ދަރިވަރުންނާއި ޓީޗަރުންނަށް ރިސޯސަސް އިތުރުކުރުމުގެ ޕްރޮގްރާމްތައް ހިންގާނަން: މިނިސްޓަރ
ޔޫއެންޑީޕީގެ އެހީތެރިކަމާއެކު ސަރުކާރުގެ ދެ ޔުނިވަރސިޓީ ގަޔާއި ޕްރައިވެޓް ކޮލެޖްތަކުގައި ޖޭއެސް ސްޓޯރ ލައިބްރަރީތައް ގާއިމުކުރެވިފައިވޭ
ހަޔަރ އެޑިޔުކޭޝަން މިނިސްޓަރ ފަލަސުރުޚީ ޕްރޮގްރާމްގައި ވާހަކަފުޅު ދައްކަވަނީ
ދަރިވަރުންނާއި ޓީޗަރުންނަށް އުނގެނުމުގައްޔާއި އުނގަންނައިދިނުމުގައި އިތުރު ރިސޯސަސްތައް ހޯދައިދިނުމަށް ކުރިޔަށް އޮތްތަނުގައި މަސައްކަތްތަކެއް ކުރައްވާނެ ކަމަށް ހަޔަރ އެޑިޔުކޭޝަން މިނިސްޓަރ ޑރ އިބްރާހީމް ހަަސަން ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ހަޔަރ އެޑިޔުކޭޝަން މިނިސްޓްރީން ކުރަމުން ގެންދަވާ މަސައްކަތްތަކާއި ގުޅޭގޮތުން ވާހަކަފުޅު ދައްކަވަމުން މިނިސްޓަރ ވިދާޅުވީ މިސަރުކާރުން ވަރަށް ބޮޑު އިސްކަމެއް ދީގެން ކުރާ އެއްކަމަކީ ސަރުކާރާއި ޕްރައިވެޓް ކޮލެޖް ޔުނިވަރސިޓީތަކުގައި ކިޔަވަމުންދާ ދަރިވަރުންނާއި ކިޔަވައިދިނުމުގައި ހަރަކާތްތެރިވާ ޓީޗަރުންނަށް އެހީތެރިކަން ފޯރުކޮށްދިނުމެވެ. އެގޮތުން ވަކިން ޚާއްސަކޮށް ކިޔަވައިދިނުމާއި އުނގެނުމަކީ މިނިސްޓްރީން އިސްކަމެއްދީގެން މަސައްކަތް ކުރަން ބޭނުންވާ އެއް ދާއިރާކަމުގައި މިނިސްޓަރ ވިދާޅުވިއެވެ.
އެގޮތުގެ މަތިން ޔޫއެންޑީޕީގެ އެހީތެރިކަމާއެކު ސަރުކާރުގެ ދެ ޔުނިވަރސިޓީ ގަޔާއި ޕްރައިވެޓް ކޮލެޖްތަކުގައި ޖޭއެސް ސްޓޯރ ލައިބްރަރީތައް ގާއިމުކުރެވިފައިވާކަމަށް މިނިސްޓަރ ވިދާޅުވިއެވެ. މިކަމުގެ ސަބަބުން ދަރިވަރުންނާއި ޓީޗަރުންނަށް ވަރަށް ގިނަ އިލްމީ ފޮތްތައް ލިބިގެން ދާނެކަމަށް މިނިސްޓަރ ވިދާޅުވިއެވެ. އޮންލައިންކޮށް މިފަދަ ލައިބްރަރީ ތަކަށް ވަދެވޭނެ ގޮތް ވުމަކީ ކުދިންނާއި ޓީޗަރުންގެ ފެންވަރު ރަނގަޅުވުމަށް މަގުފަހިވާނެ ކަމެއްކަމަށް މިނިސްޓަރ ވިދާޅުވިއެވެ.
މީގެއިތުރުން މިނިސްޓަރ ވަނީ ހަޔަރ އެޑިޔުކޭޝަން މިނިސްޓްރީން ޕްރައިވެޓް ސެކްޓަރާއި ގުޅިގެން ކުރިޔަށް ގެންދާ ސްކްލިޑް ފޮރ ރިޒިލިއަންސް ޕްރޮގްރާމްގެ މައްޗަށްވެސް ވާހަކަ ދައްކަވާފައެވެ. އެގޮތުން މިޕްރޮގްރާމްގެ ޒަރީޢާއިން ޒުވާނުންނަށް ހުނަރު ދަސްވުމުގެ އިތުރުން ވަޒީފާގެ ފުރުސަތު ފަހިވެ ވަޒީފާގެ ކަށަވަރުކަން ލިބިގެންދާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިޕްރޮގްރާމް ކާމިޔާބު ޕްރޮގްރާމަކަށް ވަނީ ޕްރައިވެޓް ސެކްޓަރ އާއި ސަރުކާރު ގުޅިގެން ކުރާ މަސައްކަތުގެ ސަބަބުންކަމަށެވެ. އަދި މިޕްރޮގްރާމްގައި ބައިވެރިވާ ކޮންމެ ބައިވެރިއަކަށް 2000 ރުފިޔާގެ ޕޮކެޓް މަނީއެއް ލިބޭނެކަމަށް މިނިސްޓަރ ވިދާޅުވިއެވެ. މީގެއިތުރުން މިޕްރޮގްރާމްގައި ބައިވެރިވާ ކުދިންނަށް އިންޓަރންޝިޕް ޕްރޮގްރާމެއް ކުރިޔަށްދާނެ ކަމަށާއި އެކަމުގެ ސަބަބުން ވަޒީފާ ދޭ ފަރާތަށް އެއީ ކާކުކަން އެނގިގެންދާނެކަމަށްވެސް މިނިސްޓަރ ވިދާޅުވިއެވެ.
