އިދިކޮޅު މުޒާހަރާ: ދެމީހެއް ފިޔަވައި އެންމެން ދޫކޮށްލައިފި
8 ޖެނުއަރީ 2022 | ހޮނިހިރު 08:18ދެމީހުންގެ ތެރެއިން އެކަކަކީ ފުލުހުންގެ އަމުރަށް ނުކިޔަމަންތެރިވެ، ފުލުހުންނަށް ހަމަލާދީ، ފުލުހުންގެ މުދަލަށް ގެއްލުން ދިން ކަމަށް ތުހުމަތު ކުރެވޭ މީހެއް
އިންޑިއާ އައުޓް ކެމްޕެއިންގެ ތެރެއިން
އިދިކޮޅު ޕީޕީއެމް/ޕީއެންސީ ކޯލިޝަނުން އިންޑިއާ އައުޓް ކެމްޕޭން ހުކުރު ދުވަހު ހަވީރު ކުރިއަށް ގެންގޮސްފައިވާއިރު މި މުޒާހަރާގެ ތެރެއިން 29 މީހުން ވަނީ ފުލުހުންގެ ބެލުމުގެ ދަށަށް ގެންގޮސް 2 މީހަކު ފިޔަވައި އެންމެން ދޫކޮށްލައިފިއެވެ.
ރާއްޖެއެމްވީއަށް މައުލޫމާތު ދެމުން ފުލުހުން ބުނީ ހުކުރު ދުވަހުގެ ރޭ ދެމީހަކު ފިޔަވާ ހައްޔަރުކުރި އެންމެން ދޫކޮށްލާފައިވާ ކަމަށެވެ. އަދި ބަންދުގައި ތިބި ދެ މީހުންގެ ތެރެއިން އެކަކަކީ ފުލުހުންގެ އަމުރަށް ނުކިޔަމަންތެރިވެ، ފުލުހުންނަށް ހަމަލާދީ، ފުލުހުންގެ ދައުރު އަދާކުރުމަށް ހުރަސްއަޅައި އެކަމަށް ހިތްވަރުދީ އެކަން ރާވާ ހިންގުމުގައި އިސްކޮށް ހަރަކާތްތެރިވަމުންދާކަމަށް ތުހުމަތު ކުރެވޭ ދިވެހި ފިރިހެނެއް ކަމަށެވެ. ދެވަނަ މީހަކީ ފުލުހުންގެ ދައުރު އަދާކުުރުމަށް ހުރަސްއަޅައި ފުލުހަކަށް ހަމަލާދީ މާރާމާރީ ހިންގައި ފުލުހުންގެ ވެހިކަލްއަށް ގެއްލުންދިން ކަމުގެ ތުހުމަތުގައި ހައްޔަރުކޮށްފައިވާ އަންހެނެއް ކަމަށެވެ.
އިދިކޮޅު ކޯލިޝަނުން ކޮންމެ ހަފުތާއަކު ކަހަލަ ގޮތަކަށް އަންނަނީ މި ކެމްޕޭން ހިންގަމުންނެވެ. އަދި އިންޑިއާ މިލިޓަރީ އައުޓް ޖަހާފައިވާ ޓީޝާޓުތައް ސަޕޯޓަރުން ލައިގެން ތިބޭއިރު އިންޑިއާ އައުޓް ލިޔެފައިވާ ދިދަތައް ވެސް ޝުއޫރު ފާޅުކުރުމަށްޓަކައި ބޭނުން ކުރެއެވެ.
ރާއްޖޭގައި ތިބިކަމަށްބުނާ އިންޑިއާ ސިފައިން ބޭރުކުރުމަށް ގޮވާލައި އިދިކޮޅު ޕީޕީއެމުން ފަށާފައިވާ ހަރަކާތްތަކުގައި ބޭނުންކުރާ "އިންޑިއާ އައުޓް" ޖެހި ޓީޝާޓް ނުލާން ފުލުހުން އަންގި ކަމަށް އިދިކޮޅުން މީގެ ކުރިން ވަނީ ބުނެފައެވެ. ނަމަވެސް ފުލުހުން ވަނީ އެ ވާހަކަތައް ދޮގުކޮށްފައެވެ
އިދިކޮޅު ޕީޕީއެމް/ޕީއެންސީ ކޯލިޝަންގެ ލީޑަރު ރައީސް ޔާމީން މިނިވަންވެވަޑައިގެންނެވި ފަހުން ކުރިއަށްވުރެ ބޮޑަށް އިންޑިއާ އައުޓް ކެމްޕެއިން ކުރިއަށްގެންދެއެވެ. އެގޮތުން އެމަނިކުފާނު އިސްވެ ހުންނަވައި އަތޮޅުތެރޭގައި ވެސް މި ކެމްޕެއިން ކުރިއަށް ގެންގޮސްފައިވެއެވެ. އަދި އިންޑިއާ އައުޓްގެ ނަމުގައި ޕެޓިޝަނެއްގައި ސޮއިކުރުންވެސް ކުރިއަށްގެންގޮސްފައިވާއިރު މި ޕެޓިޝަންގައި ބުނަނީ މި ސަރުކާރުން އިންޑިއާއާއެކު ސިއްރު އަސްކަރީ އެއްބަސްވުންތަކެއްގައި ސޮއިކުރަމުން ގެންދާ ކަމަށެވެ. އަދި ގާނޫނުއަސާސީއާ ޚިލާފަށް ރާއްޖޭގެ ތަންތަން އިންޑިއާއަށް ދޫކޮށްފައިވާ ކަމަށެވެ
މި ކެމްޕެއިނާއި ގުޅިގެން ސަރުކާރުން ބުނީ ރާއްޖެއާ ދޭދޭ ގައުމުތަކުގެ މެދުގައި އޮންނަ ގުޅުންތަކާ ގުޅޭގޮތުން ފިތުނަ އުފައްދައި ގޯސް ތުހުމަތުތަކެއް ފެތުރުމަކީ، ރާއްޖެއަށް އަބަދުވެސް އެހީތެރިވެދޭ އަވަށްޓެރި ގާތް އެކުވެރި ގައުމުތަކާމެދު އޮންނަ ބަދަހި ގުޅުންތަކަށް ނޭދެވޭ އަސަރު ކުރާނެ ކަމެއް ކަމަށެވެ.
ސަރުކާރުން ބުނީ ރާއްޖެއިން ޒަމާންވީ ބަދަހި ގުޅުންތައް ބާއްވަމުން އަންނަ ގައުމުތަކާ ދެމެދު އޮންނަ ގުޅުމަކީ ގައުމުތަކުގެ ދެމެދުގައި އޮންނަ އިހުތިރާމާއި ރާއްޖޭގެ ގާނޫނުތަކާއި އެއްގޮތަށް މި ސަރުކާރުން ނަގަހައްޓާނޭ ގުޅުންތަކެއްކަމަށެވެ. އަދި އެފަދަ ގުޅުންތަކުގެ ސަބަބުން ރާއްޖޭގެ ސިޔާދަތާއި މިނިވަންކަމާއި ސަރަހައްދީ ރައްކާތެރިކަމަށް ނުރައްކަލެއް ނުވާނެ ކަމަށާއި، އޭގެ ބަދަލުގައި އެފަދަ ގުޅުންތަކުގެ ސަބަބުން ރާއްޖެއަށް ފައިދާވެ، އެ ފައިދާތައް ރާއްޖޭގެ ރައްޔިތުންނަށް ވެސް ލިބިގެންދާނެ ކަމަށެވެ.
