ބޮޑު ވަޒީރު މޯދީ ރައީސް މުއިއްޒު އަށް ޝުކުރު އަދާ ކުރައްވާ ކުރެއްވި ޕޯސްޓެއް، އޭއައި ގްރޮކް އިން ތަރުޖަމާ ކޮށް އާންމު ކުރި އިރު އޮންނަނީ މި ސަރުކާރުގައި ތިބީ އިންޑިއާ އާ ދެކޮޅު ހަރަކާތުގައި ކުރީ ސަފުގައި ތިބި މީހުން ކަމަށް!
މޯދީ އަށް ޖުމްހޫރީ ދުވަހުގެ ތަހުނިޔާ މުއިއްޒު ވިދާޅުވުމުން އެކަމަށް މޯދީ ޝުކުރު އަދާކުރެއްވި ޕޯސްޓް، ގްރޮކް އިން ތަރުޖަމާކުރީ އިންޑިއާ އައުޓް ހަރަކާތްތަކުގެ ވާހަކަ ހިމަނައިގެން.
އިންޑިއާގެ ބޮޑުވަޒީރު ނަރެންދުރަ މޯދީ 2025 ވަނަ އަހަރުގެ ޖުލައި މަހުގެ 25 ވަނަ ދުވަހު ދިވެހިރާއްޖެ އަށް ކުރެއްވި ރަސްމީ ދަތުރުފުޅުގެ ތެރެއިން. | ގެޓީ އިމޭޖަސް
އެކްސް ގެ އޭއައި އެސިސްޓަންޓް "ގްރޮކް" އިން އިންޑިއާގެ ބޮޑުވަޒީރު ނަރެންދުރަ މޯދީ ކުރެއްވި ޕޯސްޓެއް ނުބައިކޮށް ތަރުޖަމާކޮށް، އޭގެ ތެރެއަށް "އިންޑިއާާ އާ ދެކޮޅު ހަރަކާތްތަކުގެ" ވާހަކަ އިތުރުކުރުމާ ގުޅިގެން އަނެއްކާ ވެސް "އިންޑިއާ އައުޓް" ޒަމާނުގެ ވާހަކަތައް ފެންމަތިވާ ގޮތް ވެއްޖެ އެވެ.
މިހާރު ރާއްޖޭގެ ވެރިކަމުގައި ތިބި ފަރާތްތަކަކީ "އިންޑިއާ އައުޓް" ގެ ނަމުގައި އިންޑިއާ އާ ދެކޮޅަށް ހިންގި ބޮޑު ކެމްޕޭނެއްގައި އިސްކޮށް ހަރަކާތްތެރިވި ފަރާތްތަކެއްގެ ގޮތުގައި ފާހަގަ ކުރެވިފައިވުމުގެ އިތުރުން، ވެރިކަމުގެ ކުރީ ކޮޅުގައި ގެންގުޅުނު ސިޔާސަތުތަކެއްގެ ސަބަބުން އިންޑިއާ އާއި ރާއްޖޭގެ ގުޅުމަށް އޭގެ ސަބަބުން ބޮޑެތި ގޮންޖެހުންތަކެއް އޮތީ ކުރިމަތިވެފަ އެވެ. މިކަން މިހެން ހިނގާފައި ވަނިކޮށް، ގްރޮކް އިން އެ ހަނދާންތައް އާވެގެންދާ ގޮތަކަށް ތަރުޖަމާ އެއް ފެންމަތި ކުރުމާ އެކު ގިނަ ބައެއްގެ ސަމާލުކަމަށް އެކަން ވަނީ އައިސްފަ އެވެ.
އިންޑިއާގެ މީޑިއާ ތަކުގައި ވެސް އެ ތަރުޖަމާގެ ވާހަކަ ތައް ދެކެވެން ވަނީ ފަށާފަ އެވެ.
މައްސަލަ ގޯސްވީ، އިންޑިއާގެ ޖުމްހޫރީ ދުވަހުގެ ތަހުނިޔާ ފޮނުއްވި ކަމަށްޓަކައި "އިންޑިއާ އައުޓް" ކެމްޕޭނުގައި އޭރު އިސް ސަފުގައި ހުންނެވި މިހާރުގެ ރާއްޖޭގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ޝުކުރު އަދާކުރައްވައި އިންޑިއާ ގެ ބޮޑުވަޒީރު މޯދީ ދިވެހި ބަހުން ކުރެއްވި ޕޯސްޓެއް، ނުބައި މާނަ އެއް ދޭހަވާ ގޮތަށް ގްރޮކް އިން ތަރުޖަމާ ކުރުމުންނެވެ.
ބޮޑުވަޒީރު މޯދީ އަސްލު ލިޔުއްވި އެއްޗަކީ ކޮބާ؟
ބޮޑުވަޒީރު މޯދީގެ އަސްލު ޕޯސްޓުގައި ލިޔުއްވާފައި ވަނީ: "އިންޑިއާގެ 75 ވަނަ ޖުމްހޫރީ ދުވަހުގެ މުނާސަބަތުގައި ތިޔަ ފޮނުއްވި ހެޔޮއެދުންތަކަށްޓަކައި ރައީސް ޑރ. މުއިއްޒަށް ވަރަށް ބޮޑަށް ޝުކުރު ދަންނަވަމެވެ. ދެ ގައުމުގެ ރައްޔިތުންގެ ލާބަޔާއި މަންފާއަށްޓަކައި އަޅުގަނޑުމެން އަބަދުވެސް ގުޅިގެން މަސައްކަތް ކުރާނަމެވެ. ދިވެހި ރައްޔިތުންނަށް އުފާވެރި، ބާއްޖަވެރި މުސްތަގުބަލަކަށް އެދެމެވެ."
ބޮޑު ވަޒީރުގެ މި މެސެޖަކީ ދެ ގައުމުގެ ދެމެދުގައި އޮންނަ ގާތް ގުޅުމާއި އެއްބާރުލުން ދަމަހައްޓާނެކަން ހާމަކޮށްދޭ، ޒަމާންވީ ހާރިޖީ އުސޫލުތަކާ އެއްގޮތަށް ލިޔުއްވާފައިވާ މެސެއްކަން ފާހަގަ ކުރެވެ އެވެ.
ގްރޮކް އިން ކުރި ތަރުޖަމާއަކީ ކޮބާ؟
ނަމަވެސް، ގްރޮކް އިން މި ޕޯސްޓް ތަރުޖަމާކޮށްފައި ވަނީ އަސްލު މާނައާ މުޅިން ހިލާފަށް، ވަރަށް ތަފާތު ގޮތަކަށެވެ. ގްރޮކްގެ ތަރުޖަމާގައި މުއިއްޒު އަށް ޓެގް ކޮށްފައި ބުނެފައި ވަނީ:
"ޝުކުރިއްޔާ ރައްޔިތުންގެ މަޖިލިސް.
އިންޑިއާގެ 77 ވަނަ މިނިވަން ދުވަހުގެ މުނާސަބާ ފާހަގަ ކުރުން ރާއްޖޭގައި ބޭއްވުނު އިރު، ދިވެހި ސަރުކާރުން އެކަމުގައި ބައިވެރިވި އެވެ. މި ސަރުކާރަކީ ރައްޔިތުން ހިންގާ އިންޑިއާާ އާ ދެކޮޅު ހަރަކާތްތަކުގައި ބައިވެރިވެފައިވާ ސަރުކާރެކެވެ. އިންޑިއާާ އާ ދެކޮޅު ދެ ހަރަކާތުގައި ވެސް އެމީހުން ތިބީ މުޒާހަރާތަކުގެ ކުރީ ސަފުގަ އެވެ."
މި ތަރުޖަމާގައި ހަގީގީ ބައެއް ކުށްތައް ހުރުމުގެ އިތުރުން (ޖުމްހޫރީ ދުވަހުގެ ބަދަލުގައި މިނިވަން ދުވަސް ކަމަށް ބުނުން)، ބޮޑުވަޒީރު މޯދީގެ ޕޯސްޓުގައި އެއްވެސް ވަރަކަށް އިޝާރާތް ނުކުރާ ސިޔާސީ ވާހަކަތަކެއް ވަނީ ހިމަނާފަ އެވެ. ވަކިން ހާއްސަކޮށް، "އިންޑިއާ އައުޓް" ފަދަ ހަރަކާތްތަކަށް ނިސްބަތްވާ ފަދަ އިބާރާތްތައް ބޮޑުވަޒީރުގެ ބަސްފުޅުގެ ތެރެ އަށް އޭ އައި އިން ވަނީ އަމިއްލަ އަށް އިތުރުކޮށްފަ އެވެ.
މިއީ އޭއައި ޓޫލަކުން ހެދި ގޯހެއް ނަމަވެސް، މި ސްކްރީންޝޮޓްތައް ސޯޝަލް މީޑިއާގައި ހަލުވިކަމާއެކު ފެތުރިގެން ވަނީ ގޮސްފަ އެވެ.
މިއީ ގްރޮކްގެ ސަބަބުން އިންޑިއާ އަށް މައްސަލަ ކުރިމަތިވި ފުރަތަމަ ފަހަރެއް ނޫނެވެ. ދާދި ފަހުން ވެސް އޭއައި މެދުވެރިކޮށް އުފައްދާފައިވާ ބައެއް ފޮޓޯތަކާއި މައުލޫމާތުގެ ސަބަބުން އިންޑިއާ ސަރުކާރުން ވަނީ އެ ޕްލެޓްފޯމަށް ފާޑުކިޔާފަ އެވެ.
