ޗައިނާއާއި ރާއްޖޭގައި ހުރި އެއްގޮތް މައްސަލަތައް ހައްލުކުރުމާ ގުޅޭގޮތުން ފުޅާދާއިރާއެއްގައި މަޝްވަރާކުރެވިފައިވޭ: ޝާހިދު

ޗައިނާއާއި ރާއްޖޭގައި ހުރި އެއްގޮތް މައްސަލަތައް ހައްލުކުރުމާ ގުޅޭގޮތުން ދެގައުމުގެ ދެމެދުގައި މުހިންމު މަޝްވަރާކޮށްފައިވާ ކަމަށް އދ. ގެ އާންމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ރާއްޖެއާ ޗައިނާއާ ދެމެދު މުހިންމު 5 އެއްބަސްވުމެއްގައި ސޮއިކުރެއްވުމަށްފަހު ބޭއްވި ނޫސްވެރިންގެ ބައްދަލުވުމުގައެވެ.

ޝާހިދު ވިދާޅުވީ ރާއްޖެއާ ޗައިނާއާ ދެގައުމުގެ ދެމެދުގައި ޒަމާނުއްސުރެ އޮތް ގުޅުމަކީ ވަރުގަދަ ގުޅުމެއް ކަމަށާއި، ގުޅުން ދެމިގެންދަނީ އިހުތިރާމުގެ މައްޗަށް ކަމަށާއި، އަދި ވަން ޗައިނާ ޕްރިންސިޕަލްއަށް ކުރާ ސަޕޯޓުއާއެކު ކަމަށް ވެސް ޝާހިދު ވިދާޅުވިއެވެ. ދެގައުމަށް ދިމާވާ އެއްގޮތް މައްސަލަތަކާ ގުޅޭގޮތުން މަޝްވަރާކުރިކަން ފާހަގަކުރައްވައި ޝާހިދު ވިދާޅުވީ، މައްސަލަތައް ފަސޭހައިން ދެނެގަނެވި، ހައްލު ކުރުމަށް އިތުރަށް ފަސޭހަވާނެ ކަމަށެވެ.

މީގެ އިތުރުން ޝާހިދު ވިދާޅުވީ ރާއްޖެއަށް ތަރައްގީ ގެނައުމުގައި ޗައިނާއަކީ މުހިންމު ގައުމެއް ކަމަށެވެ. އެގޮތުން ޗައިނާ-މޯލްޑިވްސް ފްރެންޑްޝިޕް ބްރިޖާއި، ހުޅުމާލޭގައި ބިނާކުރި ހައުސިން މަޝްރޫއު އަދި ވެލާނާ އެއާޕޯޓު ބޮޑުކޮށް އައު ރަންވޭ ތަރައްގީކުރުން ފަދަ ދީލަތި އެހީތެރިކަމަށްޓަކައި ޝުކުރު އަދާކުރެއްވިއެވެ. އަދި ކޮވިޑް-19ގެ ހާލަތުގައި ޗައިނާއިން ވެދެމުންދާ އެހީތެރިކަމަށް އަލިއަޅުއްވާލައްވައި ޝުކުރު އަދާކުރެއްވިއެވެ.

ރާއްޖެއާ ޗައިނާއާ ދެމެދު ސޮއިކުރެވުނު 5 އެއްބަސްވުމަށް އިޝާރާތްކުރައްވައި ޝާހިދު ވިދާޅުވީ، ދެގައުމުގެ ދެމެދުގައި ސޮއިކުރެވުނު ވިސާ އެގްޒެމްޝަން އެއްބަސްވުމާއެކު ދިވެހިންނަށް ވަރަށް ބޮޑެތި ލުއިތަކެއް ލިބިގެންދާނެ ކަމަށާއި، ޗައިނާގެ ބޯޑަރު ހުޅުވާލުމާއެކު ދިވެހިން ޗައިނާއަށް ދިޔުމުން 30 ދުވަހުގެ އޮން އެރައިވަލް ވިސާ ލިބޭނެ ކަމަށެވެ. އަދި މިއެއްބަސްވުންތަކުގެ ސަބަބުން ދެގައުމުގެ ގުޅުން އިތުރަށް ބަދަހިވެގެންދާނެ ކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ ޗައިނާއާ ރާއްޖޭގެ 50 އަހަރުވީ ދެމެހެއްޓެނިވި ގުޅުން އިތުރަށް ބަދަހިކޮށް، ކުރިއަށް އޮތްތާގައި ވެސް މިގުޅުން އިތުރަށް ވަރުގަދަކުރާނެ ކަމަށެވެ.