިން ލޯންގެ އައު ސްކީމަކަށް ހުޅުވާލާނެކަމަށް މިނިސްޓަރ ވިދާޅުވިއެވެ. ޕޯޓަލް މެދުވެރިކޮށް ފުރުސަތު ހުޅުވާލާއިރު ކުރިން ދިމާވި މައްސަލަތަކަށް ހައްލު ގެނައުމަށް މަސައްކަތްތަކެއް ކޮށްފައިވާނެކަމަށް މިނިސްޓަރ ވިދާޅުވިއެވެ.
މީގެއިތުރުން މިނިސްޓަރ ވިދާޅުވީ ބަޖެޓުން ޖާގަ ލިބޭ މިންވަރަކުން އެކި ދާއިރާތަކުން ސްކޮލަރޝިޕް ފުރުސަތުތައް ރާއްޖެއަށް ހޯދުމަށް މަސައްކަތްކުރާނެކަމަށެވެ. މީގެއިތުރުން އަހަރުގެ ތެރޭގައި ލިބޭ ސްކޮލަރޝިޕްތައް މިނިސްޓްރީގެ ސައިޓުން ފެންނަން ހުންނާނެކަމަށް މިނިސްޓަރ ވިދާޅުވިއެވެ.
