ފާއިތުވި ދުވަސްތަކުގައި އެތައް ސަރުކާރުތަކެއް އައިސްފައިވާއިރު އެމްޑީޕީ ނޫންބަޔަކު ކޮމަންޑޫ އަށް ތަރައްގީ ގެނެސްފައި ނުވާކަމަށް ޝިފާޒު ވިދާޅުވި
އެމްޑީޕީގެ ނައިބު ރައީސް މުހައްމަދު ޝިފާޒު
އެމްޑީޕީއަކީ ރައްޔިތުންނަށް ލިބިފައި އޮތް ހެލްޕުލައިނެއް ކަމަށާއި ރައްޔިތުން ކަމަކަށް އެދި ގޮވާލާއިރު އޮންނަނީ އެމްޑީޕީ ކަމަށް އެޕާޓީގެ ނައިބު ރައީސް މުހައްމަދު ޝިފާޒު ވިދާޅުވެއްޖެއެވެ.
ކޮމަންޑޫ ދާއިރާގެ ބައި-އިލެކްޝަންގައި އެމްޑީޕީން ވާދަކުރާ ކެންޑިޑޭޓް ރަސްމީކޮށް ތަޢާރަފު ކުރުމަށް ކޮމަންޑޫގައި ރޭ ބޭއްވި ޖަލްސާގައި ވާހަކަ ދައްކަވަމުން ޝިފާޒު ވަނީ އެމްޑީޕީން ފާއިތުވި 15 އަހަރުތެރޭގައި ރައްޔިތުންގެ ދިރިއުޅުން ބަދަލު ކުރުމަށް ވެފައިވާ ވައުދުތަކާއި ހާސިލުކޮށްފައިވާ ކަންކަމުގެ މައްޗަށް އަލިއަޅުވާލައްވާ ވާހަކަ ދައްކަވާފައެވެ. އެގޮތުން މީގެ ކުރިން ފޮތްފަންސުރަށް ސަލާންޖެހުމާއި ޔުނިފޯރމް ނުހޯދިގެން ދަރިން ސްކޫލަށް ނުފޮނުވިގެން އުޅުނު ބެލެނިވެރިންނަށް އެކަންކަން ހިލޭ ކޮށްދިނުމަށް ވަކާލާތު ކޮށްދިނީ އެމްޑީޕީން ކަމަށް ޝިފާޒު ވިދާޅުވިއެވެ. އޭގެ 15 އަހަރު ފަހުން މިއަދު ހިލޭ ޑިގްރީއަށް ކިޔެވެމުން ދާކަމަށް ޝިފާޒު ވިދާޅުވިއެވެ.
މީގެކުރިން ފެނާއި ނަރުދަމާގެ ވާހަކަ އެހެން ބަޔަކު ނުދައްކާ ކަމަށާއި އެމްޑީޕީ ނޫނަސް ރާއްޖޭގައި ސިޔާސީ ޕާޓީތައް އުފެދިފައިވާކަމަށް ޝިފާޒު ވިދާޅުވިއެވެ. ނަމަވެސް އެމްޑީޕީއަކީ އަބަދުވެސް ރައްޔިތުންގެ ހައްގުގައި ކަންކަމުގައި ވަކާލާތު ކުރަމުން އައި ޕާޓީއެއް ކަމަށް ޝިފާޒު ވިދާޅުވިއެވެ.
ފާއިތުވި ދުވަސްތަކުގައި އެތައް ސަރުކާރުތަކެއް އައިސްފައިވާއިރު އެމްޑީޕީ ނޫންބަޔަކު ކޮމަންޑޫ އަށް ތަރައްގީ ގެނެސްފައި ނުވާކަމަށް ޝިފާޒު ވިދާޅުވިއެވެ.
ޝިފާޒު ވިދާޅުވީ މިދިޔަ 15 އަހަރު ދުވަހުގެ ތެރޭގައި ރައްޔިތުންނަށް ދިމާވި ކަންކަން އެމްޑީޕީ ނޫން ބަޔަކު ހައްލުކޮށްދީފައި ނުވާކަމަށެވެ. ހައްގުގެ ވާހަކަތަކާއި ބޮޑު ހިލައިގެ ވާހަކަތައްވެސް ދެއްކިދާނެ ކަމަށާއި ނަމަވެސް އަދިވެސް ރާއްޖޭގެ ރައްޔިތުންނަށް ކަމެއް ކޮށްދިން ބަޔަކު އެމްޑީޕީ ނޫނީ ނެތްކަމަށް ޝިފާޒު ވިދާޅުވިއެވެ. އަދި މިއަދު ލޯންޗު ކުރެވިގެންދާ ކެމްޕެއިނަކީ ހަމައެކަނި ރާޝިދުގެ ކެމްޕެއިން ނޫންކަމަށް ޝިފާޒު ވިދާޅުވިއެވެ.
މިއީ އެމްޑީޕީގެ ހަޔާތަށް ވަރަށް މުހިންމު ވަގުތެއްކަމަށް ޝިފާޒު ވިދާޅުވިއެވެ. އައްޑޫ ސިޓީން ފެށިގެން ހއ އަތޮޅާ ހަމައަށް ތަަރައްގީގެ މަޝްރޫޢުތައް މިއިން ދުވަހަކު ނުހިނގާ ވަރަށް ހިނގަމުންދާ ކަމަށް ޝިފާޒު ވިދާޅުވިއެވެ.
ޝިފާޒު ވިދާޅުވީ ބައި އިލެކްޝަންގައި ވާދަކުރާ އެހެން ކެންޑިޑޭޓަކު އެއީ ސަރުކާރުގެ ކެންޑިޑޭޓު ކަމަށް ވިދާޅުވެ ސަރުކާރުން ވެފައިވާ ވައުދުތައް ފުއްދޭނޭ އެކެންޑިޑޭޓަށް ކަމަށް ވިދާޅުވާކަމަށެވެ. ނަމަވެސް ސަރުކާރު ކެންޑިޑޭޓަކީ އެމްޑީޕީގެ ކެންޑިޑޭޓު ކަމަށް ޝިފާޒު ވިދާޅުވިއެވެ.
އަދި އިންޑިޔާ އައުޓު ނަމުގައި ރައީސް ޔާމީން އިސްވެ ހުންނަވާ ކުރިޔަށް ގެންދަވާ ހަރަކާތަށް އިޝާރާތް ކުރައްވާ ޝިފާޒު ވަނީ ޑްރަގް ވަންނަ ދޮރުތައް ބަންދު ކުރުމަކީ އެމްޑީޕީން އަބަދުވެސް ކުރަމުން އަންނަ ކަމެއްކަމަށާއި އެކަމާ ކޯފާވެ ވަޑައިގެން ނޫޅުއްވުމަށެވެ. ޔާމީނަށް އެޖާގަ ނުދެއްވާނެ ކަމަށް ޝިފާޒު ވިދާޅުވިއެވެ.
