އިންތިޚާބަށް ފަހު އިރާގުގެ ގާނޫނު ހަދާ މަޖިލީސް ފުރަތަމަ ފަހަރަށް އެއްވަނީ

މިދިޔަ އަހަރުގެ އޮކްޓޯބަރ މަހު އިރާގުގެ ގާނޫނު ހަދާ މަޖިލީހުގެ އިންތިޚާބަށްފަހު އަލަށް އިންތިޚާބުވި މެމްބަރުންނާއެކު ފުރަތަމަ ބައްދަލުވުން ބޭއްވުމަށް އެޖެންޑާކޮށްފިއެވެ.

އިރާގުގެ ގާނޫނު ހަދާ މަޖިލީހުގެ އިންތިޚާބުގެ ނަތީޖާއާ މެދު ހިތްހަމަނުޖެހުންތަކެއް ވަނީ ފާޅުކޮށްފައެވެ. އާންމު ގޮތެއްގައި އައު މަޖިލީހުގެ ފުރަތަމަ ޖަލްސާގައި އޮންނަނީ މަޖިލީހުގެ ރައީސް އާއި ދެ ނާއިބުރައީސުން ކަނޑައެޅުމެވެ. އެގައުމުގެ ކައުންސިލް އޮފް ރެޕްރެޒެންޓޭޓިވް އިން ނެރުނު އެޖެންޑާގައި އާދިއްތަ ދުވަހު އޮންނަ ޖަލްސާއަށް އެޖެންޑާކޮށްފައިވަނީ ރައީސް އާއި ދެ ނާއިބުރައީސް އަށް ނަންތައް ނޮމިނޭޓްކުރުމެވެ. އެހެންކަމުން އަދި އެޖަލްސާއިން އެމަގާމުތަކަށް އަންނާނީ ކޮން ބައެއްކަމެއް ސާފެއްނުވާނެއެވެ.

އިރާގުގެ އިލެކްޓޯރަލް ކޮމިޝަނުން ވަނީ އިރާގުގެ ގާނޫނު ހަދާ މަޖިލީހުގައި ހުންނެވި އެންމެ އުމުރުން މަތީ މެމްބަރުކަމުގައިވާ މަހުމޫދް އަލް މަޝައްދާނީ ފުރަތަމަ ޖަލްސާގެ ރިޔާސަތު ބެލެހެއްޓެވުމަށް އަންގަވާފައެވެ. އެއީ އިރާގުގެ ގާނޫނު އަސާސީއާ އެއްގޮތްވާ ގޮތުގެމަތިންނެވެ.

އިރާގުގެ ގާނޫނުހަދާ މަޖިލީހުގެ އިންތިޚާބުގައި އެއްވެސް ބަޔަކަށް މެޖޯރިޓީ ލިބިފައިނުވެއެވެ. އެހެންކަމުން ފުރަތަމަ ޖަލްސާގެ ކަންކަން ދާނީ ވަރަށް އަމާންކޮށް ކަމަށް ދިރާސާކުރާ ފަރާތްތަކުން ބުނެއެވެ.

މިދިޔަ އަހަރު ބޭއްވި ގާނޫނުހަދާ މަޖިލީހުގެ އިންތިޚާބަކީ އިރާގުގެ ކުރީގެ ރައީސް ސައްދާމް ހުސައިނުގެ ވެރިކަން ނިމުނުފަހުން އެގައުމުގައި ބޭއްވި އިންތިޚާބެއްގައި އެންމެ މަދުން މީހުން ވޯޓުލާން ނިކުތް އިންތިޚާބެވެ. މިއިންތިޚާބުގައި ވޯޓުލާން ނިކުމެފައިވަނީ 44 އިންސައްތަ މީހުންނެވެ. އިންތިޚާބުގެ ނަތީޖާ ދައްކާގޮތުން ގާނޫނު ހަދާ މަޖިލީހުގެ 329 ގޮނޑީގެ ތެރެއިން 73 ގޮނޑި ކާމިޔާބުކޮށްފައިވަނީ ޝީއީ ލީޑަރެއް ކަމުގައިވާ މުގްތަދާ އަލް ޞަދްރުގެ ޕާޓީންނެވެ.

އިންތިޚާބުގައި އިރާނުން ތާއީދުކުރާ ފާތިހު އެލައަންސަށް ކުރިމަތިވި ނާކާމިޔާބީއާއެކު އިންތިޚާބާމެދު އެމީހުން ވަނީ ސުވާލުތައް ފެންމަތިކޮށްފައެވެ. އެމީހުންނަށް ލިބިފައިވަނީ 17 ގޮނޑިއެވެ. އެހަމަނުޖެހުންތަކަށް ނިމުން އައިސްފައިވަނީ ޑިސެމްބަރ މަސް ނިމެންދަނިކޮށް އެގައުމުގެ ސްޕްރީމް ކޯޓުން ފައިނަލް ނަތީޖާއަކީ އެއީ ކަމަށް ކަނޑައެޅުމުންނެވެ.

މިއާއެކު އަދިވެސް އިރާގުގައި އަލަށް އެކުލަވާލާނެ ސަރުކާރެއް އޮންނާނެ ގޮތަކާމެދު ވަނީ ޚިޔާލުތަފާތުވުންތައް އުފެދިފައެވެ.